Behzod Fazliddin. “Kutmagan kunlarim, kutgan kunlarim” kitobidan she’rlar

***
Ташқарига чиқдим. Юрагим қўлда.
(Бутун бир кўчани ёритарми шам!..)
Бўлиши мумкин-ку худди шу йўлда
Умрида ёруғлик кўрмаган одам.

Kutmagan kunlarim, kutgan kunlarim_12008 йил 24 сентябр

УЙҒОНИШ

Кўзларимдан оловлар сачрар,
Қафасдаги шердай оғриндим.
Ҳувиллаган одамзор ичра,
Ҳаёт, Сени жуда соғиндим!

Кундалигим бир хил: уй, йўл, иш…
Қаноти йўқ қушга ўхшайман.
Ташвишларнинг ортида ташвиш…
Бу туришда қачон яшайман?

Қайда эшик очдим ғавғога?
Йўл бошида йўқотдим йўлни.
Оз бўлса ҳам тоза ҳавога
Олиб чиққим келар Кўнгилни.

Ёниб кетгим келади бирдан,
Адо қилди тунга шериклик.
Некбин-некбин нигоҳлар билан
Бугун сенга зорман, Тириклик!..

Юрагимда орзугул унар,
Умид тинмай қилар қўнғироқ.
Борган сари кўзларим тинар –
Борган сари Қуёш яқинроқ…

2008 йил 3 июл

УЗУН ОРЗУ

Бирдан қанот ўсиб чиқса елкамдан,
Учсам. Ҳаммасини унутсам. Кетсам.
Асар ҳам қолмаса шум кўланкамдан,
Армон етолмаган манзилга етсам.

Қувиб тутолмаса ортимдан лаъин,
Муҳаббат ўртада бўлмаса даллол.
Худди шу энг мақбул, тўғри йўлдайин –
Учишим ҳеч кимга келмаса малол.

2008 йил, ноябр

БОЗОР

Бугун ҳам пул эмас, Нур излаб чиқдим,
Нигоҳларим тоза – кўзимда кир йўқ.
Яна назари оч тўпга йўлиқдим,
Одамман деган кўп, юзида нур йўқ.

Қандай юрак очай юраксизларга,
Наҳот шуларни деб тўкмоқчиман тер?
Ёрдам бергим келар маҳбус сўзларга,
Гаплар осмондадир, пойгакларда Шеър.

Яшаш ҳадисини билмасман, балки,
Инсонлик илмидан олурман таълим.
Ҳалолликдан сабоқ берарми ёки
Ўзи амал қилмас Ҳаётмуаллим?

Тошларни чайнашга темир тишим бор,
Чўкиб кетмасликка топарман қудрат.
Меншунослар билан нима ишим бор,
Бу йўлдан кўз юмиб ўтгум йўқ фақат…

2008 йил 25 июл

***
Нега асли гўзал эмас гўзаллик?
Вафосиз йилларда бор менинг қасдим.
Ҳаммамизга тақдир номукаммаллик,
Бутун бўлганимда одам бўлмасдим.

Феълимдан ўпкалаб борар виждоним,
Кўзи очиқ кунлар мендан норози.
Ҳамон томиримга сиғмайди қоним,
Ўртада овора ҳаёт – тарози.

Гоҳида ҳақиқат билан қовушмас –
Сўзларимдан қўрқиб кетаман бирдан.
Ё учиб кетмайди, ё ерга тушмас,
Яшаб бўлмайди-да бу юрак билан!

2008 йил, май – июл

ЖАВОБ

Мени тушунмади тушунганларим,
Уларни тингладим, ўзимни тийдим.
Ишонмай қийнади ишонганларим,
Митти озорларни кечирдим-қўйдим.

Ёт сўзга беркитдим қулоқларимни,
Ҳақгўй кўзларимни атадим ғаним.
Шамоли ўчирди чироқларимни,
Мендан кечиб кетди кечмаганларим.

Дўстлар, дўстларимга айтинг, шошмасин,
Арзонга учмасин сотмоқчи бўлса.
Хиёнатида ҳам майдалашмасин,
Каттароқ тош отсин отмоқчи бўлса!

Kutmagan kunlarim, kutgan kunlarim_2

Сўраётганлар учун. Китобларимиз дўконларга чиқарилмаган. Мана бу рақамга (код билан) +99894 4243311 телефон қилиб, сотиб олишингиз мумкин. Манзил: Метронинг “Пахтакор” бекати яқинидаги Адабиёт музейи рўпарасида.

2008 йил, май

***
Шу бир парча Қуёш. Тупроқ. Ҳаво. Сув.
Яна нима керак бахтли бўлгани?
Нега бунча катта кетади Орзу?
Вақтнинг имкони йўқ қулоқ солгани.

Қанотлари ёниб ўйнар капалак,
Муваққат гўзаллик кун ўтмай бежон.
Юрак пештоқида ҳислар камалак,
Эрта-индин бошқа туйғулар меҳмон.

Мавҳум бўшлиқларга узанган қўллар,
Сароб сарҳадида кўринмас охир.
Зардоб йиғиб борар мажруҳ кўнгиллар,
Аҳволи оғирдир, аҳволи оғир.

Балки, шу ташвишда кексайди Очун…
Ҳассаси неча бор йўқолар кўрнинг?
Буюк қарзимизни эслатиш учун
Силкиниб қўйгани етмасми Ернинг?

2008 йил, сентябр

***
Қолган чақаларни эслагим йўқдир –
Чироқ бўлолмайди ортимда, ўлсам.
Фақат нур сўрадим, фақат нур йиғдим,
Фақат меҳр олдим, қарз олган бўлсам.

2010 йил 4 август

***
Қош қорайди, ўйчан қисқарди кунлар,
Тағин не ташвишда кўнгли юпунлар?
Ҳали кул остида мудрар учқунлар,
Кутинг…

Бирдай ўтди ойнинг икки ўн беши,
Кечанинг бугунга ўтмади тиши,
Азалнинг иши бу, абаднинг иши,
Кутинг…

Севмаса севмасин сиз якто билган,
Келмаса келмасин сизни қон қилган,
Кутган ҳам ҳақ эрур, ҳақдир кутилган,
Кутинг…

Ким кимни ўчирди хотирасидан,
Ким четлашди ишонч доирасидан,
Кимдир боқар кўнгил ойинасидан,
Кутинг…

Бу асрий лаҳзалар сиғмайди сўзга,
Севги бир шарпадир, кўринмас кўзга,
Яхши биласиз-ку, чора йўқ ўзга,
Кутинг…

2009 йил 19 ноябр

ДОВОН

Шу халқ ўссин, шу юрт кўкарсин,
Изга тушиб кетар қолгани.
Бошин мангу баланд кўтарсин,
Олтин бўлсин тош деб олгани.

Омон ўтди йиллар қаҳридан,
Туришлари мардона бўлди.
Ғаним эриб кетди меҳридан,
Оқибати афсона бўлди.

Бек боласин қадами шахдам,
Бағри бутун, илиги тўла.
Гижинглаган тойчоқлари ҳам
Ёв дилига солар ғулғула.

Эндигина тонглар отганда
Парчаланмас азалий тоқат.
У кунларга қиёс этганда,
Бу кунларнинг заҳмати – роҳат.

Юракларда бирдамлашайлик,
Суягани етар қудрати.
Ўзимиздан баланд яшайлик,
Шу юрт ҳаққи, шу халқ ҳурмати.

2009 йил 1 сентябр

ЎҒИЛ

Дада, далангизга дард сочиб келдим,
Яна машаққату заҳматлар Сизга.
Белингиз оғриди, мен қочиб келдим,
Қачон олиб бердим раҳматлар Сизга?

Ая, соғинчингиз сочи оқарди,
Бормадим – кўпайиб кетди тўйларим.
Шу ёшимда фақат севиш ёқарди,
Сиздан кўра кўпроқ уни ўйладим.

Бошдан нима ўтди – билдирганим йўқ,
Кимдир тўкаверди нур изларимга.
Ўзимни-ку хафа қилдирганим йўқ,
Озор бериб қўйдим азизларимга.

Майсалар, парёстиқ бўлинг, бош қўйса,
Чинорлар, Отамнинг ёнида юринг.
Боласини ўйлаб юраги куйса,
Аччиққина қилиб чой дамлаб беринг.

Бу ташвишлар билан бўлмайди қариб,
Мени кутиш учун келган оламга.
Қўллари толмасин челак кўтариб,
Булутлар, сув ташиб туринг Онамга.

Дада, дардингизга бошман, биламан,
Ая, тушларингиз бир кун келар ўнг.
Ҳали юзингизни ёруғ қиламан,
Одамшоир бўлиб борганимдан сўнг.

2008 йил 7 сентябр

ЁЛҒОН

Илож йўқ, бошқа бир йўли йўқ,
Рост гапни ичимда асрайман.
Кўнглимнинг кўнглини қилиб тўқ,
Сен буюк бахши, деб алдайман.

Кўчаси чанг қилди эгнимни,
Шу гаплар, оҳ, менинг тенгимми!
Умримга доғ сочган севгимни
Ҳаётим нақши, деб алдайман.

Ўзимга тинмай чоҳ қазарман,
Сал қолса, ақлимдан озарман,
Шу экан аввалу азалдан
Дунёнинг иши, деб алдайман.

«Аҳволинг тузукми, той болам,
Шоирим – орзуга бой болам».
Дардимни билмайсиз, жон онам –
Ҳаммаси яхши, деб алдайман.

2009 йил 30 – 31 июл

***
Онамнинг онаси ўтди, водариғ,
Боладай ичикар шўрлик ҳар куни.
Оҳ, билмай қолибман, сезмай қолибман
Онам ҳам мен каби бола эканин.

2010 йил 26 октябр

***
Гул каби сочилди мен гул тутганлар,
Менга кўз тикканлар ўйларимда йўқ.
Мен юзга гардини тавоф қилганлар
Кўнглимнинг кўксига санчиб кетди ўқ.
Гул каби сочилди мен гул тутганлар.

Изимга зорларни зор этдим баттар –
Кўксимдан музларни аритмадилар.
Ҳеч қўрқмай умримни ҳадя этганлар
Бир бор тушларига арзитмадилар.
Изимга зорларни зор этдим баттар.

Ким эдим?.. Нимага айландим бугун?
Саробга интилган дунёпарастман.
Қўл етмас юлдузман бировлар учун,
Севгимнинг қошида хасча эмасман.
Ким эдим?.. Нимага айландим бугун?

2009 йил 15 декабр

***
Армонқизнинг кўзи баттар сузуклашди,
Шеърим ўқиб кимнинг ҳоли тузуклашди?
Қалам тутиб қўлим фақат нозиклашди –
Уйда ўтин ёрганларим яхши эди.

Дил безиллар бу бемаврид шамоллардан,
Саволлардан қочиб бўлмас, саволлардан,
Чарчадим-ай оғир-оғир хаёллардан –
Кетмон чопиб ҳорганларим яхши эди.

Ўйлайверсанг ўйдунёнинг ўйи битмас,
Қўли узун ташвишларнинг тўйи битмас,
Унда бобом бошлаб кетган уйи битмас –
Қишлоқда лой қорганларим яхши эди.

Тутам умрим тўлиб борар туманларга,
Ёмонларга ўлим йўқми, ёмонларга,
Ўзим билан борса келмас томонларга,
Худо ҳаққи, борганларим яхши эди…

2011 йил, июл

ОЧИЛМАГАН МАКТУБ

Ҳаммасини кўриб, билиб турибсиз –
Чидаб бўлмайдиган феъл-атворим йўқ.
Сал елкамни қисиб ўтсам, тийиқсиз –
Кесаклар бирлашиб дўқ уради, дўқ.

Мендан нима кетди – қўлимдан келар
Замонсоз юзларга нур сўраб яшаш.
Ҳар махлуқ устимдан кулмоқчи бўлар,
Баъзан оғир ботар Одамга ўхшаш.

Омад ҳам беғараз йўқламас, ёҳу,
Билиб туриб атай бой бердим нақдни.
Керагидан кўпроқ имкон берди-ю,
Ҳеч раво кўрмади энг зарур Бахтни.

Ўзимга ўзимни обдон талатиб,
Томошаталаблар ўйин кутдилар.
Аҳёнда бир қошиқ асал ялатиб,
Ортидан косалаб оғу тутдилар.

Билмайман, не сабаб омондир бошим,
Нега тарс ёрилиб кетмайди юрак?
Кўзимда тош каби қотади ёшим,
Дардимни ололмай сўзлар жонсарак.

Биласиз, бурнимнинг учида жаҳлим,
Ҳеч эплай олмадим ишонтиришни.
Тушунгим келади, етмайди ақлим
Сиз ҳам талаб қилманг тушунтиришни.

2009 йил, октябр

МУСОФИР

Шеърларимнинг сочлари оппоқ,
Ўйчан сўзлар юзида ажин.
Боққин ахир, Онажон, бир боқ,
Ўғлинг нега бунчалар ғамгин?!

Балки, жуда эрта улғайди
Юрагимда гуллаб ётган дард.
Кўзларимда тунлар ухлайди,
Ҳалқа-ҳалқа ёшларимни арт.

Кечагина подшодай эдим,
Атрофимда минглар парвона.
Баридан воз кечиб мен энди
Бир сўққабош далли-девона.

Кун қариди, совиди чойинг,
Пахта гулли пиёланг маъюс.
Йиғмай менга тўшаган жойинг,
Дарвозадан ҳатлаб ўтди Куз.

Не кўйларга солмади Орзу…
Ногоҳ учиб борсам қошингга.
Оғушингга гўдакдай ол-у,
Меҳрлар бер мен бебошингга.

Ҳали жуда ёшсан, чироғим,
Армон сени йўқламайди, де.
Эркалаб айт: Ўйинқароғим,
Ўғил бола йиғламайди, де…

Дунё ҳақда ортиқ билгим йўқ,
Ҳар не дедим, барчаси – бекор.
Шоҳ бўлгим йўқ, шоир бўлгим йўқ,
Бугун фақат боланг бўлгим бор.

2010 йил 14 сентябр

***  
Ҳали дунё сутдай оқ эди,
Боғлар яшил, осмон ложувард.
Қуёш ерга яқинроқ эди,
Ой юзида кўринмасди гард.

Тебранарди майсалар сокин,
Кўкдан ёғиб майин наволар.
Борлиқ узра Бахт эди ҳоким,
Жонга ҳузур тоза ҳаволар!..

Сезмай қолдим, қалб қандай қотди,
Қачон армон ёзолди куртак?
Тушларим ҳам ўзгариб кетди,
Энди бари олис бир эртак.

Қани кунлар – менга аталган,
Лойларгами ё ботиб қўйдим?
Ҳар заррадан чирой ахтарган
Кўзларимни йўқотиб қўйдим…

2010 йил, июн

ЙЎҚЛОВ

Сабоғи тугамас мактабдир Ҳаёт,
Баъзида танаффус – ўйнаб-кулгани.
Кеча парталарда Дийдор эди шод…
Ҳамма тарқаб кетди Одам бўлгани.

Бир куни йўқ эдик, бирда бор эдик,
Тинмади Орзунинг хархашалари.
Жаннатда юргандай бахтиёр эдик
Бир ота-онанинг зумрашалари…

Қанча ёруғ бўлди умр – дарсхонам,
Билган-билмаганим шундан ҳам маълум.
Муаллим – Руҳимни уйғотган Онам,
Фарзанд ажратмаган Отам – Муаллим.

Сўз бўлиб тилидан савоблар учган,
Икки олам аро қисмати – эъзоз.
Ким бўлиб борсам ҳам бағрини очган –
Келдим. Ассалому алайкум, Устоз!

2008 йил, сентябр

***
Бу қаро дард ёпишди қайдан,
Оппоқ ғамларимни соғиндим.
Кетгим келар ғурбатсаройдан,
Покроқ дамларимни соғиндим.

Бардош оти ҳансираб борар,
Вужуд не деб алжираб борар?
Қароғларим қовжираб борар,
Чашми намларимни соғиндим.

Жон ипидан оташ яратган,
Ўзи нураб зиё таратган,
Довулларни эсанкиратган –
Ўчмас шамларимни соғиндим.

Хилқат борми ундан нафисроқ,
Муҳаббатга бир оз хасисроқ,
Жондан яқин, жондан азизроқ
Аллакимларимни соғиндим.

2010 йил, феврал

***
Бошингизга Қуёш тож бўлсин, Ота,
Умрим қўлингизда ёруғ юлдуздир.
Баландроқ кўтаринг – чарақлаб кетай,
Мени ўртаётган чўнг азоб Сўздир.

Кўнглимда адашдим, ақлимда шошдим,
Дунё биёбонми тентирайдиган?
Жисмимда қайнадим, руҳимда тошдим,
Ҳеч вақо қолмади интиладиган.

Она, аллангизни айтинг қайтадан,
Навоси севгимга севгилар қўшсин.
Ишончлар уйғонсин, ёнсин жону тан,
Муҳаббат қудрати қонимда жўшсин.

Ахир бошидаёқ юзни терс бурдим,
Бу кўча арзимас гангиб кетгани.
Дарё-дарё бўлди чашмаи зардим,
Денгиз йўқ, бағрига сингиб кетгани.

Ой билан аҳд-паймон қилдим ойдинда,
Бағримни суғордим кўз ёшим билан.
Ақлли деворлар турар олдинда,
Қаёққа бораман бир бошим билан?

Илдизларим, мени маҳкамроқ тутинг,
Учиш пайти келса, ўзим айтаман.
Фақат сиз тоқатда мендан-да ўтинг,
Дунёни уйғотар сўзим айтаман.

2009 йил 27 май

***
…чунки кўп нарсадан кўнглимни уздим,
чунки ҳафсаламни пир қилди ҳаёт.
чунки билиб-билмай ниятни буздим,
чунки еру кўкдан бўлмади нажот;

чунки ўзим билан келишолмадик,
жиндаккина ақлим эгмади бўйин.
имкон ила вақтни бўлишолмадик,
чунки ҳаммасининг мақсади – ўйин;

чунки изғиб юрар бунда қора руҳ,
баттар авж олдириб ҳазин оташни.
этимни чимчилар совуқ бир андуҳ,
чунки истамадим осон яшашни…

чунки…

2009 йил 10 декабр

ҲАР КУН

Шу лаҳзадан яшай бошлайман, дейман,
Ичимдаги итнинг қулоқлари динг.
Ахир алам қилар, кап-катта одам
Бир гугурт чўпича тегмаса нафинг.

Режаларим битмас, ишларим чала,
Билмаганга ҳазил, билганларга чин –
Ё йўлда машина бузилиб қолар,
Ёинки тугаган бўлади бензин.

Ҳар сафар, ҳар куни, ҳар доим шу ҳол:
Куттириб вақт ўтар, кутиб вақт ўтар.
Ёнимдаги дўстга ёрилиб кўрсам,
Шўрликнинг аҳволи мендан бешбадтар.

Бир лаҳзадан кейин борманми, йўқми,
Сафар олислигин эслатади йўл.
Қурол-яроғимни тайёрлаб турай,
Бу гал, ҳеч бўлмаса, эшик қоқиб кел.

2008 йил 17 ноябр

ОСМОНДА ЁЗИЛГАН ШЕЪР

Еру осмон ораси – ҳаёт,
Сафаримнинг номи – алданиш.
Бунда менга ҳамма нарса ёт,
Бунда менга ҳаммаси таниш.

Ёпилмоқда илинж дарчаси,
Кўчишлардан бўлганман ҳориб.
Унутмоқчи эдим барчасин
Пўлат лочин бағрига кириб.

Бир ён булут, бир томон туман,
Қайга олиб қочай кўзимни?
Ҳар йўловчи нигоҳи билан
Тафтиш этдим яна ўзимни.

Учган сайин улғаяр ғуссам,
Хавотирнинг кўзлари лўқдир.
Бир он мизғиб олайин десам,
Осмонда ҳам ҳаловат йўқдир.

Тошкент – Москва – Берлин

2009 йил, сентябр

МАНГУ ЛАҲЗА

Шу лаҳза кетмаса, шу лаҳза қолса,
Ёки бирга кетсам ўзим у билан.
Йўқолса, йўқолса, йўқлик йўқолса,
Мавҳумлик кўйида бўларим бўлган.

Манзилга элтолмай мулзамдир йўллар,
На ному, на нишон, кездим бетиним.
Эслашга арзимас чалажон йиллар,
Шу лаҳза қошида топсайдим қўним…

2009 йил, 1 феврал

***
Бир оз шошманг, Вақт жаноблари,
Икки оғиз гапим бор сизга.
Мангумиди изтироблари –
Отамерос кечикиш бизга.

Ҳар ҳикмати бир дунё Эгам
Қадрингизни тенгсиз яратмиш.
Замон, макон жиловини ҳам
Ўзидан сўнг сизга қаратмиш.

Бир чиройли ўйнаб юргандим,
Болаларча, келтирмай ғашни.
Билмай қолдим, қачон ўргандим
Сизга тақлид қилиб яшашни.

Не азобни олдим бўйнимга,
Кунлар бошдан-охир эговли.
Бўй бермайди ўйлар ўйимга,
Ҳар қадамим ҳануз ўлчовли.

Ортингиздан чопганим-чопган,
Эртакмикан сизга тенг келиш.
Пушаймонга ким малҳам топган,
Тушимга ҳам кирмас енгилиш.

Бир кун ногоҳ йўқолиб қолсам,
Ҳайрон бўлманг излаб изларим.
Сизни катта йўлда хотиржам
Кутиб олар ёруғ сўзларим.

2009 йил 2 ноябр

***
Ортиқ ушлаб турмай, очиқ осмонга
Қўйиб юбораман юракни – шарни.
Аста сингиб кетар мовий майдонга
Паналаб ўтгандай машъум хатарни.

Ҳеч ким ниқтамаса, ҳеч зоғ тегмаса,
Боладай ўйноқлар завққа берилиб.
Қўрқаман, кўкда ҳам озор чекмаса,
Ёрилиб кетмаса эди, ёрилиб…

2009 йил

***
Ҳар куни кўксимда кўпкари,
Олишар чавандоз туйғулар –
Ғирромга ўрганган кўплари.

Уялиб кетаман ўзимдан,
Тағинам гуноҳнинг ҳиди йўқ,
Кун қочиб боради изимдан.

Улуғ бир хатони бошладим,
Қаламнинг юргиси келмайди,
Шўрликни… синдириб ташладим…

2009 йил 7 март

***
Тонгдан эшигимни чертади ташвиш,
Ичкарига олиб кирмасам, кўнмас.
Ишда қандай ғалва қайраб турар тиш,
Оёқ тортмайди-ю, бормасам бўлмас.

Йўлга отланаман, нонушта чала,
Муҳими – гупиллаб турибди юрак.
Кутишга заррача йўқдир ҳафсала,
(Барибир, автобус кутишим керак.)

Ишхонада ўша эски томоша,
Ҳар кимнинг айтгани юзаки ўлан.
Бахтиёр кўрсатгум ўзни ҳамиша
Мийиқдаги сохта табассум билан.

Ахир ёлғон бўлса, бўлар-да шунча,
Не-не алдовларга, балки, соқийман.
То устимдан кулиб қуёш ботгунча,
Нуқул эртак ўқиб, эртак тўқийман…

Нега ҳамма нарса инсонга соя?
Ҳар қулайлик дилни ғамга ўрайди.
Борсам, ўтганмисан рўйхатдан, дея
Бахт ҳам юзи совуқ, ҳужжат сўрайди.

Саволлар тушда ҳам тинч қўймас нечун?
Алаҳсираб тунни тонгга улайман.
Эртага эркинроқ яшашим учун
Тағин қанча жойга солиқ тўлайман?

Яхши беркилганми жўмракнинг оғзи,
Қўшнининг уйига ўтмабдими сув?
Кейин шундай ғалат хаёллар баҳси,
Ҳозир ҳаётимнинг бор маъноси – шу…

2010 йил 26 июн

***
Не ҳикмат дилингнинг яролиғида,
Беадоғ тахайюл йўлига жим боқ.
Кутиш ва куттириш оралиғида
Йигирма йил ўтди – қолгани жумбоқ.

Нимадир етмади, яна, кимдир кам,
Балки, омадсизлик эди омадим.
Улгурса бўларди тозаришга ҳам,
Яшаш не – билдим-у, яшай олмадим.

Гоҳи уялтириб, гоҳи уялиб
Бирма-бир жон берди дақиқаларим.
Шунчалар ишондим, келдим суяниб –
Ҳаққа элтгаймикан ҳақиқатларим?

2009 йил 29 апрел

***
Ғам миршаби ҳар ерда нозир,
Кўнгил тортиб борар жойим йўқ.
Шуни ҳам кўп кўрмагин, ҳозир –
Вақтдан бўлак ҳеч вақойим йўқ.

2010 йил 1 август

АНГЛАШ

Йилларим жам бўлиб Кунга айланди,
Ёлғонлар йиғилиб чинга айланди.
Бутунлик касб этди сочилган заррам,
Менларим бирлашиб МЕНга айланди.

2008 йил, сентябр

ЎКИНЧ

Кечаги ҳаётим ёруғроқ эди,
Юрган йўлим чаман, боғу роғ эди,
Кўнглим осмон эди, кўнглим тоғ эди,
Воҳ, қандай кунларга йўл бериб қўйдим.

Энг нодир ҳисларга назар ташламай,
Наҳот, кўклам кетар бизни хушламай,
Кўксимда чечаклар яшнаб-яшнамай,
Мезоннинг қўлига қўл бериб қўйдим.

Қанча тентирасам, қанча югурсам,
Ортимдан боладай эргашар ғуссам,
Энди ўз тилимни топарман, десам,
Армон шевасига тил бериб қўйдим.

Борини унутиб суйган ким мендек,
Надомат тўнини кийган ким мендек,
Бедиллар дастидан тўйган ким мендек,
Найлайки, дилсизга дил бериб қўйдим.

2010 йил 3 – 4 сентябр

ЙИГИРМА ЕТТИНЧИ БЕКАТ

Китобдай ўзимни варақлайман жим,
Нимагадир ташна, негадир муштоқ.
Қайси воқеликдан рангиндир умрим,
Қай ўринда дардим ишонарлироқ?

Сийқа сакталиклар этмасми мулзам,
Бахайр бўлармикан руҳий сафарим?
Биров ўқиганми мендан олдин ҳам –
Мунча ҳилвирайди саҳифаларим?!

Мана бу қўл изи, мана бу доғлар
Қайдан пайдо бўлди бугун бағримда?
Оҳ, наҳот, тарихга кўчди у чоғлар!
Хотирот ҳиди бор ҳар бир ҳарфимда.

Мавҳум эҳтирослар – бежиз ёнишлар,
Таъкидлар – қувончим ва ё оҳимдир.
Кўп нуқталар – узоқ иккиланишлар,
Сўроқлар – гумону иштибоҳимдир.

Нелардан сўйлайди бу сўзлар сози,
Зиммасига қандай аъмол ортилган?
Ўта таъсирчанми, мақбулми, баъзи –
Мисралар остига чизиқ тортилган…

Шукур, зерикмадим ўзимдан бир зум,
Ўкиндим. Қувондим. Ўртандим. Куйдим.
Холис баҳо берар дедим-у, ўзим –
Келажак қўлига топшириб қўйдим…

2010 йил 5 сентябр

***
то ҳануз жумбоққа ўхшайди умрим,
то ҳануз улгуриб бўлмас яшашга,
то ҳануз кўзимда эзғиланар қум,
то ҳануз нўноқман ўзни асрашга.

наҳотки ҳаёт шу, тириклик шудир,
наҳотки умрбод ўртанмак – қисмат?
наҳотки мўъжиза бўлмайди содир,
наҳотки тоабад чўзилгай ҳижрат?

билмайман, бу бошда яна не савдо,
билмайман, не жиндир жонда рақс тушган.
билмайман, билишдан надир муддао,
билмайман, руҳ қуши қаёққа учган.

то ҳануз…
наҳотки…
билмайман…

2012 йил 12 январ

***
Кўксим узра ҳаво етиб улгурмайди,
Югураман, югураман – буюрмайди.
Ҳаловатдан масрур диллар ибрат сўйлар:
Қаноатни тутган ортиқ югурмайди.

Тенглашолмай тарихга не номлар ўчди,
Енгил елга енгилди-ю шамлар ўчди.
Жондан азиз номин ёдга олган эдим,
Юрагимнинг хотиридан ғамлар ўчди.

Ўтган кунлар ўтиб бўлди – ўкинмайман,
Тўкилсам ҳам ёнингизда тўкилмайман.
Ҳар найзаси юрагимни тоблаб борар,
Эгилмайман, букилмайман, чекинмайман!

2009 йил 26 апрел

НОМА

Настарин гуллари муштоқ хатимга…
Ёдингиз бағрида тунларим оқдир.
Қайси хизматимга, қай заҳматимга
Мени зулфингизга боғламиш тақдир?!

Ғуборлар текизмай хаёлингизга,
Ҳаёни нарига қувмай севасиз.
Юрагимни тугиб рўмолингизга,
Сиз айтмай севасиз, “севмай” севасиз.

Бемаврид хатарни пайқаган қушдай,
Қаёққа беркинди туйғулар – инжа?
Хунобдир рўёбга чиқмаган тушдай,
Гумон кўксингизга сололмас панжа.

Кўнгил қўрғонига етказмас шикаст,
Парволар қилмайсиз ёмғирга, дўлга.
Куйдириб кетолмас – тафти жуда паст,
Сув сепиб қўясиз ҳижронли йўлга.

Улар севгим каби шаффоф, бетамаъ,
Юзга солмас олис гуноҳларимни –
Боғимга бегона хазон, деб яна
Супуриб юборманг нигоҳларимни…

2008 йил, октябр

***
Юракка айландим бошдан то охир –
Кўзим юрак бўлди, вужудим юрак.
Сурату сийратда улуғ Ишқ зоҳир,
Қолгани афсона, қолгани эртак.

Қошимда япроқдай титради Дунё,
Қўлларим чўзаман – узилгиси йўқ.
Хазонга дўнишни истамайди, ё
Бедиллар пойида эзилгиси йўқ.

Юракка айланиб сирлашар оқшом,
Тим қора денгизда Оймома сузар.
Тошиб турар Офтоб – ёғду тўла жом,
Юракка ўралган ҳар неки – гўзал!

Коинот самовий зийнат уфурар,
Яна кўзларимда жилваланар Нур.
Юрак эканимни эслатиб турар,
Шу ёруғ Дунёнинг борига шукур.

Тобора маҳкамроқ юмаман кўзни,
Барча дилсизликка бергандай барҳам.
Менинг юрагимга жо қилиб ўзни,
Юракка айланиб бормоқда олам…

2010 йил 2 август

***  
Севги ёмон, севги дилозор,
Бор-будимдан мени айирди.
Андишасиз меҳмондай беор
Дил уйига сўроқсиз кирди.

Чеҳрасида жозиб табассум,
Бир чиройли ҳислардан ийдим.
Беихтиёр – билмасдан ўзим
Уй тўрига ўтқизиб қўйдим.

Эъзозладим, бағримни очдим,
Хизматида бўлдим эрта-кеч.
Дастурхонга боримни сочдим,
Шунданмикан, кетгиси йўқ ҳеч.

Кундан-кунга бўлди яқинроқ,
(Ё мезбонни ёқтириб қолди.)
Хаёлимга ташлади қармоқ,
Мени буткул оғдириб олди.

Ғуруримга кейин солди чанг,
Ўзлаштирди ичу сиртимни.
Ҳеч қанақа қўшинсиз – бежанг
Ишғол этди Кўнгил юртимни…

Энди нажот сўрайман кимдан?
Ё бўшатгим келмас майдонни.
Ҳайдолмайман ҳануз умримдан
Севги отли гўзал шайтонни…

2008 йил 26 июл

САС

Соя солмиш сабримга Соғинч,
Саратонда сенсиз совқотдим.
Соҳилларда сарғайди севинч,
Сирларимни сўзларга сотдим.

Сочинг силаб саболар сархуш,
Сезмайсанми, сездирмайсанми?
Савол сонсиз, ситамлар серпушт,
Севмайсанми, севдирмайсанми?..

2010 йил

КЎНГИЛ

Ҳеч бўлмаса, хафа бўлдим, де,
Ё бўлмаса, бирор сўз айт, ҳой!
Фақат бундай қарама менга,
Кўзим тегиб синиб қолган Ой.

2008 йил, сентябр

***  
Мен – ўзини сотиб қўйган қул,
Хаёлимга занжир солиб бер.
Ўзингдан ўзгадан озод қил,
Юрагимни ундан олиб бер.

Осмон эдим, қандай эгилдим,
Қаро ерга дондай тўкилдим,
Наҳот шунча осон енгилдим,
Юрагимни ундан олиб бер.

Қандай ишқ бу – йўлдан чалғитса,
Ўтдан олиб ўтга ирғитса,
Паришонман, яна тўзғитса…
Юрагимни ундан олиб бер.

Бир нигоҳга мендай зормас у,
Тоза дардга интизормас у,
Мени Сенга олиб бормас у,
Юрагимни Гулдан олиб бер.

2008 йил, май – июн

ҒАЛАТИ ҲОББИ

Мен унинг қалбига кирмадим ўйнаб,
Боқсам, кўзларидан ҳасрат ёғарди.
У лаззат оларди ўзини қийнаб –
Мендан хафа бўлиш унга ёқарди.

2008 йил, октябр

***  
Шу кеча эртагин тугатмаса қор,
Сен совуқ қотмасанг – уйга кирмасак,
Оқ, оппоқдан бўлак рангни билмасак,
Майлига, кечикса кечиксин баҳор.

Эртани ўйлама, чўчима сира,
Айни дам йиқилиб тушмасанг бўлди,
Қўлимдан маҳкамроқ ушласанг бўлди,
Ҳар босган изимиз – биллур хотира.

Кумуш осмон гулдай сочар меҳрини,
Оҳиста чекиниб тун пардалари –
Юзингда порласа ой парчалари,
Қорлар ўчиролмас севгим муҳрини.

2008 йил 29 декабр

***
Бежиз ёмғир бўлганим йўқ-да,
Томчисида яна минг томчи.
Бир он ғубор ютишдан тўхта,
Дунё деган кекса алдамчи.

Кечаги кун – ёруғ хотира,
Боқий бўлар бугунги кунлар.
Ҳали ҳислар бордир бокира,
Куйла, куйла, қалб бўлиб куйла.

Тўкилгудай туйғулар тошар,
Тўлиб борар муҳаббат жоми.
Тазаррулар қилсак ярашар –
Бизникидир поклик айёми.

Бежиз ёмғир бўлмадим ахир,
Дил ойнасин бир артгим келди.
Англамоқчи бўлдим ненидир,
Ниманидир эслатгим келди…

2011 йил 4 феврал

***
Бундан буёғига бодомлар бедор,
Бундан буёғига бутоқлар бежо.
Балоғат бўйлаган боғларда баҳор,
Бунчалар беқиёс, бунчалар барно!

Кела қол, новдалар қўймасин гуллаб,
Яшнамоқ фаслини ўзинг бошлаб бер.
Қадаминг тафтидан ёнсин ловуллаб,
Интизор йўлларга нигоҳ ташлаб бер.

Бежиз лаб очишга ошиқма бир дам,
Ҳали фурсат бордир хайру хўшларга;
Гулларга сабоқ бер вафо илмидан,
Муҳаббат қўшиғин ўргат қушларга.

Бўйларинг атрига ғунчалар хумор,
Нафасингни сезиб тонглар жилмайди.
Оний табассуминг каби бетакрор –
Бу баҳор, бу баҳор қайтиб келмайди!

Кўзларим қаърига кўмилар олам,
Дилни даста-даста ашъор қилган – Сен.
Сен каби яшнашни билмайди кўклам,
Кел энди, баҳорни баҳор қилган – Сен.

2010 йил, март – август

ТАСКИНЛАР

Яхшиям, сўлишин билмайди гуллар,
Ҳали не бўлишин билмайди гуллар.
Бўлмаса, очилмай қўярди.

Хайрият, ҳозирча билмас барини –
Ҳаётнинг хурмача ҳунарларини.
Йўқса, дил сочилмай қўярди.

Минг шукур, сўзларни бўлмайди алдаб,
Акс ҳолда, шеъримиз фитнакор атаб,
Ҳақ бизни кечирмай қўярди.

2011 йил 16 ноябр

***
Ҳар кимга ҳам насиб этмайдиган Бахт
Зарра нигоҳимга бўлганида зор,
Жавобимни кутиб пойлаб турса Вақт,
Барини рад этсам такрор ва такрор;

Мазлум кўзёшига қоқилмай деб бот,
Дорда юрган каби ҳушёр қадам-ла –
Қўлларимда лангар, сўрасам нажот,
Саодат тонгига элтса бу ғамлар.

Ногаҳон Руҳ қуши тилга кирганда,
Асли ким эканим туйқус англадим.
Сип-силлиқ кўчалар чорлаб турганда,
Мен шу бахтиқаро йўлни танладим.

Нечун чорлайверар сир тўла само?
Балки, кимдир бизга илҳақ кўкда ҳам.
Учиб кетгим келар юлдуздай, аммо
Ерда Одам танқис, бунда Одам кам.

Ҳамон имлайверар юлдузлар зимдан
Тангрининг беминнат назари ила –
Оёқ узгим келмас мушфиқ Заминдан,
Видолашгим йўқдир майсалар билан!

2011 йил 7 – 8 апрел

***
Ишингиз бўлмаса чекишдан бўлак,
Керагидан ортиқ бўлса вақтингиз.
Ҳавони заҳарлаб қилсангиз эрмак,
Ҳатто ўзингизга келмай раҳмингиз.

Қочинг, халал берманг, бўшатинг йўлни,
Беҳуда бир нафас ортиқдир бу дам.
Биздайлар учун ҳам қон қилиб дилни,
Нажот сўраш учун кетмоқда Одам.

2010 йил 12 июл

***
Алам қилмай қўйди ҳеч бири,
«Чиқ» дейди-ю, ўзи чиқмас Вақт.
Мен Ҳаётни борича суйдим,
Ҳар томонда, ҳар қадамда Бахт.

Озор санчмас юракка ортиқ,
Бу гулларнинг ифори ўзга.
Кечаги жўн, совуқ одамлар
Жуда иссиқ кўринар кўзга.

Аллақачон овутиб олдим
Кўнглимни(нг) шўр кўз ёшин артиб.
Ҳаммасини кечириб бўлдим
Ўзгалару ўзимдан тортиб.

Қандай ёвуз кучлар бор бунда,
Билмаганим яхши – билмадим.
Ғўр мавсумдан розиман, шаксиз,
Хато қилиб хато қилмадим…

2009 йил, июн

ҲАЁТ

Гоҳо тоқат етмай ноз-фироғига,
Маъшуқдай астойдил бўлсам-да хафа,
Жавоблар бермасам қўнғироғига,
Кўнглимни олиш-чун уринган дафъа.
Ўзимни кўзидан йироқ тутсам ҳам,
Аччиқ-аччиқ гаплар айтиб, камига,
У ҳақда тушкунроқ байтлар битсам ҳам,
Турфа хил таъналар тиркаб номига;

Кўнглимни сўраманг, асти сўраманг,
Мен уни, барибир, яхши кўраман!

2010 йил 3 ноябр

***
Ҳар лаҳза тийилиш азобига банд,
Юрак – қафасдаги некбин орзуманд.
Зулмат мил тортишга чоғланар ҳарчанд,
Мудом шамси анвар кўзимга пайванд.

2010 йил 18 декабр

***
Чиқиб кетса эди шу иблис қондан,
Сўнг топа олмаса мангуга изим.
Бир Ҳаёт бошласам ўшал ҳур ондан,
Ўз олдимда шувут бўлмаса юзим.

Қайтадан тозарсам – севсам қайтадан,
Чалғитмаса машъум хаёллар бир зум,
Арш сари зиналар қўйсам тавбадан,
Саодат асрини эслатса умрим…

2010 йил

ТАВАЛЛО

Ҳар ким ўз қисмати қошида ёлғиз,
Гарчи атрофимда дўстлар бор – холис,
Улар уммондаги хас каби ожиз,
Ўзингдан ўзгага айтар дардим йўқ.

Оғир бу йилларнинг тоши енгилми,
Биров ечолмади тилсим севгимни,
Учратмасанг, қайдан топай тенгимни,
Ўзингдан ўзгага айтар дардим йўқ.

Умримни чўқилаб зоғлар алмашди,
Йўқолиб-йўқолмай доғлар алмашди,
Елкамдан тушолмай тоғлар алмашди,
Ўзингдан ўзгага айтар дардим йўқ.

Ўйларим кишанда, кўнглим кишанда,
Сўрадим – сўрашни қилмадим канда,
Авлиё бўлса ҳам бандаси – банда,
Ўзингдан ўзгага айтар дардим йўқ.

Савобу гуноҳда беқарордирман,
Ажаб, шу ҳолимга сервиқордирман,
Умидсизлик аро умидвордирман,
Ўзингдан ўзгага айтар дардим йўқ!

2009 йил 5 август

ҚАЙТИШ    

Тинч қўймайди саволлар – саркаш,
Кўксимга ўқ отгани-отган.
Бирор чора сўрасам дил ғаш,
Оламлари сукутга ботган.

Йиғлаб борсам, ҳўнграб чиққайлар,
Табибларим ўзимдай хаста.
Бечораҳол, маъюс боққайлар,
Ҳаммасининг кўнгли шикаста.

Кимга айтиб, кимга ёлворсам,
Ўз ғамидан ортолган ким бор?
Этагидан тутай деб борсам,
Муршидимнинг ўзи пирга зор.

Сўраб-сўраб тилим толмади,
Қани бошим тўсар чўгирма?
Мени ҳеч ким қабул қилмади,
Энди Сен ҳам юзинг ўгирма.

2009 йил 28 апрел

***
Масжидга ўхшаса эди бу дунё,
Ишонч бирлаштирса одамиятни.
Оқибат дегани бўлмаса рўё,
Ҳеч кас йўқотмаса ор, ҳамиятни…

Ҳамма тарқалмоқда дилга бериб зеб,
Яна оташ олди юракда бир Чўғ.
Меҳримни эҳсондай улашайин деб
Ташқарига чиқсам, пойабзалим йўқ.

2010 йил

***
Бардош либосининг иплари тиғдан,
Амаллаб кийдингми, ечишдан не наф?
Кўзингни яширма кўнгли мунглуғдан,
Сева олиш шараф, севилиш шараф.

Дақёнусдан қолган бу даҳри дунда
Бир янги заррадай кўзга илинсам.
Муродим гуллари очилган кунда
Не тонг, яшаш учун маҳкум қилинсам!

Сўнгги нафасгача эшиклар очиқ,
Ўз ҳолидан ўзи гумонда гумон.
Наздимда, кўрмаган бу қадар Ошиқ
Бир томчи Дийдорга ғарқ бўлган жаҳон…

2008 йил, ноябр

***
Раҳматингми, заҳматингми бу –
Адо қилдим ўзимни ўзим.
Не-не қалбга йўл кўрсатди-ю,
Ўз-ўзимга ўтмади сўзим.

Чеклаб-чеклаб чарчадим ўзни,
Текис жойдан юрмадим атай.
Менга бергин ўша бир Сўзни,
Дунёдан кенг дунё яратай.

2010 йил 1 июл

***
Раҳматига ихлос айлаб заҳмат чексанг,
Оғриқларинг ҳаловатга айлансалар.
Дил боғига алвон-алвон гуллар эксанг,
Хушбўйлари салавотга айлансалар.

Марвариддай лаҳзаларни йиққанингда,
Уфқлар сари манзур-манзур боққанингда,
Камтарликнинг чўққисига чиққанингда,
Таъзимларинг салобатга айлансалар.

Ёлғиз Унинг ёди бирла ўйга чўмсанг,
Ёлғонларни қайтиб чиқмас жойга кўмсанг,
Ором чоғи кўзни қўрқмай, қўрқмай юмсанг –
Уйқуларинг ибодатга айлансалар.

Томирингда оқар ҳаёт нашидаси,
Ҳар қадаминг – тирикликнинг қасидаси,
Бир ўзгариб ғамнок дунё харитаси,
Андуҳлари саодатга айлансалар.

Тафаккурдан қанот боғлаб кўкка учсанг,
Сўнг юракнинг суханида гавҳар сочсанг,
Жумла жаҳон бахтин сўраб кафтинг очсанг –
Дуоларинг ижобатга айлансалар…

2010 йил 11 сентябр

***
Улардан ном сўраб қанча ялиндим,
Ёддан чиқмас қилиб номлаб бер мени.
Бўлиндим, мингга, юз мингга бўлиндим,
Битта қиёфага жамлаб бер мени.

2009 йил 21 июл

***
Ҳаддан ортиғини сўрамадим-ку,
Бежиз совурмайин кўзим нурини.
Ўтиниб тиладим, аҳволим танг-у,
Фақат зарурини, энг зарурини.

Юзимгача тошиб чиқди гуноҳлар,
Ночор қочиб юрдим турфа назардан.
Улканлашиб борар кўксимда доғлар,
Безорман, ўзимдан тамом безорман!

Яшашни ўргат, эй буюк Мураббий,
Новвотга айлантир юрак шўримни.
Бутун қилиб бергин хаёллар каби
Ҳар жойга сочилиб ётган умримни…

2010 йил 10 феврал

ИБРАТ

Гадосифат бойни ҳам,
Денгиз ютган сойни ҳам,
Игна кирган жойни ҳам
Бир Зот кўриб турибди.

Эл ошаган ошларни,
Ерни ўпган бошларни,
Пинҳон-пинҳон ёшларни
Бир Зот кўриб турибди.

Ким ортимдан отмиш ўқ,
Ким соямга қилар дўқ,
Адоватим, гинам йўқ –
Бир Зот кўриб турибди.

Дилинг соғми ё бемор,
Ичинг ичида не бор,
Гарчи тўрт ёнинг девор,
Бир Зот кўриб турибди.

Парда шитирлашидан
Нега қўрқасан, эй, тан,
Пардасиз нури билан
Бир Зот кўриб турибди.

Беҳзод, гул эк изингга,
Ҳазир бўлгин сўзингга,
Ҳар не қилсанг – ўзингга,
Бир Зот кўриб турибди.

2009 йил 26 июн

***
Исён бўлиб исён эмасди бу ҳис,
Иймон бўлиб иймон эмасди бу ҳис,
Аммо сира тинчлик бермасди бу ҳис,
Паноҳингдан бошқа борар жой йўқдир.

Воҳким, маълумоти олий телбаман,
Осон енгиламан, осон енгаман,
Манов кўпикларга қандоқ сингаман,
Паноҳингдан бошқа борар жой йўқдир.

Тушуниб бўларми ҳаёт дарсини,
Адо этарманму фарзу қарзини,
Ким ғаразсиз тинглар юрак арзини,
Паноҳингдан бошқа борар жой йўқдир.

Такрор-такрор айтдим, дил ёриб айтдим,
Бош олиб кетдим-у, ёлвориб қайтдим,
Кул эт, ғазабингни келтирса байтим,
Паноҳингдан бошқа борар жой йўқдир.

Бир ёруғ дуога айланди умрим,
Нур бўлиб қошингга шайланди умрим,
Сўзингга, Ўзингга бойланди умрим,
Паноҳингдан бошқа борар жой йўқдир.

2010 йил 20 сентябр

***
Кўксим оғригани оғриган, ё Раб,
Юрак оҳ дегани оҳ деган, ё Раб,
Виждон дўқлагани дўқлаган, ё Раб,
Найлай?

Тийилмаган ҳислар, тийилган кўзлар,
Айтилмаган сўзлар, дейилган сўзлар,
Бўғзим қафасида бир булбул бўзлар,
Найлай?

Кимлар деб кимларга бошимни эгдим,
Жафолар устига жафолар чекдим,
О, ўзим ўзимнинг жонимга тегдим,
Найлай?

Олислаб боради орзу елкани,
Аламлар қилади бир хас эканинг,
Яшайман деганим – ўлдим деганим…
Найлай?!

2011 йил 16 март

***
Кечагина олам мисли жаннат эди,
Эвоҳ, нафас олишим ҳам санъат эди.
Туфроқ бўлган япроқлардан ҳикмат ўқиб,
Бошим эгиб туришларим савлат эди.

Парча-парча йиллар аро тўлғонаман,
Қачон қайта ўчмас бўлиб уйғонаман?
Не ажабким, бошқасига ройиш бермас,
Кўнглим гулин ўзимдан ҳам қизғонаман.

2011 йил

ТОҒИСТОН

Кўнглимнинг кўзида порлади ҳайрат,
Оллоҳ, бугун Cени тошда ҳам кўрдим!
Қоялар борлиққа берганда зийнат,
Булутга бошимни қўйиб улгурдим.

Кечир, тоғ қалбимни тоққа бурмабман,
Чорласа бормабман зангор кенгликлар.
Юксакка юксакдан боқиб кўрмабман,
Теграмда ялпайиб ётмиш дўнгликлар.

Келдим. Бу софликдан хижолатдаман –
Озор топмасмикан нигоҳим тушса?
Лаззатга кўмилиб тасбеҳ айтарман,
Гар обид гиёҳлар сафига қўшса.

Зилол туйғуларда кўксимни чайдим,
Вужудга шавқ берди руҳий таҳорат.
Чўққилар бошида бир ҳикмат туйдим:
Яратсанг ҳар нени тоғ каби ярат.

Фақат бир ҳадикдан хаёлим тилка,
Йўлиқмасам эди бепарволикка.
Яшаб қолай десам бу мағрур ўлка
Қабул қилармикан фуқароликка?

2009 йил 28 – 29 март

***
Шамоллар абадий, ёмғирлар мангу,
Биздан сўнг ҳам оппоқ қорлар қолади.
Шаксиз, яшайверар қувончу қайғу,
Изҳорлар, иқрорлар, зорлар қолади.

Минг йилларки, аслин ўзгартмас тоғлар,
Салобати ўша, виқори ўша.
Таровати сўнмас диловар боғлар –
Ҳануз тошқин ҳислар талпинган гўша.

Бехос такрор-такрор чорладим, чоғи,
Япроқлар тизилиб келди сўзимга.
Қобирғаси синган хазонлар оҳи
Оҳангдор ҳасратдек туюлмас кимга?

Шунчаки тақлидга ўхшарми бу ҳол –
Демангиз, бу фақат илҳом онлари.
Руҳимда яшади шундай безавол
Ҳаёт деган шеърнинг қаҳрамонлари.

Шамоллар. Ёмғирлар. Дарёлар. Тоғлар…
Азал нафасини келтиргай абад.
Япроқлари оят ўқиган боғлар…
Табиат тилида илоҳий суҳбат.

2011 йил 22 ноябр

ҚОРШЕЪР

Осмон бодроқ тўкди кун бўйи –
Борлиқ қўйни тўла оппоқ дур.
Табиатнинг бу кумуш тўйи
Бўғотларга улашар ҳузур.

Кўпни кўрган оғочлар яна
Елкасига олар бор юкни.
Ҳали давом этар тантана –
Асраш керак ҳар нозикликни

Кекса мўри зерикмас чекиб,
Лек ҳавони қилмас бемаза.
Изғириннинг қалами тегиб
Гулзор бўлиб кетди дераза.

Оққуш бўлиб қанот ёзайлик!..
Хаёлларнинг йўқдир поёни.
Ташқарига шошар гўзаллик
Шарфга ўраб олиб ҳаёни.

Поклик чулғаб борар ҳар ерни,
Оқлик инар далаю боққа.
Аёзкотиб энг дилбар шеърни
Доғ юқтирмай кўчирар оққа…

2008 йил 22 декабр

НАШИДА

Ўшанда ҳам навбаҳор эди –
Борлиқ зангор, дунё навқирон.
Куртакларга гапим бор эди,
Юрак тилга кирганда бийрон.

Яна ўрик шохлари сархуш,
Гулоб тутар нимпушти, оппоқ.
Кеча эди эгнида кумуш,
Бугун зумрад тўн киймиш чорбоғ.

Бутоқлардан мўралар умид,
Камол ваъда этар ғунчалар.
Нимагадир бўлгандай шоҳид,
Шаббода бир соҳир куй чалар.

Сочларини сувга таратиб
Ўлтирибди мажнунтол шайдо.
Ўз-ўзидан чирой яратиб
Борган сари табиат зебо.

Кўкда рангин ҳислар жамулжам,
Жилвасидан қамашади кўз.
Пучмоқдаги сўнгги қорни ҳам
Эритади ҳадемай Наврўз!

2010 йил 14 март

***
Тўрт девор ораси ҳаёт эканми!
Ёриб чиққинг келар ногоҳ куч топиб,
Ғурбат эшикларин мангуга ёпиб,
Димоғинг чоғ этар Тириклик таъми.

Сен билган дунёга ўхшамас дунё,
Ложувард самода тенгсиз тароват,
Кўклам бўлиб кезар боқий назокат.
Бу кун бор умрингга татийди гўё.

Шу қадар яқиндир висолнинг йўли,
Ҳақиқат рангига уйғундир тушлар,
Лолалар кўзингни ёндира бошлар,
Баҳорнинг оташин нигоҳи бўлиб.

2011 йил 8 март

КЎКЛАМ ҲИКМАТИ

Шунчалар ўткирми ҳақиқат – ханжар,
Энди майса униб чиққанда тошдан.
Кечагина нур деб эланган жонлар
Бугун қоча бошлар Қуёшдан.

2011 йил 24 март

АЁЗ

Аччиқ совуқ, жимирлар этинг,
(Кўпни кўпга қўшмас забунлик.)
Қотиб қолар бир зум саботинг,
Жондан ўтиб кетгач юпунлик.

Олислардан келгандинг оқиб,
Яшамоқчи эдинг одамдай.
Жовдирайсан офтобга боқиб
Бевақт гулга кирган бодомдай.

Омонатни омон еткарсанг,
Икки дунё ёруғдир юзинг.
Тўқсонини шуйтиб ўткарсанг,
Қандай бўлар аямажузи?

Ёдга тушар шамдай ҳаётинг,
Лақиллашни бас қилгинг келар.
Ё сандалда қўр бўлгинг ёки
Тарновларда осилгинг келар…

2011 йил 27 феврал

***
Суқи филни қулатар, кўз деган ёмон экан,
Ўтолмайсан баҳридан, юз деган ёмон экан.
Қандоқ қилиб тилимга энди чилвир боғлайин,
Сўз деган ёмон экан, сўз деган ёмон экан…

2008 йил, сентябр

БЕГОНАЛАР

Ёнимдаги узоқ одамлар,
Юрагимга тузоқ одамлар.

Майли эди, бўлса бегона,
Улар менга қондош, ҳамхона.

Айбим шудир, жиндай феълим чарс,
Бир қўлдан ҳам чиқар экан қарс.

Ачингандай бўларлар тағин,
Осмон менга улардан яқин.

Кўкрагимдан кўчириб музлар,
Тушунади мени юлдузлар.

Дардлашаман тун бўйи дилдан
Олис-олис яқинлар билан.

2009 йил 7 январ

***
Ёлғон, ёлғон, ёлғон ҳаммаси,
Фақат иймон, фақат иймон ҳақ.
Ҳар манзилда фано ҳамласи,
Аро йўлда жонинг муаллақ.

Қўллар қисқа, орзулар майиб,
Қонга тўймас армон ханжари.
Нечун олам борар торайиб
Ўсган сари, улғайган сари?

Парво қилма, фарёд айлама.
Кунларингни нурга қондиргин.
Чуқур кетма, ортиқ ўйлама,
Фақат ёнгин, фақат ёндиргин.

2009 йил 31 август

***
Энди қўлга олганда созим,
Оғзим куйди, синди овозим.
Аламига куйлашим лозим,
Такрор-такрор имкон сўрайман.

Ўз-ўзимга етарми кучим,
Ҳасрат ғамга бўлолмас ечим,
Гарчи мисли қиёмат ичим,
Хотиржам бир иймон сўрайман.

Кимнинг кайфи учун бу ўйин –
Мағлублари олдиндан тайин,
Ғолибларга ундан-да қийин,
Сотилмаган майдон сўрайман.

2009 йил 2 август

***
Тўғри, зувалада бори муқаррар,
Алқисса, самар йўқ ёқа йиртишдан.
Фақат ор қиламан, этаман ҳазар
Уларга тенглашиб сарқит титишдан.

Ўкситма, руҳимни чўктирма, Эгам,
Йўлимни тилагим қадар оқ қилгин.
Юксак-юксакларга арзимасам ҳам,
Шуларнинг олдида баландроқ қилгин.

2009 йил 26 август

ЎРТАР

Ғуссалардан олтин қафас қургандайман,
Лахча-лахча чўғ устида юргандайман,
Бу дунёда ижарада тургандайман,
Толеъ деган қилмас писанд, Машраб бобо.

Енгилгина қўшиқлари ялло-ялло,
Оёқларнинг остиндаги лойми, тилло?
Каминанинг тахаллуси чаламулло,
Тутумим ҳам шунга монанд, Машраб бобо.

Нега келдим манов ғурбат маконига?
Тутиб бердим ўзимни ғам пайконига,
Кўзим куйди кириб севги дўконига,
Жандангиздан олмадим панд, Машраб бобо.

Томиримдан куйлар оқар – сувораман,
Кўзёшлари завқ улашган фаввораман,
Ўз-ўзимни авраш билан овораман,
Кўнглим синиқ, дилим дардманд, Машраб бобо.

Йўл юраман, мўл юраман, йўлим етмас,
Хирожига на жоним, на молим етмас,
Йигирма беш йилдан бери қўлим етмас,
Этагингиз бунча баланд, Машраб бобо?!

2008 йил, октябр

***
Ҳали ўттизни ҳам қораламадим,
Тўймадим туйғулар тароватига.
Бир яйраб гулбоғлар ораламадим,
Қонмадим ғунчалар латофатига.

Гарчи оғир-вазмин шеър битдим талай,
Гарчи тафаккурга ён бердим кўпроқ,
Ҳаётдан фалсафа сўқдим-у тинмай,
Аммо… юрагимда минг битта жумбоқ.

Ўйладим, жавоби топилмас ҳарчанд,
Оғизга келганин сўйламади тил.
Гўдак хаёлларни қилмайин писанд,
Жиддий ўйлар сари бўйлайверди дил.

Мунғайиб неларни ўйлайман бот-бот,
Безовта руҳимнинг борми малҳами?
Енгиллашармиди мен билган ҳаёт?
Тўлиб қолармиди дунёнинг ками?

Кечанинг ўйлари, бугуннинг ғами,
Эртанги хаёллар – бари муштарак.
Ҳали олисдадир умримнинг шоми,
Барибир, яшашга тўймасам керак!

Барибир, қўймадим ўзни қийнашни,
Шукурки, сўзларим чиқмас ҳалқумдан.
Оҳ, мен ҳам биламан ўйин ўйнашни,
Фақат… уяламан дардкаш халқимдан…

2011 йил 28 – 29 ноябр

ДАШНОМ

Эй, оғзига кучи етмаган,
Тўғри гапга тиши ўтмаган!
Ноқис дунё яралибдики,
Тоштерарнинг иши битмаган.

Дахмазаю ғавғойингни қўй,
Пуч ёнғоқдай даъвойингни қўй.
Нолиш нарвон бўлолмас кўкка –
Енгил-елпи оҳ-войингни қўй.

Бахил боғи янтоқ бўлади,
Илк мушт туккан қўрқоқ бўлади.
Оёғингни ботирмай турсанг,
Шу дарёлар покроқ бўлади…

2009 йил, апрел

***
Кетинг, эй, даф бўлинг, золим хаёллар,
Кўнглимга тошлардай оғир ботдингиз.
Малоллар келдингиз жонга, малоллар,
Билмам, қачон бунда илдиз отдингиз.

Умримнинг эгови бўлдингиз кўп бор,
Кетинг! Ортингиздан раҳматлар йўллай.
Қанча шаҳло кўзлар йўлимда хумор,
Мен ҳам бир уларга интизор бўлай.

Андак ором олсин саргашта руҳим,
Ҳали манзил узоқ, ҳали кураш кўп.
Ҳозирча ҳасратга ўхшайди оҳим,
Ҳозирча юракда алаҳсираш кўп…

Кейин дўқ ураман, қўймайди чўчиб,
Уларга бас келиш – амри маҳоллар.
Оёғимдан тортиб, бўйнимдан қучиб,
Авраб олаверар маккор хаёллар.

2011 йил 30 ноябр

***
Балосиз – гўёки ғамимни ейсиз,
Заҳардан ўткирроқ чой бериб қўйиб.
Тортинмай бемалол ўтиринг, дейсиз,
Игнанинг учидан жой бериб қўйиб.

2010 йил 14 сентябр

***
Менга зарурмиди шунақа яшаш,
Қоғозга тўкилиб бормоқда умрим.
Орзулар олдинда, аммо кўнгил ғаш,
Кўзларим, сўзларим ёнаётир жим.

Чопаман ненидир излаган бўлиб,
Топмоқчи бўламан недандир таскин.
Шунчалар узунми йўлсизлик йўли,
Шунчалар ҳақирми одамзод – мискин?

Эйвоҳ, тубанликнинг йўриғи кўпдир,
Бир онда минг имкон майдалашгани.
Аялган кўзларнинг жазоси чўпдир,
Мудом таъқиб этар завол наштари…

Менга зарур эди шунақа яшаш,
Илло, зое кетмас ёниқ сўзларим.
Дардларим давримнинг дардига туташ,
Умримни шамолга сотмас кўзларим.

2011 йил 14 – 16 декабр

***
Билмайсан ва буни истамайсан ҳам,
Япроқлар тушунди, тошлар англади.
Ҳар томон тарқалмиш – Ер тўла одам,
Нега Тақдир айнан мени танлади?

Бир кунда неча бор туғилиш, ўлиш…
Руҳ ғолиб келарми ёки Вужуд зўр?
Жонимни тимдалар бўлиниш, сўниш…
Тириклик қадрини мендан сўраб кўр.

Ҳаволар алмашсин, оч эшигингни,
Мен бўлсам бир имкон ахтариб келдим.
Билсайдинг нақадар бахтлилигингни,
Боримни шу Бахтга алишар эдим…

2008 йил 2 ноябр

***
Кўзим толди – кутмоқ дарди оғир экан,
Йўлга қараб ўтмоқ дарди оғир экан.
Барига-ку чидаш мумкин, лек ҳар нафас
Ўз-ўзингни титмоқ дарди оғир экан.

2010 йил 2 октябр

***
Чиғириқдан ўтар ҳар қилмиш,
Гоҳи ёлғон, гоҳи ростим бор.
Бисотимда Кўнгил аталмиш
Душманданам баттар дўстим бор.

Саҳродаги япроқ мисоли
Қаён эсса эрмак шамолга.
Ҳаётимга сиғмас хаёли,
Борлиғимни кўмди саволга.

Ваҳоланки, тушунмай хулқин,
Ўлтирибман раъйига қараб.
Бир яшнайди, бир куни сўлғин –
Ўзгаргани ўзгарган, ё, Раб!

Рўпарамда турар эшилиб,
Кўзёш қилар, гоҳ мушт ўқталар.
Айнияпман унга қўшилиб,
Изларимда бенур нуқталар.

Куни борми қийнамайдиган?
Мени абгор этади шу юк.
Ўз дўстини ўйламайдиган
Кўнгилшоҳнинг нимаси буюк?

2008 йил 26 октябр

***
Сўз излаб саргардон, сўз ичра зорман…
Гапдон давралардан қочиб кетди тил.
Диққинафас хона, сендан безорман,
Шеър ясаб ўтишга ҳаё қилар Дил.

Ёзганларим сари ортиб борар ғам,
Дардларимни айтсам, нолишга йўйма.
Нопок қадам билан қошингга борсам,
Ҳайда, Адабиёт, ичкари қўйма!

2008 йил, август

МАЙДОН
1
Ойдинда от ўйнатдим,
Ёнсин-ёнсин юлдузлар.
Дилбулоқни қайнатдим,
Ўнгурларда тош музлар.

Доғлар босиб юзини
Ой ухлар қай қўйинда?
Нур йўқотди ўзини
Ҳалол-ҳаром ўйинда.

Ёлғон ётар болалаб,
Ор аламда қоврилар.
Ялтир-юлтур шон талаб,
Кимга қолди давралар?

2
Юрак чиқди қинидан,
Дунёларга сиғмайман.
Ўлганимнинг кунидан
Қўшиқ айтиб йиғлайман.

Кўксингни нур доғласа,
Ёруғ ният бўлади.
Йигит ошкор йиғласа,
Элга уят бўлади.

Ўрнингизни қизғонинг,
Асли тоза мардларим.
Уйғонинг-а, уйғонинг,
Ай, полвонча дардларим!

2008 йил, март

***
Бир кўзимда оташ, бир кўзимда сув,
Икки дарё аро омонат тоғман.
Лаб тегмаган сўзлар – сулувдан-сулув,
Аларнинг кўйида даллию доғман.

Пойимда жон сўраб эзилди тупроқ,
Ҳақиқат қўшиғи экан сукутлар.
Сизни тушунаман ўзимдан кўпроқ,
Бошимда ёғолмай турган булутлар.

Билмасам бўлмасди билмаслигимни,
Қандай оғир экан билмаслик илми.
Ё бор этар ёки йўқотар мени
Сўзларнинг лутфию сўзларнинг зулми.

2008 йил, ноябр

***
Мен қидирган сўзлар луғатларда йўқ,
Мен талпинган ҳаёт қайда – билмадим.
Ўйлаган қиёфам суратларда йўқ,
Орзулар орзусин писанд қилмадим.

Лаҳзалик умримга беролмай маъно,
Пардалар нарига сурилмаётир.
Ўзим бир сиқимча тупроқман, аммо
Мен излаган дунё кўринмаётир…

2010 йил 11 март

***
Ҳали сўз айтарман Ўзга муносиб,
Дунёнинг умрига етар парвози.
Майда гапларимни кетажак босиб
Ичимдаги асл Инсон овози.

2011

***
Тушунган тушунди, уқмаган уқмас,
О, бу сўзлар деб нақ ақлимдан оздим.
Юракнинг буйруғи ҳар доим ҳақмас,
Раҳмон не буюрса, ўшани ёздим.

2012 йил 10 феврал

НАЖОТ

Тақдир қандай тадбир этар эртага?
Кўнглимда муқаддас ният кўкарар.
Ким қўлга ишонар, биров елкага,
Мени эса бир кун сўзлар кўтарар.

Бору йўқлик билан келсам юзма-юз,
Изимдан эргашса қора нуқталар;
Иймоним сўз эрур, амалим ҳам сўз,
Ўшанда ҳам мени сўзлар қутқарар.

2009 йил 30 март

СЎНГСЎЗ

Қанот қилиб энг учқур сўзни,
Юлдузларни эттириб хиром,
Ҳаммасига чирт юмиб кўзни
Шартта учиш керак – вассалом!

2009 йил, июн

Беҳзод ФАЗЛИДДИН

Сўраётганлар учун:
Китобларимиз дўконларга чиқарилмаган. Мана бу рақамга телефон қилиб, ўзингизга қулай жойдан сотиб олишингиз мумкин: +93 544 98 33


Kutmagan kunlarim, kutgan kunlarim_1Kutmagan kunlarim, kutgan kunlarim_2

***
Tashqariga chiqdim. Yuragim qo‘lda.
(Butun bir ko‘chani yoritarmi sham!..)
Bo‘lishi mumkin-ku xuddi shu yo‘lda
Umrida yorug‘lik ko‘rmagan odam.

2008

UYG‘ONISH

Ko‘zlarimdan olovlar sachrar,
Qafasdagi sherday og‘rindim.
Huvillagan odamzor ichra,
Hayot, Seni juda sog‘indim!

Kundaligim bir xil: uy, yo‘l, ish…
Qanoti yo‘q qushga o‘xshayman.
Tashvishlarning ortida tashvish…
Bu turishda qachon yashayman?

Qayda eshik ochdim g‘avg‘oga?
Yo‘l boshida yo‘qotdim yo‘lni.
Oz bo‘lsa ham toza havoga
Olib chiqqim kelar Ko‘ngilni.

Yonib ketgim keladi birdan,
Ado qildi tunga sheriklik.
Nekbin-nekbin nigohlar bilan
Bugun senga zorman, Tiriklik!..

Yuragimda orzugul unar,
Umid tinmay qilar qo‘ng‘iroq.
Borgan sari ko‘zlarim tinar –
Borgan sari Quyosh yaqinroq…

2008

UZUN ORZU

Birdan qanot o‘sib chiqsa yelkamdan,
Uchsam. Hammasini unutsam. Ketsam.
Asar ham qolmasa shum ko‘lankamdan,
Armon yetolmagan manzilga yetsam.

Quvib tutolmasa ortimdan la’in,
Muhabbat o‘rtada bo‘lmasa dallol.
Xuddi shu eng maqbul, to‘g‘ri yo‘ldayin –
Uchishim hech kimga kelmasa malol.

2008

BOZOR

Bugun ham pul emas, Nur izlab chiqdim,
Nigohlarim toza – ko‘zimda kir yo‘q.
Yana nazari och to‘pga yo‘liqdim,
Odamman degan ko‘p, yuzida nur yo‘q.

Qanday yurak ochay yuraksizlarga,
Nahot shularni deb to‘kmoqchiman ter?
Yordam bergim kelar mahbus so‘zlarga,
Gaplar osmondadir, poygaklarda She’r.

Yashash hadisini bilmasman, balki,
Insonlik ilmidan olurman ta’lim.
Halollikdan saboq berarmi yoki
O‘zi amal qilmas Hayotmuallim?

Toshlarni chaynashga temir tishim bor,
Cho‘kib ketmaslikka toparman qudrat.
Menshunoslar bilan nima ishim bor,
Bu yo‘ldan ko‘z yumib o‘tgum yo‘q faqat…

2008

***
Nega asli go‘zal emas go‘zallik?
Vafosiz yillarda bor mening qasdim.
Hammamizga taqdir nomukammallik,
Butun bo‘lganimda odam bo‘lmasdim.

Fe’limdan o‘pkalab borar vijdonim,
Ko‘zi ochiq kunlar mendan norozi.
Hamon tomirimga sig‘maydi qonim,
O‘rtada ovora hayot – tarozi.

Gohida haqiqat bilan qovushmas –
So‘zlarimdan qo‘rqib ketaman birdan.
Yo uchib ketmaydi, yo yerga tushmas,
Yashab bo‘lmaydi-da bu yurak bilan!

2008

JAVOB

Meni tushunmadi tushunganlarim,
Ularni tingladim, o‘zimni tiydim.
Ishonmay qiynadi ishonganlarim,
Mitti ozorlarni kechirdim-qo‘ydim.

Yot so‘zga berkitdim quloqlarimni,
Haqgo‘y ko‘zlarimni atadim g‘anim.
Shamoli o‘chirdi chiroqlarimni,
Mendan kechib ketdi kechmaganlarim.

Do‘stlar, do‘stlarimga ayting, shoshmasin,
Arzonga uchmasin sotmoqchi bo‘lsa.
Xiyonatida ham maydalashmasin,
Kattaroq tosh otsin otmoqchi bo‘lsa!

2008-yil, may

***
Shu bir parcha Quyosh. Tuproq. Havo. Suv.
Yana nima kerak baxtli bo‘lgani?
Nega buncha katta ketadi Orzu?
Vaqtning imkoni yo‘q quloq solgani.

Qanotlari yonib o‘ynar kapalak,
Muvaqqat go‘zallik kun o‘tmay bejon.
Yurak peshtoqida hislar kamalak,
Erta-indin boshqa tuyg‘ular mehmon.

Mavhum bo‘shliqlarga uzangan qo‘llar,
Sarob sarhadida ko‘rinmas oxir.
Zardob yig‘ib borar majruh ko‘ngillar,
Ahvoli og‘irdir, ahvoli og‘ir.

Balki, shu tashvishda keksaydi Ochun…
Hassasi necha bor yo‘qolar ko‘rning?
Buyuk qarzimizni eslatish uchun
Silkinib qo‘ygani yetmasmi Yerning?

2008-yil, sentyabr

***
Qolgan chaqalarni eslagim yo‘qdir –
Chiroq bo‘lolmaydi ortimda, o‘lsam.
Faqat nur so‘radim, faqat nur yig‘dim,
Faqat mehr oldim, qarz olgan bo‘lsam.

2010-yil 4-avgust

***
Qosh qoraydi, o‘ychan qisqardi kunlar,
Tag‘in ne tashvishda ko‘ngli yupunlar?
Hali kul ostida mudrar uchqunlar,
Kuting…

Birday o‘tdi oyning ikki o‘n beshi,
Kechaning bugunga o‘tmadi tishi,
Azalning ishi bu, abadning ishi,
Kuting…

Sevmasa sevmasin siz yakto bilgan,
Kelmasa kelmasin sizni qon qilgan,
Kutgan ham haq erur, haqdir kutilgan,
Kuting…

Kim kimni o‘chirdi xotirasidan,
Kim chetlashdi ishonch doirasidan,
Kimdir boqar ko‘ngil oyinasidan,
Kuting…

Bu asriy lahzalar sig‘maydi so‘zga,
Sevgi bir sharpadir, ko‘rinmas ko‘zga,
Yaxshi bilasiz-ku, chora yo‘q o‘zga,
Kuting…

2009-yil 19-noyabr

DOVON

Shu xalq o‘ssin, shu yurt ko‘karsin,
Izga tushib ketar qolgani.
Boshin mangu baland ko‘tarsin,
Oltin bo‘lsin tosh deb olgani.

Omon o‘tdi yillar qahridan,
Turishlari mardona bo‘ldi.
G‘anim erib ketdi mehridan,
Oqibati afsona bo‘ldi.

Bek bolasin qadami shaxdam,
Bag‘ri butun, iligi to‘la.
Gijinglagan toychoqlari ham
Yov diliga solar g‘ulg‘ula.

Endigina tonglar otganda
Parchalanmas azaliy toqat.
U kunlarga qiyos etganda,
Bu kunlarning zahmati – rohat.

Yuraklarda birdamlashaylik,
Suyagani yetar qudrati.
O‘zimizdan baland yashaylik,
Shu yurt haqqi, shu xalq hurmati.

2009-yil 1-sentyabr

O‘G‘IL

Dada, dalangizga dard sochib keldim,
Yana mashaqqatu zahmatlar Sizga.
Belingiz og‘ridi, men qochib keldim,
Qachon olib berdim rahmatlar Sizga?

Aya, sog‘inchingiz sochi oqardi,
Bormadim – ko‘payib ketdi to‘ylarim.
Shu yoshimda faqat sevish yoqardi,
Sizdan ko‘ra ko‘proq uni o‘yladim.

Boshdan nima o‘tdi – bildirganim yo‘q,
Kimdir to‘kaverdi nur izlarimga.
O‘zimni-ku xafa qildirganim yo‘q,
Ozor berib qo‘ydim azizlarimga.

Maysalar, paryostiq bo‘ling, bosh qo‘ysa,
Chinorlar, Otamning yonida yuring.
Bolasini o‘ylab yuragi kuysa,
Achchiqqina qilib choy damlab bering.

Bu tashvishlar bilan bo‘lmaydi qarib,
Meni kutish uchun kelgan olamga.
Qo‘llari tolmasin chelak ko‘tarib,
Bulutlar, suv tashib turing Onamga.

Dada, dardingizga boshman, bilaman,
Aya, tushlaringiz bir kun kelar o‘ng.
Hali yuzingizni yorug‘ qilaman,
Odamshoir bo‘lib borganimdan so‘ng.

2008-yil 7-sentyabr
YOLG‘ON

Iloj yo‘q, boshqa bir yo‘li yo‘q,
Rost gapni ichimda asrayman.
Ko‘nglimning ko‘nglini qilib to‘q,
Sen buyuk baxshi, deb aldayman.

Ko‘chasi chang qildi egnimni,
Shu gaplar, oh, mening tengimmi!
Umrimga dog‘ sochgan sevgimni
Hayotim naqshi, deb aldayman.

O‘zimga tinmay choh qazarman,
Sal qolsa, aqlimdan ozarman,
Shu ekan avvalu azaldan
Dunyoning ishi, deb aldayman.

«Ahvoling tuzukmi, toy bolam,
Shoirim – orzuga boy bolam».
Dardimni bilmaysiz, jon onam –
Hammasi yaxshi, deb aldayman.

2009-yil 30 – 31-iyul

***
Onamning onasi o‘tdi, vodarig‘,
Boladay ichikar sho‘rlik har kuni.
Oh, bilmay qolibman, sezmay qolibman
Onam ham men kabi bola ekanin.

2010-yil 26-oktyabr

***
Gul kabi sochildi men gul tutganlar,
Menga ko‘z tikkanlar o‘ylarimda yo‘q.
Men yuzga gardini tavof qilganlar
Ko‘nglimning ko‘ksiga sanchib ketdi o‘q.
Gul kabi sochildi men gul tutganlar.

Izimga zorlarni zor etdim battar –
Ko‘ksimdan muzlarni aritmadilar.
Hech qo‘rqmay umrimni hadya etganlar
Bir bor tushlariga arzitmadilar.
Izimga zorlarni zor etdim battar.

Kim edim?.. Nimaga aylandim bugun?
Sarobga intilgan dunyoparastman.
Qo‘l yetmas yulduzman birovlar uchun,
Sevgimning qoshida xascha emasman.
Kim edim?.. Nimaga aylandim bugun?

2009-yil 15-dekabr

***
Armonqizning ko‘zi battar suzuklashdi,
She’rim o‘qib kimning holi tuzuklashdi?
Qalam tutib qo‘lim faqat noziklashdi –
Uyda o‘tin yorganlarim yaxshi edi.

Dil bezillar bu bemavrid shamollardan,
Savollardan qochib bo‘lmas, savollardan,
Charchadim-ay og‘ir-og‘ir xayollardan –
Ketmon chopib horganlarim yaxshi edi.

O‘ylayversang o‘ydunyoning o‘yi bitmas,
Qo‘li uzun tashvishlarning to‘yi bitmas,
Unda bobom boshlab ketgan uyi bitmas –
Qishloqda loy qorganlarim yaxshi edi.

Tutam umrim to‘lib borar tumanlarga,
Yomonlarga o‘lim yo‘qmi, yomonlarga,
O‘zim bilan borsa kelmas tomonlarga,
Xudo haqqi, borganlarim yaxshi edi…

2011-yil, iyul

OCHILMAGAN MAKTUB

Hammasini ko‘rib, bilib turibsiz –
Chidab bo‘lmaydigan fe’l-atvorim yo‘q.
Sal yelkamni qisib o‘tsam, tiyiqsiz –
Kesaklar birlashib do‘q uradi, do‘q.

Mendan nima ketdi – qo‘limdan kelar
Zamonsoz yuzlarga nur so‘rab yashash.
Har maxluq ustimdan kulmoqchi bo‘lar,
Ba’zan og‘ir botar Odamga o‘xshash.

Omad ham beg‘araz yo‘qlamas, yohu,
Bilib turib atay boy berdim naqdni.
Keragidan ko‘proq imkon berdi-yu,
Hech ravo ko‘rmadi eng zarur Baxtni.

O‘zimga o‘zimni obdon talatib,
Tomoshatalablar o‘yin kutdilar.
Ahyonda bir qoshiq asal yalatib,
Ortidan kosalab og‘u tutdilar.

Bilmayman, ne sabab omondir boshim,
Nega tars yorilib ketmaydi yurak?
Ko‘zimda tosh kabi qotadi yoshim,
Dardimni ololmay so‘zlar jonsarak.

Bilasiz, burnimning uchida jahlim,
Hech eplay olmadim ishontirishni.
Tushungim keladi, yetmaydi aqlim
Siz ham talab qilmang tushuntirishni.

2009-yil, oktyabr

MUSOFIR

She’rlarimning sochlari oppoq,
O‘ychan so‘zlar yuzida ajin.
Boqqin, axir, Onajon, bir boq,
O‘g‘ling nega bunchalar g‘amgin?!

Balki, juda erta ulg‘aydi
Yuragimda gullab yotgan dard.
Ko‘zlarimda tunlar uxlaydi,
Halqa-halqa yoshlarimni art.

Kechagina podshoday edim,
Atrofimda minglar parvona.
Baridan voz kechib men endi
Bir so‘qqabosh dalli-devona.

Kun qaridi, sovidi choying,
Paxta gulli piyolang ma’yus.
Yig‘may menga to‘shagan joying,
Darvozadan hatlab o‘tdi Kuz.

Ne ko‘ylarga solmadi Orzu…
Nogoh uchib borsam qoshingga.
Og‘ushingga go‘dakday ol-u,
Mehrlar ber men beboshingga.

Hali juda yoshsan, chirog‘im,
Armon seni yo‘qlamaydi, de.
Erkalab ayt: O‘yinqarog‘im,
O‘g‘il bola yig‘lamaydi, de…

Dunyo haqda ortiq bilgim yo‘q,
Har ne dedim, barchasi – bekor.
Shoh bo‘lgim yo‘q, shoir bo‘lgim yo‘q,
Bugun faqat bolang bo‘lgim bor.

2010-yil 14-sentyabr

***
Hali dunyo sutday oq edi,
Bog‘lar yashil, osmon lojuvard.
Quyosh yerga yaqinroq edi,
Oy yuzida ko‘rinmasdi gard.

Tebranardi maysalar sokin,
Ko‘kdan yog‘ib mayin navolar.
Borliq uzra Baxt edi hokim,
Jonga huzur toza havolar!..

Sezmay qoldim, qalb qanday qotdi,
Qachon armon yozoldi kurtak?
Tushlarim ham o‘zgarib ketdi,
Endi bari olis bir ertak.

Qani kunlar – menga atalgan,
Loylargami yo botib qo‘ydim?
Har zarradan chiroy axtargan
Ko‘zlarimni yo‘qotib qo‘ydim…

2010-yil, iyun

YO‘QLOV

Sabog‘i tugamas maktabdir Hayot,
Ba’zida tanaffus – o‘ynab-kulgani.
Kecha partalarda Diydor edi shod…
Hamma tarqab ketdi Odam bo‘lgani.

Bir kuni yo‘q edik, birda bor edik,
Tinmadi Orzuning xarxashalari.
Jannatda yurganday baxtiyor edik
Bir ota-onaning zumrashalari…

Qancha yorug‘ bo‘ldi umr – darsxonam,
Bilgan-bilmaganim shundan ham ma’lum.
Muallim – Ruhimni uyg‘otgan Onam,
Farzand ajratmagan Otam – Muallim.

So‘z bo‘lib tilidan savoblar uchgan,
Ikki olam aro qismati – e’zoz.
Kim bo‘lib borsam ham bag‘rini ochgan –
Keldim. Assalomu alaykum, Ustoz!

2008-yil, sentyabr

***
Bu qaro dard yopishdi qaydan,
Oppoq g‘amlarimni sog‘indim.
Ketgim kelar g‘urbatsaroydan,
Pokroq damlarimni sog‘indim.

Bardosh oti hansirab borar,
Vujud ne deb aljirab borar?
Qarog‘larim qovjirab borar,
Chashmi namlarimni sog‘indim.

Jon ipidan otash yaratgan,
O‘zi nurab ziyo taratgan,
Dovullarni esankiratgan –
O‘chmas shamlarimni sog‘indim.

Xilqat bormi undan nafisroq,
Muhabbatga bir oz xasisroq,
Jondan yaqin, jondan azizroq
Allakimlarimni sog‘indim.

2010-yil, fevral

***
Boshingizga Quyosh toj bo‘lsin, Ota,
Umrim qo‘lingizda yorug‘ yulduzdir.
Balandroq ko‘taring – charaqlab ketay,
Meni o‘rtayotgan cho‘ng azob So‘zdir.

Ko‘nglimda adashdim, aqlimda shoshdim,
Dunyo biyobonmi tentiraydigan?
Jismimda qaynadim, ruhimda toshdim,
Hech vaqo qolmadi intiladigan.

Ona, allangizni ayting qaytadan,
Navosi sevgimga sevgilar qo‘shsin.
Ishonchlar uyg‘onsin, yonsin jonu tan,
Muhabbat qudrati qonimda jo‘shsin.

Axir boshidayoq yuzni ters burdim,
Bu ko‘cha arzimas gangib ketgani.
Daryo-daryo bo‘ldi chashmai zardim,
Dengiz yo‘q, bag‘riga singib ketgani.

Oy bilan ahd-paymon qildim oydinda,
Bag‘rimni sug‘ordim ko‘z yoshim bilan.
Aqlli devorlar turar oldinda,
Qayoqqa boraman bir boshim bilan?

Ildizlarim, meni mahkamroq tuting,
Uchish payti kelsa, o‘zim aytaman.
Faqat siz toqatda mendan-da o‘ting,
Dunyoni uyg‘otar so‘zim aytaman.

2009-yil 27-may

***
…chunki ko‘p narsadan ko‘nglimni uzdim,
chunki hafsalamni pir qildi hayot.
chunki bilib-bilmay niyatni buzdim,
chunki yer-u ko‘kdan bo‘lmadi najot;

chunki o‘zim bilan kelisholmadik,
jindakkina aqlim egmadi bo‘yin.
imkon ila vaqtni bo‘lisholmadik,
chunki hammasining maqsadi – o‘yin;

chunki izg‘ib yurar bunda qora ruh,
battar avj oldirib hazin otashni.
etimni chimchilar sovuq bir anduh,
chunki istamadim oson yashashni…

chunki…

2009-yil 10-dekabr

HAR KUN

Shu lahzadan yashay boshlayman, deyman,
Ichimdagi itning quloqlari ding.
Axir alam qilar, kap-katta odam
Bir gugurt cho‘picha tegmasa nafing.

Rejalarim bitmas, ishlarim chala,
Bilmaganga hazil, bilganlarga chin –
Yo yo‘lda mashina buzilib qolar,
Yoinki tugagan bo‘ladi benzin.

Har safar, har kuni, har doim shu hol:
Kuttirib vaqt o‘tar, kutib vaqt o‘tar.
Yonimdagi do‘stga yorilib ko‘rsam,
Sho‘rlikning ahvoli mendan beshbadtar.

Bir lahzadan keyin bormanmi, yo‘qmi,
Safar olisligin eslatadi yo‘l.
Qurol-yarog‘imni tayyorlab turay,
Bu gal, hech bo‘lmasa, eshik qoqib kel.

2008-yil 17-noyabr

OSMONDA YOZILGAN SHE’R

Yeru osmon orasi – hayot,
Safarimning nomi – aldanish.
Bunda menga hamma narsa yot,
Bunda menga hammasi tanish.

Yopilmoqda ilinj darchasi,
Ko‘chishlardan bo‘lganman horib.
Unutmoqchi edim barchasin
Po‘lat lochin bag‘riga kirib.

Bir yon bulut, bir tomon tuman,
Qayga olib qochay ko‘zimni?
Har yo‘lovchi nigohi bilan
Taftish etdim yana o‘zimni.

Uchgan sayin ulg‘ayar g‘ussam,
Xavotirning ko‘zlari lo‘qdir.
Bir on mizg‘ib olayin desam,
Osmonda ham halovat yo‘qdir.

Toshkent – Moskva – Berlin

2009-yil, sentyabr

MANGU LAHZA

Shu lahza ketmasa, shu lahza qolsa,
Yoki birga ketsam o‘zim u bilan.
Yo‘qolsa, yo‘qolsa, yo‘qlik yo‘qolsa,
Mavhumlik ko‘yida bo‘larim bo‘lgan.

Manzilga eltolmay mulzamdir yo‘llar,
Na nom-u, na nishon, kezdim betinim.
Eslashga arzimas chalajon yillar,
Shu lahza qoshida topsaydim qo‘nim…

2009-yil, 1-fevral

***
Bir oz shoshmang, Vaqt janoblari,
Ikki og‘iz gapim bor sizga.
Mangumidi iztiroblari –
Otameros kechikish bizga.

Har hikmati bir dunyo Egam
Qadringizni tengsiz yaratmish.
Zamon, makon jilovini ham
O‘zidan so‘ng sizga qaratmish.

Bir chiroyli o‘ynab yurgandim,
Bolalarcha, keltirmay g‘ashni.
Bilmay qoldim, qachon o‘rgandim
Sizga taqlid qilib yashashni.

Ne azobni oldim bo‘ynimga,
Kunlar boshdan-oxir egovli.
Bo‘y bermaydi o‘ylar o‘yimga,
Har qadamim hanuz o‘lchovli.

Ortingizdan chopganim-chopgan,
Ertakmikan sizga teng kelish.
Pushaymonga kim malham topgan,
Tushimga ham kirmas yengilish.

Bir kun nogoh yo‘qolib qolsam,
Hayron bo‘lmang izlab izlarim.
Sizni katta yo‘lda xotirjam
Kutib olar yorug‘ so‘zlarim.

2009-yil 2-noyabr

***
Ortiq ushlab turmay, ochiq osmonga
Qo‘yib yuboraman yurakni – sharni.
Asta singib ketar moviy maydonga
Panalab o‘tganday mash’um xatarni.

Hech kim niqtamasa, hech zog‘ tegmasa,
Boladay o‘ynoqlar zavqqa berilib.
Qo‘rqaman, ko‘kda ham ozor chekmasa,
Yorilib ketmasa edi, yorilib…

2009 yil

***
Har kuni ko‘ksimda ko‘pkari,
Olishar chavandoz tuyg‘ular –
G‘irromga o‘rgangan ko‘plari.

Uyalib ketaman o‘zimdan,
Tag‘inam gunohning hidi yo‘q,
Kun qochib boradi izimdan.

Ulug‘ bir xatoni boshladim,
Qalamning yurgisi kelmaydi,
Sho‘rlikni… sindirib tashladim…

2009-yil 7-mart

***
Tongdan eshigimni chertadi tashvish,
Ichkariga olib kirmasam, ko‘nmas.
Ishda qanday g‘alva qayrab turar tish,
Oyoq tortmaydi-yu, bormasam bo‘lmas.

Yo‘lga otlanaman, nonushta chala,
Muhimi – gupillab turibdi yurak.
Kutishga zarracha yo‘qdir hafsala,
(Baribir, avtobus kutishim kerak.)

Ishxonada o‘sha eski tomosha,
Har kimning aytgani yuzaki o‘lan.
Baxtiyor ko‘rsatgum o‘zni hamisha
Miyiqdagi soxta tabassum bilan.

Axir yolg‘on bo‘lsa, bo‘lar-da shuncha,
Ne-ne aldovlarga, balki, soqiyman.
To ustimdan kulib quyosh botguncha,
Nuqul ertak o‘qib, ertak to‘qiyman…

Nega hamma narsa insonga soya?
Har qulaylik dilni g‘amga o‘raydi.
Borsam, o‘tganmisan ro‘yxatdan, deya
Baxt ham yuzi sovuq, hujjat so‘raydi.

Savollar tushda ham tinch qo‘ymas nechun?
Alahsirab tunni tongga ulayman.
Ertaga erkinroq yashashim uchun
Tag‘in qancha joyga soliq to‘layman?

Yaxshi berkilganmi jo‘mrakning og‘zi,
Qo‘shnining uyiga o‘tmabdimi suv?
Keyin shunday g‘alat xayollar bahsi,
Hozir hayotimning bor ma’nosi – shu…

2010-yil 26-iyun

***
Ne hikmat dilingning yarolig‘ida,
Beadog‘ taxayyul yo‘liga jim boq.
Kutish va kuttirish oralig‘ida
Yigirma yil o‘tdi – qolgani jumboq.

Nimadir yetmadi, yana, kimdir kam,
Balki, omadsizlik edi omadim.
Ulgursa bo‘lardi tozarishga ham,
Yashash ne – bildim-u, yashay olmadim.

Gohi uyaltirib, gohi uyalib
Birma-bir jon berdi daqiqalarim.
Shunchalar ishondim, keldim suyanib –
Haqqa eltgaymikan haqiqatlarim?

2009-yil 29-aprel

***
G‘am mirshabi har yerda nozir,
Ko‘ngil tortib borar joyim yo‘q.
Shuni ham ko‘p ko‘rmagin, hozir –
Vaqtdan bo‘lak hech vaqoyim yo‘q.

2010-yil 1-avgust

ANGLASH

Yillarim jam bo‘lib Kunga aylandi,
Yolg‘onlar yig‘ilib chinga aylandi.
Butunlik kasb etdi sochilgan zarram,
Menlarim birlashib MЕNga aylandi.

2008-yil, sentyabr

O‘KINCH

Kechagi hayotim yorug‘roq edi,
Yurgan yo‘lim chaman, bog‘u rog‘ edi,
Ko‘nglim osmon edi, ko‘nglim tog‘ edi,
Voh, qanday kunlarga yo‘l berib qo‘ydim.

Eng nodir hislarga nazar tashlamay,
Nahot, ko‘klam ketar bizni xushlamay,
Ko‘ksimda chechaklar yashnab-yashnamay,
Mezonning qo‘liga qo‘l berib qo‘ydim.

Qancha tentirasam, qancha yugursam,
Ortimdan boladay ergashar g‘ussam,
Endi o‘z tilimni toparman, desam,
Armon shevasiga til berib qo‘ydim.

Borini unutib suygan kim mendek,
Nadomat to‘nini kiygan kim mendek,
Bedillar dastidan to‘ygan kim mendek,
Naylayki, dilsizga dil berib qo‘ydim.

2010-yil 3 – 4-sentyabr

YIGIRMA YETTINCHI BЕKAT

Kitobday o‘zimni varaqlayman jim,
Nimagadir tashna, negadir mushtoq.
Qaysi voqelikdan rangindir umrim,
Qay o‘rinda dardim ishonarliroq?

Siyqa saktaliklar etmasmi mulzam,
Baxayr bo‘larmikan ruhiy safarim?
Birov o‘qiganmi mendan oldin ham –
Muncha hilviraydi sahifalarim?!

Mana bu qo‘l izi, mana bu dog‘lar
Qaydan paydo bo‘ldi bugun bag‘rimda?
Oh, nahot, tarixga ko‘chdi u chog‘lar!
Xotirot hidi bor har bir harfimda.

Mavhum ehtiroslar – bejiz yonishlar,
Ta’kidlar – quvonchim va yo ohimdir.
Ko‘p nuqtalar – uzoq ikkilanishlar,
So‘roqlar – gumonu ishtibohimdir.

Nelardan so‘ylaydi bu so‘zlar sozi,
Zimmasiga qanday a’mol ortilgan?
O‘ta ta’sirchanmi, maqbulmi, ba’zi –
Misralar ostiga chiziq tortilgan…

Shukur, zerikmadim o‘zimdan bir zum,
O‘kindim. Quvondim. O‘rtandim. Kuydim.
Xolis baho berar dedim-u, o‘zim –
Kelajak qo‘liga topshirib qo‘ydim…

2010-yil 5-sentyabr

***
to hanuz jumboqqa o‘xshaydi umrim,
to hanuz ulgurib bo‘lmas yashashga,
to hanuz ko‘zimda ezg‘ilanar qum,
to hanuz no‘noqman o‘zni asrashga.

nahotki hayot shu, tiriklik shudir,
nahotki umrbod o‘rtanmak – qismat?
nahotki mo‘’jiza bo‘lmaydi sodir,
nahotki toabad cho‘zilgay hijrat?

bilmayman, bu boshda yana ne savdo,
bilmayman, ne jindir jonda raqs tushgan.
bilmayman, bilishdan nadir muddao,
bilmayman, ruh qushi qayoqqa uchgan.

to hanuz…
nahotki…
bilmayman…

2012-yil 12-yanvar

***
Ko‘ksim uzra havo yetib ulgurmaydi,
Yuguraman, yuguraman – buyurmaydi.
Halovatdan masrur dillar ibrat so‘ylar:
Qanoatni tutgan ortiq yugurmaydi.

Tenglasholmay tarixga ne nomlar o‘chdi,
Yengil yelga yengildi-yu shamlar o‘chdi.
Jondan aziz nomin yodga olgan edim,
Yuragimning xotiridan g‘amlar o‘chdi.

O‘tgan kunlar o‘tib bo‘ldi – o‘kinmayman,
To‘kilsam ham yoningizda to‘kilmayman.
Har nayzasi yuragimni toblab borar,
Egilmayman, bukilmayman, chekinmayman!

2009-yil 26-aprel

NOMA

Nastarin gullari mushtoq xatimga…
Yodingiz bag‘rida tunlarim oqdir.
Qaysi xizmatimga, qay zahmatimga
Meni zulfingizga bog‘lamish taqdir?!

G‘uborlar tekizmay xayolingizga,
Hayoni nariga quvmay sevasiz.
Yuragimni tugib ro‘molingizga,
Siz aytmay sevasiz, “sevmay” sevasiz.

Bemavrid xatarni payqagan qushday,
Qayoqqa berkindi tuyg‘ular – inja?
Xunobdir ro‘yobga chiqmagan tushday,
Gumon ko‘ksingizga sololmas panja.

Ko‘ngil qo‘rg‘oniga yetkazmas shikast,
Parvolar qilmaysiz yomg‘irga, do‘lga.
Kuydirib ketolmas – tafti juda past,
Suv sepib qo‘yasiz hijronli yo‘lga.

Ular sevgim kabi shaffof, betama’,
Yuzga solmas olis gunohlarimni –
Bog‘imga begona xazon, deb yana
Supurib yubormang nigohlarimni…

2008-yil, oktyabr

***
Yurakka aylandim boshdan to oxir –
Ko‘zim yurak bo‘ldi, vujudim yurak.
Suratu siyratda ulug‘ Ishq zohir,
Qolgani afsona, qolgani ertak.

Qoshimda yaproqday titradi Dunyo,
Qo‘llarim cho‘zaman – uzilgisi yo‘q.
Xazonga do‘nishni istamaydi, yo
Bedillar poyida ezilgisi yo‘q.

Yurakka aylanib sirlashar oqshom,
Tim qora dengizda Oymoma suzar.
Toshib turar Oftob – yog‘du to‘la jom,
Yurakka o‘ralgan har neki – go‘zal!

Koinot samoviy ziynat ufurar,
Yana ko‘zlarimda jilvalanar Nur.
Yurak ekanimni eslatib turar,
Shu yorug‘ Dunyoning boriga shukur.

Tobora mahkamroq yumaman ko‘zni,
Barcha dilsizlikka berganday barham.
Mening yuragimga jo qilib o‘zni,
Yurakka aylanib bormoqda olam…

2010-yil 2-avgust

***
Sevgi yomon, sevgi dilozor,
Bor-budimdan meni ayirdi.
Andishasiz mehmonday beor
Dil uyiga so‘roqsiz kirdi.

Chehrasida jozib tabassum,
Bir chiroyli hislardan iydim.
Beixtiyor – bilmasdan o‘zim
Uy to‘riga o‘tqizib qo‘ydim.

E’zozladim, bag‘rimni ochdim,
Xizmatida bo‘ldim erta-kech.
Dasturxonga borimni sochdim,
Shundanmikan, ketgisi yo‘q hech.

Kundan-kunga bo‘ldi yaqinroq,
(Yo mezbonni yoqtirib qoldi.)
Xayolimga tashladi qarmoq,
Meni butkul og‘dirib oldi.

G‘ururimga keyin soldi chang,
O‘zlashtirdi ichu sirtimni.
Hech qanaqa qo‘shinsiz – bejang
Ishg‘ol etdi Ko‘ngil yurtimni…

Endi najot so‘rayman kimdan?
Yo bo‘shatgim kelmas maydonni.
Haydolmayman hanuz umrimdan
Sevgi otli go‘zal shaytonni…

2008-yil 26-iyul

SAS

Soya solmish sabrimga Sog‘inch,
Saratonda sensiz sovqotdim.
Sohillarda sarg‘aydi sevinch,
Sirlarimni so‘zlarga sotdim.

Soching silab sabolar sarxush,
Sezmaysanmi, sezdirmaysanmi?
Savol sonsiz, sitamlar serpusht,
Sevmaysanmi, sevdirmaysanmi?..

2010

KO‘NGIL

Hech bo‘lmasa, xafa bo‘ldim, de,
Yo bo‘lmasa, biror so‘z ayt, hoy!
Faqat bunday qarama menga,
Ko‘zim tegib sinib qolgan Oy.

2008-yil, sentyabr

***
Men – o‘zini sotib qo‘ygan qul,
Xayolimga zanjir solib ber.
O‘zingdan o‘zgadan ozod qil,
Yuragimni undan olib ber.

Osmon edim, qanday egildim,
Qaro yerga donday to‘kildim,
Nahot shuncha oson yengildim,
Yuragimni undan olib ber.

Qanday ishq bu – yo‘ldan chalg‘itsa,
O‘tdan olib o‘tga irg‘itsa,
Parishonman, yana to‘zg‘itsa…
Yuragimni undan olib ber.

Bir nigohga menday zormas u,
Toza dardga intizormas u,
Meni Senga olib bormas u,
Yuragimni Guldan olib ber.

2008-yil, may – iyun

G‘ALATI HOBBI

Men uning qalbiga kirmadim o‘ynab,
Boqsam, ko‘zlaridan hasrat yog‘ardi.
U lazzat olardi o‘zini qiynab –
Mendan xafa bo‘lish unga yoqardi.

2008-yil, oktyabr

***
Shu kecha ertagin tugatmasa qor,
Sen sovuq qotmasang – uyga kirmasak,
Oq, oppoqdan bo‘lak rangni bilmasak,
Mayliga, kechiksa kechiksin bahor.

Ertani o‘ylama, cho‘chima sira,
Ayni dam yiqilib tushmasang bo‘ldi,
Qo‘limdan mahkamroq ushlasang bo‘ldi,
Har bosgan izimiz – billur xotira.

Kumush osmon gulday sochar mehrini,
Ohista chekinib tun pardalari –
Yuzingda porlasa oy parchalari,
Qorlar o‘chirolmas sevgim muhrini.

2008-yil 29-dekabr

***
Bejiz yomg‘ir bo‘lganim yo‘q-da,
Tomchisida yana ming tomchi.
Bir on g‘ubor yutishdan to‘xta,
Dunyo degan keksa aldamchi.

Kechagi kun – yorug‘ xotira,
Boqiy bo‘lar bugungi kunlar.
Hali hislar bordir bokira,
Kuyla, kuyla, qalb bo‘lib kuyla.

To‘kilguday tuyg‘ular toshar,
To‘lib borar muhabbat jomi.
Tazarrular qilsak yarashar –
Biznikidir poklik ayyomi.

Bejiz yomg‘ir bo‘lmadim axir,
Dil oynasin bir artgim keldi.
Anglamoqchi bo‘ldim nenidir,
Nimanidir eslatgim keldi…

2011-yil 4-fevral

***
Bundan buyog‘iga bodomlar bedor,
Bundan buyog‘iga butoqlar bejo.
Balog‘at bo‘ylagan bog‘larda bahor,
Bunchalar beqiyos, bunchalar barno!

Kela qol, novdalar qo‘ymasin gullab,
Yashnamoq faslini o‘zing boshlab ber.
Qadaming taftidan yonsin lovullab,
Intizor yo‘llarga nigoh tashlab ber.

Bejiz lab ochishga oshiqma bir dam,
Hali fursat bordir xayru xo‘shlarga;
Gullarga saboq ber vafo ilmidan,
Muhabbat qo‘shig‘in o‘rgat qushlarga.

Bo‘ylaring atriga g‘unchalar xumor,
Nafasingni sezib tonglar jilmaydi.
Oniy tabassuming kabi betakror –
Bu bahor, bu bahor qaytib kelmaydi!

Ko‘zlarim qa’riga ko‘milar olam,
Dilni dasta-dasta ash’or qilgan – Sen.
Sen kabi yashnashni bilmaydi ko‘klam,
Kel endi, bahorni bahor qilgan – Sen.

2010-yil, mart – avgust

TASKINLAR

Yaxshiyam, so‘lishin bilmaydi gullar,
Hali ne bo‘lishin bilmaydi gullar.
Bo‘lmasa, ochilmay qo‘yardi.

Xayriyat, hozircha bilmas barini –
Hayotning xurmacha hunarlarini.
Yo‘qsa, dil sochilmay qo‘yardi.

Ming shukur, so‘zlarni bo‘lmaydi aldab,
Aks holda, she’rimiz fitnakor atab,
Haq bizni kechirmay qo‘yardi.

2011-yil 16-noyabr

***
Har kimga ham nasib etmaydigan Baxt
Zarra nigohimga bo‘lganida zor,
Javobimni kutib poylab tursa Vaqt,
Barini rad etsam takror va takror;

Mazlum ko‘zyoshiga qoqilmay deb bot,
Dorda yurgan kabi hushyor qadam-la –
Qo‘llarimda langar, so‘rasam najot,
Saodat tongiga eltsa bu g‘amlar.

Nogahon Ruh qushi tilga kirganda,
Asli kim ekanim tuyqus angladim.
Sip-silliq ko‘chalar chorlab turganda,
Men shu baxtiqaro yo‘lni tanladim.

Nechun chorlayverar sir to‘la samo?
Balki, kimdir bizga ilhaq ko‘kda ham.
Uchib ketgim kelar yulduzday, ammo
Yerda Odam tanqis, bunda Odam kam.

Hamon imlayverar yulduzlar zimdan
Tangrining beminnat nazari ila –
Oyoq uzgim kelmas mushfiq Zamindan,
Vidolashgim yo‘qdir maysalar bilan!

2011-yil 7 – 8-aprel

***
Ishingiz bo‘lmasa chekishdan bo‘lak,
Keragidan ortiq bo‘lsa vaqtingiz.
Havoni zaharlab qilsangiz ermak,
Hatto o‘zingizga kelmay rahmingiz.

Qoching, xalal bermang, bo‘shating yo‘lni,
Behuda bir nafas ortiqdir bu dam.
Bizdaylar uchun ham qon qilib dilni,
Najot so‘rash uchun ketmoqda Odam.

2010-yil 12-iyul

***
Alam qilmay qo‘ydi hech biri,
«Chiq» deydi-yu, o‘zi chiqmas Vaqt.
Men Hayotni boricha suydim,
Har tomonda, har qadamda Baxt.

Ozor sanchmas yurakka ortiq,
Bu gullarning ifori o‘zga.
Kechagi jo‘n, sovuq odamlar
Juda issiq ko‘rinar ko‘zga.

Allaqachon ovutib oldim
Ko‘nglimni(ng) sho‘r ko‘z yoshin artib.
Hammasini kechirib bo‘ldim
O‘zgalaru o‘zimdan tortib.

Qanday yovuz kuchlar bor bunda,
Bilmaganim yaxshi – bilmadim.
G‘o‘r mavsumdan roziman, shaksiz,
Xato qilib xato qilmadim…

2009-yil, iyun

HAYOT

Goho toqat yetmay noz-firog‘iga,
Ma’shuqday astoydil bo‘lsam-da xafa,
Javoblar bermasam qo‘ng‘irog‘iga,
Ko‘nglimni olish-chun uringan daf’a.
O‘zimni ko‘zidan yiroq tutsam ham,
Achchiq-achchiq gaplar aytib, kamiga,
U haqda tushkunroq baytlar bitsam ham,
Turfa xil ta’nalar tirkab nomiga;

Ko‘nglimni so‘ramang, asti so‘ramang,
Men uni, baribir, yaxshi ko‘raman!

2010-yil 3-noyabr

***
Har lahza tiyilish azobiga band,
Yurak – qafasdagi nekbin orzumand.
Zulmat mil tortishga chog‘lanar harchand,
Mudom shamsi anvar ko‘zimga payvand.

2010-yil 18-dekabr

***
Chiqib ketsa edi shu iblis qondan,
So‘ng topa olmasa manguga izim.
Bir Hayot boshlasam o‘shal hur ondan,
O‘z oldimda shuvut bo‘lmasa yuzim.

Qaytadan tozarsam – sevsam qaytadan,
Chalg‘itmasa mash’um xayollar bir zum,
Arsh sari zinalar qo‘ysam tavbadan,
Saodat asrini eslatsa umrim…

2010

TAVALLO

Har kim o‘z qismati qoshida yolg‘iz,
Garchi atrofimda do‘stlar bor – xolis,
Ular ummondagi xas kabi ojiz,
O‘zingdan o‘zgaga aytar dardim yo‘q.

Og‘ir bu yillarning toshi yengilmi,
Birov yecholmadi tilsim sevgimni,
Uchratmasang, qaydan topay tengimni,
O‘zingdan o‘zgaga aytar dardim yo‘q.

Umrimni cho‘qilab zog‘lar almashdi,
Yo‘qolib-yo‘qolmay dog‘lar almashdi,
Yelkamdan tusholmay tog‘lar almashdi,
O‘zingdan o‘zgaga aytar dardim yo‘q.

O‘ylarim kishanda, ko‘nglim kishanda,
So‘radim – so‘rashni qilmadim kanda,
Avliyo bo‘lsa ham bandasi – banda,
O‘zingdan o‘zgaga aytar dardim yo‘q.

Savob-u gunohda beqarordirman,
Ajab, shu holimga serviqordirman,
Umidsizlik aro umidvordirman,
O‘zingdan o‘zgaga aytar dardim yo‘q!

2009-yil 5-avgust

QAYTISH

Tinch qo‘ymaydi savollar – sarkash,
Ko‘ksimga o‘q otgani-otgan.
Biror chora so‘rasam dil g‘ash,
Olamlari sukutga botgan.

Yig‘lab borsam, ho‘ngrab chiqqaylar,
Tabiblarim o‘zimday xasta.
Bechorahol, ma’yus boqqaylar,
Hammasining ko‘ngli shikasta.

Kimga aytib, kimga yolvorsam,
O‘z g‘amidan ortolgan kim bor?
Etagidan tutay deb borsam,
Murshidimning o‘zi pirga zor.

So‘rab-so‘rab tilim tolmadi,
Qani boshim to‘sar cho‘girma?
Meni hech kim qabul qilmadi,
Endi Sen ham yuzing o‘girma.

2009-yil 28-aprel

***
Masjidga o‘xshasa edi bu dunyo,
Ishonch birlashtirsa odamiyatni.
Oqibat degani bo‘lmasa ro‘yo,
Hech kas yo‘qotmasa or, hamiyatni…

Hamma tarqalmoqda dilga berib zeb,
Yana otash oldi yurakda bir Cho‘g‘.
Mehrimni ehsonday ulashayin deb
Tashqariga chiqsam, poyabzalim yo‘q.

2010

***
Bardosh libosining iplari tig‘dan,
Amallab kiydingmi, yechishdan ne naf?
Ko‘zingni yashirma ko‘ngli munglug‘dan,
Seva olish sharaf, sevilish sharaf.

Daqyonusdan qolgan bu dahri dunda
Bir yangi zarraday ko‘zga ilinsam.
Murodim gullari ochilgan kunda
Ne tong, yashash uchun mahkum qilinsam!

So‘nggi nafasgacha eshiklar ochiq,
O‘z holidan o‘zi gumonda gumon.
Nazdimda, ko‘rmagan bu qadar Oshiq
Bir tomchi Diydorga g‘arq bo‘lgan jahon…

2008-yil, noyabr

***
Rahmatingmi, zahmatingmi bu –
Ado qildim o‘zimni o‘zim.
Ne-ne qalbga yo‘l ko‘rsatdi-yu,
O‘z-o‘zimga o‘tmadi so‘zim.

Cheklab-cheklab charchadim o‘zni,
Tekis joydan yurmadim atay.
Menga bergin o‘sha bir So‘zni,
Dunyodan keng dunyo yaratay.

2010-yil 1-iyul

***
Rahmatiga ixlos aylab zahmat cheksang,
Og‘riqlaring halovatga aylansalar.
Dil bog‘iga alvon-alvon gullar eksang,
Xushbo‘ylari salavotga aylansalar.

Marvaridday lahzalarni yiqqaningda,
Ufqlar sari manzur-manzur boqqaningda,
Kamtarlikning cho‘qqisiga chiqqaningda,
Ta’zimlaring salobatga aylansalar.

Yolg‘iz Uning yodi birla o‘yga cho‘msang,
Yolg‘onlarni qaytib chiqmas joyga ko‘msang,
Orom chog‘i ko‘zni qo‘rqmay, qo‘rqmay yumsang –
Uyqularing ibodatga aylansalar.

Tomiringda oqar hayot nashidasi,
Har qadaming – tiriklikning qasidasi,
Bir o‘zgarib g‘amnok dunyo xaritasi,
Anduhlari saodatga aylansalar.

Tafakkurdan qanot bog‘lab ko‘kka uchsang,
So‘ng yurakning suxanida gavhar sochsang,
Jumla jahon baxtin so‘rab kafting ochsang –
Duolaring ijobatga aylansalar…

2010-yil 11-sentyabr

***
Ulardan nom so‘rab qancha yalindim,
Yoddan chiqmas qilib nomlab ber meni.
Bo‘lindim, mingga, yuz mingga bo‘lindim,
Bitta qiyofaga jamlab ber meni.

2009-yil 21-iyul

***
Haddan ortig‘ini so‘ramadim-ku,
Bejiz sovurmayin ko‘zim nurini.
O‘tinib tiladim, ahvolim tang-u,
Faqat zarurini, eng zarurini.

Yuzimgacha toshib chiqdi gunohlar,
Nochor qochib yurdim turfa nazardan.
Ulkanlashib borar ko‘ksimda dog‘lar,
Bezorman, o‘zimdan tamom bezorman!

Yashashni o‘rgat, ey buyuk Murabbiy,
Novvotga aylantir yurak sho‘rimni.
Butun qilib bergin xayollar kabi
Har joyga sochilib yotgan umrimni…

2010-yil 10-fevral

IBRAT

Gadosifat boyni ham,
Dengiz yutgan soyni ham,
Igna kirgan joyni ham
Bir Zot ko‘rib turibdi.

El oshagan oshlarni,
Yerni o‘pgan boshlarni,
Pinhon-pinhon yoshlarni
Bir Zot ko‘rib turibdi.

Kim ortimdan otmish o‘q,
Kim soyamga qilar do‘q,
Adovatim, ginam yo‘q –
Bir Zot ko‘rib turibdi.

Diling sog‘mi yo bemor,
Iching ichida ne bor,
Garchi to‘rt yoning devor,
Bir Zot ko‘rib turibdi.

Parda shitirlashidan
Nega qo‘rqasan, ey, tan,
Pardasiz nuri bilan
Bir Zot ko‘rib turibdi.

Behzod, gul ek izingga,
Hazir bo‘lgin so‘zingga,
Har ne qilsang – o‘zingga,
Bir Zot ko‘rib turibdi.

2009-yil 26-iyun

***
Isyon bo‘lib isyon emasdi bu his,
Iymon bo‘lib iymon emasdi bu his,
Ammo sira tinchlik bermasdi bu his,
Panohingdan boshqa borar joy yo‘qdir.

Vohkim, ma’lumoti oliy telbaman,
Oson yengilaman, oson yengaman,
Manov ko‘piklarga qandoq singaman,
Panohingdan boshqa borar joy yo‘qdir.

Tushunib bo‘larmi hayot darsini,
Ado etarmanmu farzu qarzini,
Kim g‘arazsiz tinglar yurak arzini,
Panohingdan boshqa borar joy yo‘qdir.

Takror-takror aytdim, dil yorib aytdim,
Bosh olib ketdim-u, yolvorib qaytdim,
Kul et, g‘azabingni keltirsa baytim,
Panohingdan boshqa borar joy yo‘qdir.

Bir yorug‘ duoga aylandi umrim,
Nur bo‘lib qoshingga shaylandi umrim,
So‘zingga, O‘zingga boylandi umrim,
Panohingdan boshqa borar joy yo‘qdir.

2010-yil 20-sentyabr

***
Ko‘ksim og‘rigani og‘rigan, yo Rab,
Yurak oh degani oh degan, yo Rab,
Vijdon do‘qlagani do‘qlagan, yo Rab,
Naylay?

Tiyilmagan hislar, tiyilgan ko‘zlar,
Aytilmagan so‘zlar, deyilgan so‘zlar,
Bo‘g‘zim qafasida bir bulbul bo‘zlar,
Naylay?

Kimlar deb kimlarga boshimni egdim,
Jafolar ustiga jafolar chekdim,
O, o‘zim o‘zimning jonimga tegdim,
Naylay?

Olislab boradi orzu yelkani,
Alamlar qiladi bir xas ekaning,
Yashayman deganim – o‘ldim deganim…
Naylay?!

2011-yil 16-mart

***
Kechagina olam misli jannat edi,
Evoh, nafas olishim ham san’at edi.
Tufroq bo‘lgan yaproqlardan hikmat o‘qib,
Boshim egib turishlarim savlat edi.

Parcha-parcha yillar aro to‘lg‘onaman,
Qachon qayta o‘chmas bo‘lib uyg‘onaman?
Ne ajabkim, boshqasiga royish bermas,
Ko‘nglim gulin o‘zimdan ham qizg‘onaman.

2011

TOG‘ISTON

Ko‘nglimning ko‘zida porladi hayrat,
Olloh, bugun Ceni toshda ham ko‘rdim!
Qoyalar borliqqa berganda ziynat,
Bulutga boshimni qo‘yib ulgurdim.

Kechir, tog‘ qalbimni toqqa burmabman,
Chorlasa bormabman zangor kengliklar.
Yuksakka yuksakdan boqib ko‘rmabman,
Tegramda yalpayib yotmish do‘ngliklar.

Keldim. Bu soflikdan xijolatdaman –
Ozor topmasmikan nigohim tushsa?
Lazzatga ko‘milib tasbeh aytarman,
Gar obid giyohlar safiga qo‘shsa.

Zilol tuyg‘ularda ko‘ksimni chaydim,
Vujudga shavq berdi ruhiy tahorat.
Cho‘qqilar boshida bir hikmat tuydim:
Yaratsang har neni tog‘ kabi yarat.

Faqat bir hadikdan xayolim tilka,
Yo‘liqmasam edi beparvolikka.
Yashab qolay desam bu mag‘rur o‘lka
Qabul qilarmikan fuqarolikka?

2009-yil 28 – 29-mart

***
Shamollar abadiy, yomg‘irlar mangu,
Bizdan so‘ng ham oppoq qorlar qoladi.
Shaksiz, yashayverar quvonchu qayg‘u,
Izhorlar, iqrorlar, zorlar qoladi.

Ming yillarki, aslin o‘zgartmas tog‘lar,
Salobati o‘sha, viqori o‘sha.
Tarovati so‘nmas dilovar bog‘lar –
Hanuz toshqin hislar talpingan go‘sha.

Bexos takror-takror chorladim, chog‘i,
Yaproqlar tizilib keldi so‘zimga.
Qobirg‘asi singan xazonlar ohi
Ohangdor hasratdek tuyulmas kimga?

Shunchaki taqlidga o‘xsharmi bu hol –
Demangiz, bu faqat ilhom onlari.
Ruhimda yashadi shunday bezavol
Hayot degan she’rning qahramonlari.

Shamollar. Yomg‘irlar. Daryolar. Tog‘lar…
Azal nafasini keltirgay abad.
Yaproqlari oyat o‘qigan bog‘lar…
Tabiat tilida ilohiy suhbat.

2011-yil 22-noyabr

QORSHE’R

Osmon bodroq to‘kdi kun bo‘yi –
Borliq qo‘yni to‘la oppoq dur.
Tabiatning bu kumush to‘yi
Bo‘g‘otlarga ulashar huzur.

Ko‘pni ko‘rgan og‘ochlar yana
Yelkasiga olar bor yukni.
Hali davom etar tantana –
Asrash kerak har noziklikni

Keksa mo‘ri zerikmas chekib,
Lek havoni qilmas bemaza.
Izg‘irinning qalami tegib
Gulzor bo‘lib ketdi deraza.

Oqqush bo‘lib qanot yozaylik!..
Xayollarning yo‘qdir poyoni.
Tashqariga shoshar go‘zallik
Sharfga o‘rab olib hayoni.

Poklik chulg‘ab borar har yerni,
Oqlik inar dalayu boqqa.
Ayozkotib eng dilbar she’rni
Dog‘ yuqtirmay ko‘chirar oqqa…

2008-yil 22-dekabr

NASHIDA

O‘shanda ham navbahor edi –
Borliq zangor, dunyo navqiron.
Kurtaklarga gapim bor edi,
Yurak tilga kirganda biyron.

Yana o‘rik shoxlari sarxush,
Gulob tutar nimpushti, oppoq.
Kecha edi egnida kumush,
Bugun zumrad to‘n kiymish chorbog‘.

Butoqlardan mo‘ralar umid,
Kamol va’da etar g‘unchalar.
Nimagadir bo‘lganday shohid,
Shabboda bir sohir kuy chalar.

Sochlarini suvga taratib
O‘ltiribdi majnuntol shaydo.
O‘z-o‘zidan chiroy yaratib
Borgan sari tabiat zebo.

Ko‘kda rangin hislar jamuljam,
Jilvasidan qamashadi ko‘z.
Puchmoqdagi so‘nggi qorni ham
Eritadi hademay Navro‘z!

2010-yil 14-mart

***
To‘rt devor orasi hayot ekanmi!
Yorib chiqqing kelar nogoh kuch topib,
G‘urbat eshiklarin manguga yopib,
Dimog‘ing chog‘ etar Tiriklik ta’mi.

Sen bilgan dunyoga o‘xshamas dunyo,
Lojuvard samoda tengsiz tarovat,
Ko‘klam bo‘lib kezar boqiy nazokat.
Bu kun bor umringga tatiydi go‘yo.

Shu qadar yaqindir visolning yo‘li,
Haqiqat rangiga uyg‘undir tushlar,
Lolalar ko‘zingni yondira boshlar,
Bahorning otashin nigohi bo‘lib.

2011-yil 8-mart

KO‘KLAM HIKMATI

Shunchalar o‘tkirmi haqiqat – xanjar,
Endi maysa unib chiqqanda toshdan.
Kechagina nur deb elangan jonlar
Bugun qocha boshlar Quyoshdan.

2011-yil 24-mart

AYOZ

Achchiq sovuq, jimirlar eting,
(Ko‘pni ko‘pga qo‘shmas zabunlik.)
Qotib qolar bir zum saboting,
Jondan o‘tib ketgach yupunlik.

Olislardan kelganding oqib,
Yashamoqchi eding odamday.
Jovdiraysan oftobga boqib
Bevaqt gulga kirgan bodomday.

Omonatni omon yetkarsang,
Ikki dunyo yorug‘dir yuzing.
To‘qsonini shuytib o‘tkarsang,
Qanday bo‘lar ayamajuzi?

Yodga tushar shamday hayoting,
Laqillashni bas qilging kelar.
Yo sandalda qo‘r bo‘lging yoki
Tarnovlarda osilging kelar…

2011-yil 27-fevral

***
Suqi filni qulatar, ko‘z degan yomon ekan,
O‘tolmaysan bahridan, yuz degan yomon ekan.
Qandoq qilib tilimga endi chilvir bog‘layin,
So‘z degan yomon ekan, so‘z degan yomon ekan…

2008-yil, sentyabr

BЕGONALAR

Yonimdagi uzoq odamlar,
Yuragimga tuzoq odamlar.

Mayli edi, bo‘lsa begona,
Ular menga qondosh, hamxona.

Aybim shudir, jinday fe’lim chars,
Bir qo‘ldan ham chiqar ekan qars.

Achinganday bo‘larlar tag‘in,
Osmon menga ulardan yaqin.

Ko‘kragimdan ko‘chirib muzlar,
Tushunadi meni yulduzlar.

Dardlashaman tun bo‘yi dildan
Olis-olis yaqinlar bilan.

2009-yil 7-yanvar

***
Yolg‘on, yolg‘on, yolg‘on hammasi,
Faqat iymon, faqat iymon haq.
Har manzilda fano hamlasi,
Aro yo‘lda joning muallaq.

Qo‘llar qisqa, orzular mayib,
Qonga to‘ymas armon xanjari.
Nechun olam borar torayib
O‘sgan sari, ulg‘aygan sari?

Parvo qilma, faryod aylama.
Kunlaringni nurga qondirgin.
Chuqur ketma, ortiq o‘ylama,
Faqat yongin, faqat yondirgin.

2009-yil 31-avgust

***
Endi qo‘lga olganda sozim,
Og‘zim kuydi, sindi ovozim.
Alamiga kuylashim lozim,
Takror-takror imkon so‘rayman.

O‘z-o‘zimga yetarmi kuchim,
Hasrat g‘amga bo‘lolmas yechim,
Garchi misli qiyomat ichim,
Xotirjam bir iymon so‘rayman.

Kimning kayfi uchun bu o‘yin –
Mag‘lublari oldindan tayin,
G‘oliblarga undan-da qiyin,
Sotilmagan maydon so‘rayman.

2009-yil 2-avgust

***
To‘g‘ri, zuvalada bori muqarrar,
Alqissa, samar yo‘q yoqa yirtishdan.
Faqat or qilaman, etaman hazar
Ularga tenglashib sarqit titishdan.

O‘ksitma, ruhimni cho‘ktirma, Egam,
Yo‘limni tilagim qadar oq qilgin.
Yuksak-yuksaklarga arzimasam ham,
Shularning oldida balandroq qilgin.

2009-yil 26-avgust

O‘RTAR

G‘ussalardan oltin qafas qurgandayman,
Laxcha-laxcha cho‘g‘ ustida yurgandayman,
Bu dunyoda ijarada turgandayman,
Tole’ degan qilmas pisand, Mashrab bobo.

Yengilgina qo‘shiqlari yallo-yallo,
Oyoqlarning ostindagi loymi, tillo?
Kaminaning taxallusi chalamullo,
Tutumim ham shunga monand, Mashrab bobo.

Nega keldim manov g‘urbat makoniga?
Tutib berdim o‘zimni g‘am paykoniga,
Ko‘zim kuydi kirib sevgi do‘koniga,
Jandangizdan olmadim pand, Mashrab bobo.

Tomirimdan kuylar oqar – suvoraman,
Ko‘zyoshlari zavq ulashgan favvoraman,
O‘z-o‘zimni avrash bilan ovoraman,
Ko‘nglim siniq, dilim dardmand, Mashrab bobo.

Yo‘l yuraman, mo‘l yuraman, yo‘lim yetmas,
Xirojiga na jonim, na molim yetmas,
Yigirma besh yildan beri qo‘lim yetmas,
Etagingiz buncha baland, Mashrab bobo?!

2008-yil, oktyabr

***
Hali o‘ttizni ham qoralamadim,
To‘ymadim tuyg‘ular tarovatiga.
Bir yayrab gulbog‘lar oralamadim,
Qonmadim g‘unchalar latofatiga.

Garchi og‘ir-vazmin she’r bitdim talay,
Garchi tafakkurga yon berdim ko‘proq,
Hayotdan falsafa so‘qdim-u tinmay,
Ammo… yuragimda ming bitta jumboq.

O‘yladim, javobi topilmas harchand,
Og‘izga kelganin so‘ylamadi til.
Go‘dak xayollarni qilmayin pisand,
Jiddiy o‘ylar sari bo‘ylayverdi dil.

Mung‘ayib nelarni o‘ylayman bot-bot,
Bezovta ruhimning bormi malhami?
Yengillasharmidi men bilgan hayot?
To‘lib qolarmidi dunyoning kami?

Kechaning o‘ylari, bugunning g‘ami,
Ertangi xayollar – bari mushtarak.
Hali olisdadir umrimning shomi,
Baribir, yashashga to‘ymasam kerak!

Baribir, qo‘ymadim o‘zni qiynashni,
Shukurki, so‘zlarim chiqmas halqumdan.
Oh, men ham bilaman o‘yin o‘ynashni,
Faqat… uyalaman dardkash xalqimdan…

2011-yil 28 – 29 noyabr

DASHNOM

Ey, og‘ziga kuchi yetmagan,
To‘g‘ri gapga tishi o‘tmagan!
Noqis dunyo yaralibdiki,
Toshterarning ishi bitmagan.

Daxmaza-yu g‘avg‘oyingni qo‘y,
Puch yong‘oqday da’voyingni qo‘y.
Nolish narvon bo‘lolmas ko‘kka –
Yengil-yelpi oh-voyingni qo‘y.

Baxil bog‘i yantoq bo‘ladi,
Ilk musht tukkan qo‘rqoq bo‘ladi.
Oyog‘ingni botirmay tursang,
Shu daryolar pokroq bo‘ladi…

2009-yil, aprel

***
Keting, ey, daf bo‘ling, zolim xayollar,
Ko‘nglimga toshlarday og‘ir botdingiz.
Malollar keldingiz jonga, malollar,
Bilmam, qachon bunda ildiz otdingiz.

Umrimning egovi bo‘ldingiz ko‘p bor,
Keting! Ortingizdan rahmatlar yo‘llay.
Qancha shahlo ko‘zlar yo‘limda xumor,
Men ham bir ularga intizor bo‘lay.

Andak orom olsin sargashta ruhim,
Hali manzil uzoq, hali kurash ko‘p.
Hozircha hasratga o‘xshaydi ohim,
Hozircha yurakda alahsirash ko‘p…

Keyin do‘q uraman, qo‘ymaydi cho‘chib,
Ularga bas kelish – amri mahollar.
Oyog‘imdan tortib, bo‘ynimdan quchib,
Avrab olaverar makkor xayollar.

2011-yil 30-noyabr

***
Balosiz – go‘yoki g‘amimni yeysiz,
Zahardan o‘tkirroq choy berib qo‘yib.
Tortinmay bemalol o‘tiring, deysiz,
Ignaning uchidan joy berib qo‘yib.

2010-yil 14-sentyabr

***
Menga zarurmidi shunaqa yashash,
Qog‘ozga to‘kilib bormoqda umrim.
Orzular oldinda, ammo ko‘ngil g‘ash,
Ko‘zlarim, so‘zlarim yonayotir jim.

Chopaman nenidir izlagan bo‘lib,
Topmoqchi bo‘laman nedandir taskin.
Shunchalar uzunmi yo‘lsizlik yo‘li,
Shunchalar haqirmi odamzod – miskin?

Eyvoh, tubanlikning yo‘rig‘i ko‘pdir,
Bir onda ming imkon maydalashgani.
Ayalgan ko‘zlarning jazosi cho‘pdir,
Mudom ta’qib etar zavol nashtari…

Menga zarur edi shunaqa yashash,
Illo, zoye ketmas yoniq so‘zlarim.
Dardlarim davrimning dardiga tutash,
Umrimni shamolga sotmas ko‘zlarim.

2011-yil 14 – 16-dekabr

***
Bilmaysan va buni istamaysan ham,
Yaproqlar tushundi, toshlar angladi.
Har tomon tarqalmish – Yer to‘la odam,
Nega Taqdir aynan meni tanladi?

Bir kunda necha bor tug‘ilish, o‘lish…
Ruh g‘olib kelarmi yoki Vujud zo‘r?
Jonimni timdalar bo‘linish, so‘nish…
Tiriklik qadrini mendan so‘rab ko‘r.

Havolar almashsin, och eshigingni,
Men bo‘lsam bir imkon axtarib keldim.
Bilsayding naqadar baxtliligingni,
Borimni shu Baxtga alishar edim…

2008-yil 2-noyabr

***
Ko‘zim toldi – kutmoq dardi og‘ir ekan,
Yo‘lga qarab o‘tmoq dardi og‘ir ekan.
Bariga-ku chidash mumkin, lek har nafas
O‘z-o‘zingni titmoq dardi og‘ir ekan.

2010-yil 2-oktyabr

***
Chig‘iriqdan o‘tar har qilmish,
Gohi yolg‘on, gohi rostim bor.
Bisotimda Ko‘ngil atalmish
Dushmandanam battar do‘stim bor.

Sahrodagi yaproq misoli
Qayon essa ermak shamolga.
Hayotimga sig‘mas xayoli,
Borlig‘imni ko‘mdi savolga.

Vaholanki, tushunmay xulqin,
O‘ltiribman ra’yiga qarab.
Bir yashnaydi, bir kuni so‘lg‘in –
O‘zgargani o‘zgargan, yo, Rab!

Ro‘paramda turar eshilib,
Ko‘zyosh qilar, goh musht o‘qtalar.
Ayniyapman unga qo‘shilib,
Izlarimda benur nuqtalar.

Kuni bormi qiynamaydigan?
Meni abgor etadi shu yuk.
O‘z do‘stini o‘ylamaydigan
Ko‘ngilshohning nimasi buyuk?

2008-yil 26-oktyabr

***
So‘z izlab sargardon, so‘z ichra zorman…
Gapdon davralardan qochib ketdi til.
Diqqinafas xona, sendan bezorman,
She’r yasab o‘tishga hayo qilar Dil.

Yozganlarim sari ortib borar g‘am,
Dardlarimni aytsam, nolishga yo‘yma.
Nopok qadam bilan qoshingga borsam,
Hayda, Adabiyot, ichkari qo‘yma!

2008-yil, avgust

MAYDON
1
Oydinda ot o‘ynatdim,
Yonsin-yonsin yulduzlar.
Dilbuloqni qaynatdim,
O‘ngurlarda tosh muzlar.

Dog‘lar bosib yuzini
Oy uxlar qay qo‘yinda?
Nur yo‘qotdi o‘zini
Halol-harom o‘yinda.

Yolg‘on yotar bolalab,
Or alamda qovrilar.
Yaltir-yultur shon talab,
Kimga qoldi davralar?

2
Yurak chiqdi qinidan,
Dunyolarga sig‘mayman.
O‘lganimning kunidan
Qo‘shiq aytib yig‘layman.

Ko‘ksingni nur dog‘lasa,
Yorug‘ niyat bo‘ladi.
Yigit oshkor yig‘lasa,
Elga uyat bo‘ladi.

O‘rningizni qizg‘oning,
Asli toza mardlarim.
Uyg‘oning-a, uyg‘oning,
Ay, polvoncha dardlarim!

2008-yil, mart

***
Bir ko‘zimda otash, bir ko‘zimda suv,
Ikki daryo aro omonat tog‘man.
Lab tegmagan so‘zlar – suluvdan-suluv,
Alarning ko‘yida dalliyu dog‘man.

Poyimda jon so‘rab ezildi tuproq,
Haqiqat qo‘shig‘i ekan sukutlar.
Sizni tushunaman o‘zimdan ko‘proq,
Boshimda yog‘olmay turgan bulutlar.

Bilmasam bo‘lmasdi bilmasligimni,
Qanday og‘ir ekan bilmaslik ilmi.
Yo bor etar yoki yo‘qotar meni
So‘zlarning lutfiyu so‘zlarning zulmi.

2008-yil, noyabr

***
Men qidirgan so‘zlar lug‘atlarda yo‘q,
Men talpingan hayot qayda – bilmadim.
O‘ylagan qiyofam suratlarda yo‘q,
Orzular orzusin pisand qilmadim.

Lahzalik umrimga berolmay ma’no,
Pardalar nariga surilmayotir.
O‘zim bir siqimcha tuproqman, ammo
Men izlagan dunyo ko‘rinmayotir…

2010-yil 11-mart

***
Hali so‘z aytarman O‘zga munosib,
Dunyoning umriga yetar parvozi.
Mayda gaplarimni ketajak bosib
Ichimdagi asl Inson ovozi.

2011

***
Tushungan tushundi, uqmagan uqmas,
O, bu so‘zlar deb naq aqlimdan ozdim.
Yurakning buyrug‘i har doim haqmas,
Rahmon ne buyursa, o‘shani yozdim.

2012-yil 10-fevral

NAJOT

Taqdir qanday tadbir etar ertaga?
Ko‘nglimda muqaddas niyat ko‘karar.
Kim qo‘lga ishonar, birov yelkaga,
Meni esa bir kun so‘zlar ko‘tarar.

Bor-u yo‘qlik bilan kelsam yuzma-yuz,
Izimdan ergashsa qora nuqtalar;
Iymonim so‘z erur, amalim ham so‘z,
O‘shanda ham meni so‘zlar qutqarar.

2009-yil 30-mart

SO‘NGSO‘Z

Qanot qilib eng uchqur so‘zni,
Yulduzlarni ettirib xirom,
Hammasiga chirt yumib ko‘zni
Shartta uchish kerak – vassalom!

2009-yil, iyun

Behzod FAZLIDDIN

So‘rayotganlar uchun:
Kitoblarimiz do‘konlarga chiqarilmagan. Mana bu raqamga telefon qilib, o‘zingizga qulay joydan sotib olishingiz mumkin: +93 544 98 33

Опубликовать в Facebook
Опубликовать в Google Plus
Опубликовать в LiveJournal
Опубликовать в Мой Мир
Опубликовать в Одноклассники
Опубликовать в Яндекс
Ўқишлар сони: 1 669

Добавить комментарий

Ваш e-mail не будет опубликован. Обязательные поля помечены *