Bugun uchun bugun yasha!


Умримнинг ярмини йўлларга бердим,
Умримнинг ярмини гулларга бердим,
Ўзимга бермадим умримни…

Тилимни қонатиб Худога бордим,
Дилимни қонатиб Худога бордим,
Ўзига ўзимни олиб бормадим…

2006

ТАНБЕҲ

Имтиҳон бошланар имтиҳон билан,
Довонга ўтасан бир довон билан.

Офтобга чиқасан бир қадам қўйсанг,
Видолашгинг йўқми зимистон билан?

Назарингни тўйдир нафсингдан олдин,
Кунинг ўтмай қолмас бурда нон билан.

Кунда иддаодан муддао надир,
Қаёққа борасан шу исён билан?

Бу йўлда ўзингни ўзинг қутқаргин
Покиза диёнат, тоза қон билан.

2008

ҲИКМАТ

Кўзингни оч, мудраб ўтма,
Тонг отди-ку, тунни кутма,
Ўтмишингни ортиқ титма,
Бугун учун бугун яша.

Кеча ёмон йиқилгансан,
Эзилгансан, бўғилгансан,
Йўғ-э, бугун туғилгансан,
Бугун учун бугун яша.

Қувонч – ғамга таъзиядир,
Тун – кундузга марсиядир,
Эртанг ҳали насиядир,
Бугун учун бугун яша.

Кипригингга қўнмасин гард,
Кўксингдаги ойнани арт,
Бугун бахтли бўлишинг шарт,
Бугун учун бугун яша.

2008

Беҳзод ФАЗЛИДДИН


Umrimning yarmini yo‘llarga berdim,
Umrimning yarmini gullarga berdim,
O‘zimga bermadim umrimni…

Tilimni qonatib Xudoga bordim,
Dilimni qonatib Xudoga bordim,
O‘ziga o‘zimni olib bormadim…

2006

TANBEH

Imtihon boshlanar imtihon bilan,
Dovonga o‘tasan bir dovon bilan.

Oftobga chiqasan bir qadam qo‘ysang,
Vidolashging yo‘qmi zimiston bilan?

Nazaringni to‘ydir nafsingdan oldin,
Kuning o‘tmay qolmas burda non bilan.

Kunda iddaodan muddao nadir,
Qayoqqa borasan shu isyon bilan?

Bu yo‘lda o‘zingni o‘zing qutqargin
Pokiza diyonat, toza qon bilan.

2008

HIKMAT

Ko‘zingni och, mudrab o‘tma,
Tong otdi-ku, tunni kutma,
O‘tmishingni ortiq titma,
Bugun uchun bugun yasha.

Kecha yomon yiqilgansan,
Ezilgansan, bo‘g‘ilgansan,
Yo‘g‘-e, bugun tug‘ilgansan,
Bugun uchun bugun yasha.

Quvonch – g‘amga ta’ziyadir,
Tun – kunduzga marsiyadir,
Ertang hali nasiyadir,
Bugun uchun bugun yasha.

Kiprigingga qo‘nmasin gard,
Ko‘ksingdagi oynani art,
Bugun baxtli bo‘lishing shart,
Bugun uchun bugun yasha.

2008

Behzod FAZLIDDIN

Добавить комментарий

Ваш e-mail не будет опубликован.