Rahm ayla, rahm ayla, yana rahm ayla…


Юборсанг Ўзингнинг ёнинггга юбор,
Чақирсанг Ўзингнинг қошингга чақир.
Кўзимдан кетолмай саргашта ғубор,
Номингни айтганга нажот бор ахир.

Ёдинг-ла банди эт саркаш хаёлим,
Бошқани ўйламай, бошқани демай.
Соҳиби қудратим, Соҳибкамолим,
Ўзгани Ўзингдай севдирма – севмай.

Қўрқаман Ёлғондан, қўрқаман Чиндан,
Ҳаётбахш сўзларга тилимни бойла.
Тазарру – мендандир, мағфират – Сендан,
Раҳм айла, раҳм айла, яна раҳм айла.

Манглайга Ошиқ деб дастхат битиб қўй.
Тоабад дунёга ишқим тушмасин.
Муҳтожман, бундан-да муҳтож этиб қўй –
Ўзингдан бошқага ишим тушмасин.

Нуқтача бўлолмай қотдим қаршингда,
Осий ҳисларимни буткул даф этгин.
Вужудим бахшийда, Руҳим бахшийда,
Севгимни Севгингга мушарраф этгин.

2010

Беҳзод ФАЗЛИДДИН


Yuborsang O‘zingning yoninggga yubor,
Chaqirsang O‘zingning qoshingga chaqir.
Ko‘zimdan ketolmay sargashta g‘ubor,
Nomingni aytganga najot bor axir.

Yoding-la bandi et sarkash xayolim,
Boshqani o‘ylamay, boshqani demay.
Sohibi qudratim, Sohibkamolim,
O‘zgani O‘zingday sevdirma – sevmay.

Qo‘rqaman Yolg‘ondan, qo‘rqaman Chindan,
Hayotbaxsh so‘zlarga tilimni boyla.
Tazarru – mendandir, mag‘firat – Sendan,
Rahm ayla, rahm ayla, yana rahm ayla.

Manglayga Oshiq deb dastxat bitib qo‘y.
Toabad dunyoga ishqim tushmasin.
Muhtojman, bundan-da muhtoj etib qo‘y –
O‘zingdan boshqaga ishim tushmasin.

Nuqtacha bo‘lolmay qotdim qarshingda,
Osiy hislarimni butkul daf etgin.
Vujudim baxshiyda, Ruhim baxshiyda,
Sevgimni Sevgingga musharraf etgin.

2010

Behzod FAZLIDDIN

Добавить комментарий

Ваш e-mail не будет опубликован.