Солланиб бозорга отланар сўзлар…

ҚИЁФА

Солланиб бозорга отланар сўзлар,
Ҳар кўчада ял-ял товланар, ёнар.
Аслидан баландроқ баҳони кўзлар,
Тинмай муқом қилар, бежо тўлғонар.

Кибор расталарда турар терилиб,
Кун ўтмай ирийди, ич-ичдан айнир.
Томошабоп бўлар бири керилиб,
Бошқасини биров сақичдай чайнар.

Бичилган фарёдлар, бўғилган бўзлар
Хор-хасдек беқадр дунё йўлида.
Азал дами ўткир қиличдек сўзлар
Ўтмас пичоқ бўлди номард қўлида.

Дод солгинг келади, ёлғон чўзилса,
Бозорга айланса назму нафосат,
Кечаги бокира сўзлар бузилса…
Томошабин бўлса аҳли фаросат!

Солланиб бозорга отланар сўзлар…

2012

Беҳзод ФАЗЛИДДИН

QIYOFA

Sollanib bozorga otlanar so‘zlar,
Har ko‘chada yal-yal tovlanar, yonar.
Aslidan balandroq bahoni ko‘zlar,
Tinmay muqom qilar, bejo to‘lg‘onar.

Kibor rastalarda turar terilib,
Kun o‘tmay iriydi, ich-ichdan aynir.
Tomoshabop bo‘lar biri kerilib,
Boshqasini birov saqichday chaynar.

Bichilgan faryodlar, bo‘g‘ilgan bo‘zlar
Xor-xasdek beqadr dunyo yo‘lida.
Azal dami o‘tkir qilichdek so‘zlar
O‘tmas pichoq bo‘ldi nomard qo‘lida.

Dod solging keladi, yolg‘on cho‘zilsa,
Bozorga aylansa nazm-u nafosat,
Kechagi bokira so‘zlar buzilsa…
Tomoshabin bo‘lsa ahli farosat!

Sollanib bozorga otlanar so‘zlar…

2012

Behzod FAZLIDDIN

Добавить комментарий

Ваш e-mail не будет опубликован.