Қуёш – юлдузларнинг энг чиройлиси…

ТУҒИЛИШ

Тонгни алёр айтиб уйғотди булбул,
Оламга таралди тириклик иси.
Аста бош кўтарар чеҳраси гулгун
Қуёш – юлдузларнинг энг чиройлиси.

Ором олар бўлди, ниҳоят, Чўлпон,
Янги кун нафаси элитар бехос;
Кундузнинг бағрида яйрайди осмон,
Бугуннинг жамоли чиндан беқиёс.

Зулмат залворидан ўзни қутқазсанг,
Синалган созлари синмас саботнинг.
Ҳар тунни Юлдуздай порлаб ўтказсанг,
Муродбахш кунлари кўпдир ҳаётнинг.

2011

Беҳзод ФАЗЛИДДИН

Добавить комментарий

Ваш e-mail не будет опубликован.