Фақат иймон, фақат иймон ҳақ…

ИБРАТ

Гадосифат бойни ҳам,
Денгиз ютган сойни ҳам,
Игна кирган жойни ҳам
Бир Зот кўриб турибди.

Эл ошаган ошларни,
Ерни ўпган бошларни,
Пинҳон-пинҳон ёшларни
Бир Зот кўриб турибди.

Ким ортимдан отмиш ўқ,
Ким соямга қилар дўқ,
Адоватим, гинам йўқ –
Бир Зот кўриб турибди.

Дилинг соғми ё бемор,
Ичинг ичида не бор,
Гарчи тўрт ёнинг девор,
Бир Зот кўриб турибди.

Парда шитирлашидан
Нега қўрқасан, эй, тан,
Пардасиз нури билан
Бир Зот кўриб турибди.

Беҳзод, гул эк изингга,
Ҳазир бўлгин сўзингга,
Ҳар не қилсанг – ўзингга,
Бир Зот кўриб турибди.

2009


Ёлғон, ёлғон, ёлғон ҳаммаси,
Фақат иймон, фақат иймон ҳақ.
Ҳар манзилда фано ҳамласи,
Аро йўлда жонинг муаллақ.

Қўллар қисқа, орзулар майиб,
Қонга тўймас армон ханжари.
Нечун олам борар торайиб
Ўсган сари, улғайган сари?

Парво қилма, фарёд айлама.
Кунларингни нурга қондиргин.
Чуқур кетма, ортиқ ўйлама,
Фақат ёнгин, фақат ёндиргин.

2009

Беҳзод ФАЗЛИДДИН

IBRAT

Gadosifat boyni ham,
Dengiz yutgan soyni ham,
Igna kirgan joyni ham
Bir Zot ko‘rib turibdi.

El oshagan oshlarni,
Yerni o‘pgan boshlarni,
Pinhon-pinhon yoshlarni
Bir Zot ko‘rib turibdi.

Kim ortimdan otmish o‘q,
Kim soyamga qilar do‘q,
Adovatim, ginam yo‘q –
Bir Zot ko‘rib turibdi.

Diling sog‘mi yo bemor,
Iching ichida ne bor,
Garchi to‘rt yoning devor,
Bir Zot ko‘rib turibdi.

Parda shitirlashidan
Nega qo‘rqasan, ey, tan,
Pardasiz nuri bilan
Bir Zot ko‘rib turibdi.

Behzod, gul ek izingga,
Hazir bo‘lgin so‘zingga,
Har ne qilsang – o‘zingga,
Bir Zot ko‘rib turibdi.

2009


Yolg‘on, yolg‘on, yolg‘on hammasi,
Faqat iymon, faqat iymon haq.
Har manzilda fano hamlasi,
Aro yo‘lda joning muallaq.

Qo‘llar qisqa, orzular mayib,
Qonga to‘ymas armon xanjari.
Nechun olam borar torayib
O‘sgan sari, ulg‘aygan sari?

Parvo qilma, faryod aylama.
Kunlaringni nurga qondirgin.
Chuqur ketma, ortiq o‘ylama,
Faqat yongin, faqat yondirgin.

2009

Behzod FAZLIDDIN

Добавить комментарий

Ваш e-mail не будет опубликован.