Аросат даштида чекмасанг алам…


Мен – ўзини сотиб қўйган қул,
Хаёлимга занжир солиб бер.
Ўзингдан ўзгадан озод қил,
Юрагимни ундан олиб бер.

Осмон эдим, қандай эгилдим,
Қаро ерга дондай тўкилдим,
Наҳот шунча осон енгилдим,
Юрагимни ундан олиб бер.

Қандай ишқ бу – йўлдан чалғитса,
Ўтдан олиб ўтга ирғитса,
Паришонман, яна тўзғитса…
Юрагимни ундан олиб бер.

Бир нигоҳга мендай зормас у,
Тоза дардга интизормас у,
Мени Сенга олиб бормас у,
Юрагимни Гулдан олиб бер.

2008


Кутганинг сенга ҳам интизор бўлса,
Сен уни севгандек севолмаса ҳам –
Севса, туйғулари беғубор бўлса,
Аросат даштида чекмасанг алам.

Тизилмаса, майли, йўлингда ҳурлар,
Фақат бир нурчеҳра кутса нигорон.
Бағишламаса ҳам шаънингга шеърлар,
Энг тоза сўзларин айласа эҳсон…

Аммо бу ҳаётдир – синов бозори,
Ҳаммаси тескари, барчаси ғалат.
Сен суйган маҳлиқо бошқанинг зори,
Парво қилмаганинг сенга битар хат.

Бу аҳли дунёни тушунай қандай,
Мудом насияга алишгай нақдни.
Кўнгил кўнгил билан ўчакишгандай,
Бахтдан тўйганларга илинар Бахтни…

2012

Беҳзод ФАЗЛИДДИН

“Тушларингдан чиқиб келдим” китобидан.


Men – o‘zini sotib qo‘ygan qul,
Xayolimga zanjir solib ber.
O‘zingdan o‘zgadan ozod qil,
Yuragimni undan olib ber.

Osmon edim, qanday egildim,
Qaro yerga donday to‘kildim,
Nahot shuncha oson yengildim,
Yuragimni undan olib ber.

Qanday ishq bu – yo‘ldan chalg‘itsa,
O‘tdan olib o‘tga irg‘itsa,
Parishonman, yana to‘zg‘itsa…
Yuragimni undan olib ber.

Bir nigohga menday zormas u,
Toza dardga intizormas u,
Meni Senga olib bormas u,
Yuragimni Guldan olib ber.

2008


Kutganing senga ham intizor bo‘lsa,
Sen uni sevgandek sevolmasa ham –
Sevsa, tuyg‘ulari beg‘ubor bo‘lsa,
Arosat dashtida chekmasang alam.

Tizilmasa, mayli, yo‘lingda hurlar,
Faqat bir nurchehra kutsa nigoron.
Bag‘ishlamasa ham sha’ningga she’rlar,
Eng toza so‘zlarin aylasa ehson…

Ammo bu hayotdir – sinov bozori,
Hammasi teskari, barchasi g‘alat.
Sen suygan mahliqo boshqaning zori,
Parvo qilmaganing senga bitar xat.

Bu ahli dunyoni tushunay qanday,
Mudom nasiyaga alishgay naqdni.
Ko‘ngil ko‘ngil bilan o‘chakishganday,
Baxtdan to‘yganlarga ilinar Baxtni…

2012

Behzod FAZLIDDIN

“Tushlaringdan chiqib keldim” kitobidan.

Добавить комментарий

Ваш e-mail не будет опубликован.