Ertaga boshqacha nur ekar quyosh…


Кўзим толди – кутмоқ дарди оғир экан,
Йўлга қараб ўтмоқ дарди оғир экан.
Барига-ку чидаш мумкин, лек ҳар нафас
Ўз-ўзингни титмоқ дарди оғир экан.

ТАЪБИР

Эртага бошқача нур экар қуёш –
Эртага ҳаммаёқ ёруғ бўлади.
Тўкилса, қувончдан тўкилар кўзёш,
Еру кўк ғубордан фориғ бўлади.

Армон бир доғ мисол йўқолар ўчиб,
Булутдай тарқалур диллардан кадар.
Омонлик тилайди бир-бирин қучиб
Чумолидан тортиб чаёнга қадар.

Туйғулар чашмида нурлар ранго-ранг,
Кўнглингни ёзасан киройиларга.
Чеҳранг очилади қай томон боқсанг,
Олам тўлиб кетар чиройлиларга.

Бахт қўшиқ куйлайди – ўктам овози,
Хуш садо тўлдириб келар самони.
Ҳамма тақдиридан миннатдор, рози,
Ажрата олмайсан шоҳу гадони…

Беҳзод ФАЗЛИДДИН


Ko‘zim toldi – kutmoq dardi og‘ir ekan,
Yo‘lga qarab o‘tmoq dardi og‘ir ekan.
Bariga-ku chidash mumkin, lek har nafas
O‘z-o‘zingni titmoq dardi og‘ir ekan.

TA’BIR

Ertaga boshqacha nur ekar quyosh –
Ertaga hammayoq yorug‘ bo‘ladi.
To‘kilsa, quvonchdan to‘kilar ko‘zyosh,
Yer-u ko‘k g‘ubordan forig‘ bo‘ladi.

Armon bir dog‘ misol yo‘qolar o‘chib,
Bulutday tarqalur dillardan kadar.
Omonlik tilaydi bir-birin quchib
Chumolidan tortib chayonga qadar.

Tuyg‘ular chashmida nurlar rango-rang,
Ko‘nglingni yozasan kiroyilarga.
Chehrang ochiladi qay tomon boqsang,
Olam to‘lib ketar chiroylilarga.

Baxt qo‘shiq kuylaydi – o‘ktam ovozi,
Xush sado to‘ldirib kelar samoni.
Hamma taqdiridan minnatdor, rozi,
Ajrata olmaysan shohu gadoni…

Behzod FAZLIDDIN

Добавить комментарий

Ваш e-mail не будет опубликован.