Chap ko‘ksimda chiqmay yotgan oylarim ko‘p…

ИСТАК

Ўз бахтинг қадрини ўзинг билмасанг,
Ўзни ўзинг этсанг балога дучор,
Берган неъматига тоқат қилмасанг,
Бу дунёни ноҳақ айблашинг бекор.

Қара, йиғлаб қолди йиллар ортингдан,
Сен бой бериб қўйган лаҳзалар гирён.
Не чиқди дил деган бадбин юртингдан,
Нимага дунёни айблайсан, Инсон?!

Ёлғон дунё дейсан, бевафо дейсан,
Ўзинг бир бор унга қилдингми вафо?
Қалбинг хусуматга, ҳасадга ватан,
Асли, сенинг ўзинг – ёлғончи дунё!

Кўнгил деразасин чертди неча бор,
Сен қарши олдингми кўкламни кулиб.
Эритолмай қалбинг музларин зор-зор,
Баҳор қайтиб кетди бағрини тилиб.

Етар, маломатга нуқта қўй энди,
Эрк берма беҳуда нолаларингга.
Меҳринг ила ташна дилларни қондир,
Оқибатни ўргат болаларингга.

Илло, Ҳақ ишқи-ла бағрини ёқиб
Яшаган мардларга толе ёр бўлсин.
Ўз бахти кўзига ўзи чўп суқиб,
Дунёни қарғаган номард кўр бўлсин!..

2000


Юролмайман, оёғимда лойларим кўп,
Кучукчалар тишлаб олган жойларим кўп.
Осмонларга даъвогарлар бисёр экан,
Чап кўксимда чиқмай ётган ойларим кўп.

Юрагимни кемиради минг битта ўй,
Наҳот энди ялпизларим сочмайди бўй?!
Мен бандангнинг қўлларига ишонмайман,
Тангрим, энди Ўзинг мени турғизиб қўй!

2003

Беҳзод ФАЗЛИДДИН

“Онамнинг кўнглига кетамиз” тўпламидан (2003)

ISTAK

O‘z baxting qadrini o‘zing bilmasang,
O‘zni o‘zing etsang baloga duchor,
Bergan ne’matiga toqat qilmasang,
Bu dunyoni nohaq ayblashing bekor.

Qara, yig‘lab qoldi yillar ortingdan,
Sen boy berib qo‘ygan lahzalar giryon.
Ne chiqdi dil degan badbin yurtingdan,
Nimaga dunyoni ayblaysan, Inson?!

Yolg‘on dunyo deysan, bevafo deysan,
O‘zing bir bor unga qildingmi vafo?
Qalbing xusumatga, hasadga vatan,
Asli, sening o‘zing – yolg‘onchi dunyo!

Ko‘ngil derazasin chertdi necha bor,
Sen qarshi oldingmi ko‘klamni kulib.
Eritolmay qalbing muzlarin zor-zor,
Bahor qaytib ketdi bag‘rini tilib.

Yetar, malomatga nuqta qo‘y endi,
Erk berma behuda nolalaringga.
Mehring ila tashna dillarni qondir,
Oqibatni o‘rgat bolalaringga.

Illo, Haq ishqi-la bag‘rini yoqib
Yashagan mardlarga tole yor bo‘lsin.
O‘z baxti ko‘ziga o‘zi cho‘p suqib,
Dunyoni qarg‘agan nomard ko‘r bo‘lsin!..

2000


Yurolmayman, oyog‘imda loylarim ko‘p,
Kuchukchalar tishlab olgan joylarim ko‘p.
Osmonlarga da’vogarlar bisyor ekan,
Chap ko‘ksimda chiqmay yotgan oylarim ko‘p.

Yuragimni kemiradi ming bitta o‘y,
Nahot endi yalpizlarim sochmaydi bo‘y?!
Men bandangning qo‘llariga ishonmayman,
Tangrim, endi O‘zing meni turg‘izib qo‘y!

2003

Behzod FAZLIDDIN

“Onamning ko‘ngliga ketamiz” to‘plamidan (2003)

Добавить комментарий

Ваш e-mail не будет опубликован.