She’r – ohangga yo‘g‘rilgan tavba…


Шеър бу – гуноҳ, шеър бу – пушаймон,
Шеър – оҳангга йўғрилган тавба.
Шеър – комиллик истаган иймон,
Шеър – муҳаббат, изтироб, зарда.

Қалам менга меросми қолган,
Бўларманми нажотга ноил?
Ҳар балони ўзига олган
Бағри куюк юрагим – шоир.

Фурсат – қисқа, кунлар – мухтасар,
Сўз сўрарман мисоли гадо.
Чала қолар яна шоҳ асар,
Шеър ярмида бўлурман адо…

Иймони бут бўлсин, илойим,
Мендай ғамга мойил бўлмасин.
Шунча дардманд етар, Худойим,
Болам бўлсин, шоир бўлмасин.

2009 йил

Беҳзод ФАЗЛИДДИН


She’r bu – gunoh, she’r bu – pushaymon,
She’r – ohangga yo‘g‘rilgan tavba.
She’r – komillik istagan iymon,
She’r – muhabbat, iztirob, zarda.

Qalam menga merosmi qolgan,
Bo‘larmanmi najotga noil?
Har baloni o‘ziga olgan
Bag‘ri kuyuk yuragim – shoir.

Fursat – qisqa, kunlar – muxtasar,
So‘z so‘rarman misoli gado.
Chala qolar yana shoh asar,
She’r yarmida bo‘lurman ado…

Iymoni but bo‘lsin, iloyim,
Menday g‘amga moyil bo‘lmasin.
Shuncha dardmand yetar, Xudoyim,
Bolam bo‘lsin, shoir bo‘lmasin.

2009-yil

Behzod FAZLIDDIN

Добавить комментарий

Ваш e-mail не будет опубликован.