Men dunyoga she’r dardini berib ketay…


Юрак, битта шеър туғиб бер, болам бўлсин,
Доялари қўлим бўлсин, қалам бўлсин.
Ҳисларингни эрмак қилган тошчаларга
Икки дунё етиб-ортар алам бўлсин.

Жонимга жон жонлар аро эриб кетай,
Дардларини, гардларини териб кетай.
Кейин шеърсиз туролмасин, туролмасин,
Мен дунёга шеър дардини бериб кетай.

2002


Биламан, бу йўлнинг шартлари оғир,
Бу йўлдан шунчаки ўтиб бўлмайди.
Ғамлари бешафқат, дардлари оғир,
Бу йўлдан шунчаки кетиб бўлмайди.

Лекин ортга қайтиб нима қиламан,
Сўзлар нажот сўраб бақираверса?
Худойим, мен қандай ухлай оламан,
Тушимда Хизрлар чақираверса?

Энди дардлар мени тарбиялайди,
Ўткинчи ҳислардан қочиб бораман.
Яна юрагимда шеърлар гуллайди,
Ўзимга ўзимдан кечиб бораман.

Барибир, йилларга бермас эдим тан,
Бошқа манзилларга рўбарў этса.
Тангрим, қисматимдан минг бор розиман,
Мени шу йўл бир кун Ўзингга элтса.

2004

Беҳзод ФАЗЛИДДИН


Yurak, bitta she’r tug‘ib ber, bolam bo‘lsin,
Doyalari qo‘lim bo‘lsin, qalam bo‘lsin.
Hislaringni ermak qilgan toshchalarga
Ikki dunyo yetib-ortar alam bo‘lsin.

Jonimga jon jonlar aro erib ketay,
Dardlarini, gardlarini terib ketay.
Keyin she’rsiz turolmasin, turolmasin,
Men dunyoga she’r dardini berib ketay.

2002


Bilaman, bu yo‘lning shartlari og‘ir,
Bu yo‘ldan shunchaki o‘tib bo‘lmaydi.
G‘amlari beshafqat, dardlari og‘ir,
Bu yo‘ldan shunchaki ketib bo‘lmaydi.

Lekin ortga qaytib nima qilaman,
So‘zlar najot so‘rab baqiraversa?
Xudoyim, men qanday uxlay olaman,
Tushimda Xizrlar chaqiraversa?

Endi dardlar meni tarbiyalaydi,
O‘tkinchi hislardan qochib boraman.
Yana yuragimda she’rlar gullaydi,
O‘zimga o‘zimdan kechib boraman.

Baribir, yillarga bermas edim tan,
Boshqa manzillarga ro‘baro‘ etsa.
Tangrim, qismatimdan ming bor roziman,
Meni shu yo‘l bir kun O‘zingga eltsa.

2004

Behzod FAZLIDDIN

Добавить комментарий

Ваш e-mail не будет опубликован.