Musulmon go‘zaldir, Islom go‘zaldir!

ҲАҚИҚАТ

Ҳикмат тўла замин, сир тўла осмон,
Инсон – унутувчи, билгувчи – Раҳмон.
Фавқул башар истаб инграган жаҳон,
Бир боқ, қандай хушҳол иймон-ла инсон –
Мусулмон гўзалдир,
Ислом гўзалдир.

Қалбидан зеҳнига зиё таратган,
Жумлаи оламни ўзга қаратган.
Қаттоллиги ёлғон, ёвузлиги лоф,
Яратган аларни мушфиқ яратган –
Мусулмон гўзалдир,
Ислом гўзалдир.

Чумолига озор бермаган филлар,
Арслон келбатлару ҳалим кўнгиллар,
Илдизи самога туташган гуллар,
Ботил хаёллардан озода диллар –
Мусулмон гўзалдир,
Ислом гўзалдир.

Гувоҳлик бергайдир ҳар ҳадис, оят,
Саодат асридан қанча ривоят!..
Бағоят гўзалдир, бағоят гўзал –
Фикрат кўзи ила боқсалар, шояд,
Мусулмон гўзалдир,
Ислом гўзалдир.

Рад этар ҳаддидан ошган ҳар жонни,
Зулм ила тўкилган ҳар томчи қонни.
Миллат сўрамагай, ирқ ажратмагай,
Инсонни эъзозланг, дейди – Инсонни –
Мусулмон гўзалдир,
Ислом гўзалдир.

Башарнинг эртаси мавҳумдир ҳануз,
Шу ўй ичра кун-тун маҳзундир ҳануз.
Муқаррар нусратдан умид узмас ҳеч,
Гарчи бечораҳол, мазлумдир ҳануз –
Мусулмон гўзалдир,
Ислом гўзалдир.

Қалблардан зулматни аритмасларми?
Жаҳолат уруғин қуритмасларми?
Яратганнинг Сўзи кор этмас наҳот:
“Ахир улар ақл юритмасларми?”
Мусулмон гўзалдир,
Ислом гўзалдир!

Айт, нега таҳқирлаб тинмайсан, Дунё,
У сенинг дардингга топгуси даво.
Фитнакор ҳар тўда макрига учма,
Адашма, ҳукмга шошилма, илло –
Мусулмон гўзалдир,
Ислом гўзалдир!

Беҳзод ФАЗЛИДДИН

Шеърни YouTubeда тинглаш

HAQIQAT

Hikmat to‘la zamin, sir to‘la osmon,
Inson – unutuvchi, bilguvchi – Rahmon.
Favqul bashar istab ingragan jahon,
Bir boq, qanday xushhol iymon-la inson –
Musulmon go‘zaldir,
Islom go‘zaldir.

Qalbidan zehniga ziyo taratgan,
Jumlayi olamni o‘zga qaratgan.
Qattolligi yolg‘on, yovuzligi lof,
Yaratgan alarni mushfiq yaratgan –
Musulmon go‘zaldir,
Islom go‘zaldir.

Chumoliga ozor bermagan fillar,
Arslon kelbatlar-u halim ko‘ngillar,
Ildizi samoga tutashgan gullar,
Botil xayollardan ozoda dillar –
Musulmon go‘zaldir,
Islom go‘zaldir.

Guvohlik bergaydir har hadis, oyat,
Saodat asridan qancha rivoyat!..
Bag‘oyat go‘zaldir, bag‘oyat go‘zal –
Fikrat ko‘zi ila boqsalar, shoyad,
Musulmon go‘zaldir,
Islom go‘zaldir.

Rad etar haddidan oshgan har jonni,
Zulm ila to‘kilgan har tomchi qonni.
Millat so‘ramagay, irq ajratmagay,
Insonni e’zozlang, deydi – Insonni –
Musulmon go‘zaldir,
Islom go‘zaldir.

Basharning ertasi mavhumdir hanuz,
Shu o‘y ichra kun-tun mahzundir hanuz.
Muqarrar nusratdan umid uzmas hech,
Garchi bechorahol, mazlumdir hanuz –
Musulmon go‘zaldir,
Islom go‘zaldir.

Qalblardan zulmatni aritmaslarmi?
Jaholat urug‘in quritmaslarmi?
Yaratganning So‘zi kor etmas nahot:
“Axir ular aql yuritmaslarmi?”
Musulmon go‘zaldir,
Islom go‘zaldir!

Ayt, nega tahqirlab tinmaysan, Dunyo,
U sening dardingga topgusi davo.
Fitnakor har to‘da makriga uchma,
Adashma, hukmga shoshilma, illo –
Musulmon go‘zaldir,
Islom go‘zaldir!

Behzod FAZLIDDIN

She’rni YouTubeda tinglash

Добавить комментарий

Ваш e-mail не будет опубликован.