Ramazon muborak!

Ассалому алайкум. Муборак Рамазон ойи қутлуғ бўлсин, азизлар!
Аслида, тирикликнинг ҳар они яшаш учун такрорланмас имкон, аммо Рамазон кунларининг, айниқса, рўзадор туйган лаҳзаларнинг файзини ҳеч нарсага қиёслаб бўлмаса керак. Шу муборак ой ҳурмати учун ҳам атрофга, одамларга пок назар билан боқишни, Аллоҳ розилиги йўлида севишни, бошқаларни ҳурмат қилишни, кечиришни, тушунишни, ёмонликларни унутишни, ўзимиз ва ўзгаларга зулм қилмасликни, кенгфеъл, самимий, очиқ юз бўлишни, иллатлардан қутулишни… қисқаси, Раббимиз буюрганидек яшашни ўрганайлик.
Назаримда, чинакам яшаш бу – ҳар лаҳзани Яратган розилиги йўлида ўтказишдир. Рамазон эса ана шундай яшашга ўргатиши билан ҳам қадрли. Ўша эски гап: Рамазон бизга ярашади, биз ҳам унга ярашайлик.
Моҳи Рамазон ҳаммамиз учун қутлуғ, файзу баракотли, кутган ва орзу қилганимиздан-да зиёда бўлсин. Айтилажак эзгу сўзлар кўп, насиб қилса, кўнгилга солганини изҳор этиб бораверамиз. Дуоларда бизни ҳам эслаб туринг.


РАМАЗОН

– Яна қанча қолди?
– Ҳали вақт борми?
– Ўтиб кетмадими?
Одатда маиший ҳаёт панжаларида сиқилавериб ўта майдалашиб кетган бу каби кундалик гаплар Рамазон кунлари, холисаниллоҳ айтилгани сабабми, бошқача чирой касб этади – улуғлашиб кетгандай бўлади. Азбаройи буюк саодатга восита бўлаётганидан синовларда тобланиб бораётган нафсингни ҳам яхши кўриб кетасан. Эвазига ифтор чоғи уни ҳаддидан оширмай сийлагинг келади. Юрак-юрагингдан шукрона сўзлари сизиб чиқади: Алҳамдилуллоҳ. Етказганига шукр!
Бир бандаси учун бундан ортиқ бахт борми!

Беҳзод ФАЗЛИДДИН

Assalomu alaykum. Muborak Ramazon oyi qutlug‘ bo‘lsin, azizlar!
Aslida, tiriklikning har oni yashash uchun takrorlanmas imkon, ammo Ramazon kunlarining, ayniqsa, ro‘zador tuygan lahzalarning fayzini hech narsaga qiyoslab bo‘lmasa kerak. Shu muborak oy hurmati uchun ham atrofga, odamlarga pok nazar bilan boqishni, Alloh roziligi yo‘lida sevishni, boshqalarni hurmat qilishni, kechirishni, tushunishni, yomonliklarni unutishni, o‘zimiz va o‘zgalarga zulm qilmaslikni, kengfe’l, samimiy, ochiq yuz bo‘lishni, illatlardan qutulishni… qisqasi, Rabbimiz buyurganidek yashashni o‘rganaylik.
Nazarimda, chinakam yashash bu – har lahzani Yaratgan roziligi yo‘lida o‘tkazishdir. Ramazon esa ana shunday yashashga o‘rgatishi bilan ham qadrli. O‘sha eski gap: Ramazon bizga yarashadi, biz ham unga yarashaylik.
Mohi Ramazon hammamiz uchun qutlug‘, fayz-u barakotli, kutgan va orzu qilganimizdan-da ziyoda bo‘lsin. Aytilajak ezgu so‘zlar ko‘p, nasib qilsa, ko‘ngilga solganini izhor etib boraveramiz. Duolarda bizni ham eslab turing.


RAMAZON

– Yana qancha qoldi?
– Hali vaqt bormi?
– O‘tib ketmadimi?
Odatda maishiy hayot panjalarida siqilaverib o‘ta maydalashib ketgan bu kabi kundalik gaplar Ramazon kunlari, xolisanilloh aytilgani sababmi, boshqacha chiroy kasb etadi – ulug‘lashib ketganday bo‘ladi. Azbaroyi buyuk saodatga vosita bo‘layotganidan sinovlarda toblanib borayotgan nafsingni ham yaxshi ko‘rib ketasan. Evaziga iftor chog‘i uni haddidan oshirmay siylaging keladi. Yurak-yuragingdan shukrona so‘zlari sizib chiqadi: Alhamdilulloh. Yetkazganiga shukr!
Bir bandasi uchun bundan ortiq baxt bormi!

Behzod FAZLIDDIN

Добавить комментарий

Ваш e-mail не будет опубликован.