Беҳзод Фазлиддин. “Шеър сеҳри” (2018) | Behzod Fazliddin. “She’r sehri” (2018)

YouTubeда томоша: Behzod Fazliddin. “She’r sehri” (2018)

***
то ҳануз жумбоққа ўхшайди умрим,
то ҳануз улгуриб бўлмас яшашга,
то ҳануз кўзимда эзғиланар қум,
то ҳануз нўноқман ўзни асрашга.Behzod Fazliddin. She'r sehri 2018

наҳотки ҳаёт шу, тириклик шудир,
наҳотки умрбод ўртанмак – қисмат?
наҳотки мўъжиза бўлмайди содир,
наҳотки тоабад чўзилгай ҳижрат?

билмайман, бу бошда яна не савдо,
билмайман, не жиндир жонда рақс тушган.
билмайман, билишдан надир муддао,
билмайман, руҳ қуши қаёққа учган.

то ҳануз…
наҳотки…
билмайман…

2012

***
Ҳали дунё сутдай оқ эди,
Боғлар яшил, осмон ложувард.
Қуёш ерга яқинроқ эди,
Ой юзида кўринмасди гард.

Тебранарди майсалар сокин,
Кўкдан ёғиб майин наволар.
Борлиқ узра Бахт эди ҳоким,
Жонга ҳузур тоза ҳаволар!..

Сезмай қолдим, қалб қандай қотди,
Қачон армон ёзолди куртак?
Тушларим ҳам ўзгариб кетди,
Энди бари олис бир эртак.

Қани кунлар – менга аталган,
Лойларгами ё ботиб қўйдим?
Ҳар заррадан чирой ахтарган
Кўзларимни йўқотиб қўйдим…

2010

АЙБНОМА

Беҳзод Фазлиддинга айтиб қўйинглар,
Бу тун ҳам ухламай чиқди отаси.
Узун бўлиб кетди, тилин қийинглар,
Онаси кўксида ғамлар шодаси.

Қишлар келиб бўлди, у гап тузгунча,
Бир бор ҳовлисида қор кураб берсин.
Бировга ёқай деб гуллар узгунча,
Бориб онасининг дардини терсин.

Кейин гуллайверсин, кўкарсин, майли,
Отанинг дуоси бошлагай тахтга.
Нега толейидан йўллари айри,
Онасиз ҳам бориш мумкинми Бахтга?!

Ишига ишқ қўйган қандай фарзандки,
Лоақал кўнглини очиб кетмайди.
Дарвоқе, у кишим шунчалар бандки,
Ўзидан бошқага вақти етмайди…

2007

***
…чунки кўп нарсадан кўнглимни уздим,
чунки ҳафсаламни пир қилди ҳаёт.
чунки билиб-билмай ниятни буздим,
чунки еру кўкдан бўлмади нажот;

чунки ўзим билан келишолмадик,
жиндаккина ақлим эгмади бўйин.
имкон ила вақтни бўлишолмадик,
чунки ҳаммасининг мақсади – ўйин;

чунки изғиб юрар бунда қора руҳ,
баттар авж олдириб ҳазин оташни.
этимни чимчилар совуқ бир андуҳ,
чунки истамадим осон яшашни…

чунки…

2009

ДЎСТ

Мени телбаларча қўмсар Ёлғизлик,
Кўзлари йўлимда илҳақ, нигорон.
Уни ҳам ҳар кўйга солар ёрсизлик,
Шуниси ёмон-да, шуниси ёмон.

Нечундир бу ҳолга осон кўникдим,
Кўнглим чопар унинг кўнглин олгани.
Ёнингга бормасам, кечир, севиклим,
Қўрқади Ёлғизлик ёлғиз қолгани.

2008

***
Ташқарига чиқдим. Юрагим қўлда.
(Бутун бир кўчани ёритарми шам!..)
Бўлиши мумкин-ку худди шу йўлда
Умрида ёруғлик кўрмаган одам.

2008

***
Кўзларимга ишон, қўлларингни бер,
Ахир, ғамларингни тугатмоқчиман.
Ўзим билмайман-у, лекин, барибир,
Мен сенга яшашни ўргатмоқчиман.

Кел, илми ушшоқни ўзлаштирайлик,
Бирга нажот топсин бу яримжонлар.
Орзунинг исмини ўзгартирайлик,
Имконлар навбатда турар, имконлар.

Кўнглингдан ўзгага қулоқ солмагин,
Чорла, безовта қил, тушларимга кир.
Аммо аро йўлда туриб олмагин,
Фақат кетмасингга мени ишонтир.

2008

ЖАВОБ

Мени тушунмади тушунганларим,
Уларни тингладим, ўзимни тийдим.
Ишонмай қийнади ишонганларим,
Митти озорларни кечирдим-қўйдим.

Ёт сўзга беркитдим қулоқларимни,
Ҳақгўй кўзларимни атадим ғаним.
Шамоли ўчирди чироқларимни,
Мендан кечиб кетди кечмаганларим.

Дўстлар, дўстларимга айтинг, шошмасин,
Арзонга учмасин сотмоқчи бўлса.
Хиёнатида ҳам майдалашмасин,
Каттароқ тош отсин отмоқчи бўлса!

2008

***
Ёлғиз-ёлғиз хаёллар сурдим,
Маломатнинг ҳиди ҳар ерда.
Тушларимда тентираб юрдим –
Юрагимнинг ярми қаерда?

Шовуллайди беором боғлар,
Ҳар япроқда ҳасрат гупурса.
Уваланиб кетарди тоғлар,
Бир азиз бош елкамда турса…

Азоб роҳат қилар қонимда,
Сингиб борар жонга нур тафти.
Учай дейман – йўқсан ёнимда,
Қайлардасан, қанотим жуфти?

2009

НОМА

Настарин гуллари муштоқ хатимга…
Ёдингиз бағрида тунларим оқдир.
Қайси хизматимга, қай заҳматимга
Мени зулфингизга боғламиш тақдир?!

Ғуборлар текизмай хаёлингизга,
Ҳаёни нарига қувмай севасиз.
Юрагимни тугиб рўмолингизга,
Сиз айтмай севасиз, “севмай” севасиз.

Бемаврид хатарни пайқаган қушдай,
Қаёққа беркинди туйғулар – инжа?
Хунобдир рўёбга чиқмаган тушдай,
Гумон кўксингизга сололмас панжа.

Кўнгил қўрғонига етказмас шикаст,
Парволар қилмайсиз ёмғирга, дўлга.
Куйдириб кетолмас – тафти жуда паст,
Сув сепиб қўясиз ҳижронли йўлга.

Улар севгим каби шаффоф, бетамаъ,
Юзга солмас олис гуноҳларимни –
Боғимга бегона хазон деб яна
Супуриб юборманг нигоҳларимни…

2008

Шеърлар “Сен қачон гуллайсан” (2008), “Кутмаган кунларим, кутган кунларим” (2012) ва “Тушларингдан чиқиб келдим” (2017) китобларидан.

Ижтимоий тармоқларда:
https://www.facebook.com/behzod.fazliddin
https://www.facebook.com/behzodfazliddin.uz/
https://twitter.com/BehzodFazliddin
Телеграмдаги каналимиз: @Behzod_Fazliddin
YouTubeдаги cаҳифа-каналимиз: Behzod Fazliddin

 

Опубликовать в Facebook
Опубликовать в Google Plus
Опубликовать в LiveJournal
Опубликовать в Мой Мир
Опубликовать в Одноклассники
Опубликовать в Яндекс
Ўқишлар сони: 275

Добавить комментарий

Ваш e-mail не будет опубликован. Обязательные поля помечены *