Тинч қўймайди Дард деган болам…

ТУГАМА(ЙДИ)ГАН ШЕЪРЛАР


Ҳўнграб ҳам шунчалик қийналмас эдим,
Менинг кулгуларим йиғидан бадтар.
О, бу қадар узоқ ўйланмас эдим,
Сўзимга изма-из юрмаса хатар…


Битта қанотда ҳам учган бўлардим,
Йўл топиб олардим ўзим осмонга.
Қуёшга яқинроқ жойда ўлардим,
Қайтмасдим ғам тўла ёруғ зиндонга…


Ёниб борар қўлимда қалам,
Ҳамма гаплар айтиб бўлинган,
Сўз даштида дайдиб бўлинган,
Тинч қўймайди Дард деган болам…

2007

ТАЪҚИБ

Ниҳоят, тонгдан ҳам гўзал уйғондим,
Ёғдулар ёғилди қароқларимга.
Ўзимга ишондим – нурландим, ёндим,
Қуёш тегиб кетди бармоқларимга…

Сабаб кўп кунлардан кўнгил тўқлашга,
Дунёларни қучиб ўсмоқда қўлим.
Шундай Ҳаётимда мени йўқлашга
Нимага хижолат бўлмайсан, Ўлим?!

2006

Беҳзод ФАЗЛИДДИН

Добавить комментарий

Ваш e-mail не будет опубликован.