Nega sof fitratin boy bermish Inson?..


Дунё деганлари шумиди азал –
Ҳануз Ҳақ деганнинг қалби чок-чокми?
Китоблар қатида жон бермиш сўзлар –
Қаерда донишлар талпинган Поклик?

Қаёқдан келмоқда шунча касофат?
Қабоҳат қаердан, туҳмат қаердан?
Қизарган бу кўзлар мунча очофат?
Зулму жаҳолатга рухсат қаердан?

Нега оқибатни бунча кам ўйлар,
Нега залолатга йўл берар Виждон?
Нега ўз-ўзига тинмай зулм айлар,
Нега соф фитратин бой бермиш Инсон?

Масхарабоз тушмас саҳна тўридан,
Тубан талабларин қўймас ножинслар.
Замин зир титрайди шовқин зўридан,
Қудрат касб этмоқда асли ожизлар.

Қурушқоқ қалбларда ўлиб-ўлолмай
Инграниб ётгандай Тафаккур, Ирфон,
Моғор манзилларга яқин йўлолмай
Қайларда дийдираб юрибсан, Иймон?..

2016

Беҳзод ФАЗЛИДДИН


Dunyo deganlari shumidi azal –
Hanuz Haq deganning qalbi chok-chokmi?
Kitoblar qatida jon bermish so‘zlar –
Qayerda donishlar talpingan Poklik?

Qayoqdan kelmoqda shuncha kasofat?
Qabohat qayerdan, tuhmat qayerdan?
Qizargan bu ko‘zlar muncha ochofat?
Zulm-u jaholatga ruxsat qayerdan?

Nega oqibatni buncha kam o‘ylar,
Nega zalolatga yo‘l berar Vijdon?
Nega o‘z-o‘ziga tinmay zulm aylar,
Nega sof fitratin boy bermish Inson?

Masxaraboz tushmas sahna to‘ridan,
Tuban talablarin qo‘ymas nojinslar.
Zamin zir titraydi shovqin zo‘ridan,
Qudrat kasb etmoqda asli ojizlar.

Qurushqoq qalblarda o‘lib-o‘lolmay
Ingranib yotganday Tafakkur, Irfon,
Mog‘or manzillarga yaqin yo‘lolmay
Qaylarda diydirab yuribsan, Iymon?..

2016

Behzod FAZLIDDIN

Добавить комментарий

Ваш e-mail не будет опубликован.