Мен Сиз билан Бахтга бораман…

СИЗНИ ЯХШИ КЎРАМАН

Юрагингиз қуёшдан катта,
Юлдузларга ватан – кўзингиз.
Иккимизнинг жонимиз битта,
Менинг ўзим – Сизнинг Ўзингиз.
Мен Сиз билан Бахтга бораман,
Она, Сизни яхши кўраман!

Қошларимиз ўхшаб кетади,
Кўзингизда кулиб турибман.
«О, у кунлар қачон қайтади!..»
Қўмсаяпсиз, билиб турибман.
Ҳамон Сизга дўстдай юраман,
Опа, Сизни яхши кўраман!

Бугун сенда баҳорни кўрдим,
Юлдузларга термуласан жим.
Хуш дамларга яна юз бурдим,
Сен баҳорга ўхшайсан, синглим.
Ол, кўкламни сенга бераман,
Синглим, сени яхши кўраман!

Капалакли кўйлагингизга
Тегмай туриб, титрайди қўлим.
Тўймаяпман бўйларингизга,
Сиз, барибир, бошқасиз, Гулим.
Лабингизда шабнам бўламан,
Гулим, Сизни яхши кўраман!

Яшнаяпман меҳрингиз билан,
Ҳаётимга ифорлар сочиб.
Яшаяпман муҳаббат тўла –
Дунёларга кўксимни очиб.
Мен юраги осмон боламан,
Ҳаммангизни яхши кўраман,
Ҳаммангизни яхши кўраман!

2003 йил 4 март

Беҳзод ФАЗЛИДДИН

Шеърни YouTubeда тинглаш

SIZNI YAXSHI KO‘RAMAN

Yuragingiz quyoshdan katta,
Yulduzlarga vatan – ko‘zingiz.
Ikkimizning jonimiz bitta,
Mening o‘zim – Sizning O‘zingiz.
Men Siz bilan Baxtga boraman,
Ona, Sizni yaxshi ko‘raman!

Qoshlarimiz o‘xshab ketadi,
Ko‘zingizda kulib turibman.
“O, u kunlar qachon qaytadi!..”
Qo‘msayapsiz, bilib turibman.
Hamon Sizga do‘stday yuraman,
Opa, Sizni yaxshi ko‘raman!

Bugun senda bahorni ko‘rdim,
Yulduzlarga termulasan jim.
Xush damlarga yana yuz burdim,
Sen bahorga o‘xshaysan, singlim.
Ol, ko‘klamni senga beraman,
Singlim, seni yaxshi ko‘raman!

Kapalakli ko‘ylagingizga
Tegmay turib, titraydi qo‘lim.
To‘ymayapman bo‘ylaringizga,
Siz, baribir, boshqasiz, Gulim.
Labingizda shabnam bo‘laman,
Gulim, Sizni yaxshi ko‘raman!

Yashnayapman mehringiz bilan,
Hayotimga iforlar sochib.
Yashayapman muhabbat to‘la –
Dunyolarga ko‘ksimni ochib.
Men yuragi osmon bolaman,
Hammangizni yaxshi ko‘raman,
Hammangizni yaxshi ko‘raman!

2003-yil 4-mart

Behzod FAZLIDDIN

She’rni YouTubeda tinglash

Добавить комментарий

Ваш e-mail не будет опубликован.