Тошкент таронаси | Toshkеnt taronasi

Тошкент 4Mustaqillik maydoniТошкент 2МетроТошкент

Топгандай дарёга чўккан гавҳарни
Тонг аста қуёшни фалакка осар.
Бошига кўтариб бутун шаҳарни
Уйғота бошлайди темир хўрозлар.

Муҳаббат тафтидан олган баҳралар,
Янги кун – забт этиш учун бир довон.
Файзиёб йўлларда зебо чеҳралар,
Қуйма шеър мисоли кўчалар равон.

Юз йиллар тилсимин сақлар бағрида
Ҳар барги минг ҳикмат дониш чинорлар.
Куч олиб заминнинг оташ меҳридан
Самога бўйлайди азим минорлар.

Хиёбонлар аро сайр этиб гулгун,
Жонингни яйратсанг салқинларида.
Фаввора рақсига ҳамоҳанг, уйғун –
Ҳаловат бордайин шовқинларида.

Зиналар йўл бошлар, кирмоқчи бўлсанг –
Ерости саройи ёруғ, муҳташам.
Барака сувратин кўрмоқчи бўлсанг,
Бир бор кириб ўтгин бозорига ҳам.

Учиб келди не-не мусофир қушлар,
Бағрига чорлади этмай бегона.
Бунча ширин экан тошкентча тушлар,
Юлдузлар қошингда тун-кун парвона!

Эй дўстим, не учун шукронамиз кам,
Кўп кўрдик шу замин саховатини.
Ажабмас, соғинсак кўкда туриб ҳам
Тошкент оқшомлари тароватини.

Меҳрини пойандоз этиб йўлига
Она Шош кимга нон, кимга шон тутар.
Ҳар саҳар ёзгин деб элнинг қўлига
Оламга етгулик дастурхон тутар.

Тупроғи зарга тенг қадим бўстоннинг
Гулларга кўмилган пойтахти – Тошкент!
Ўзбекистон деган дилбар достоннинг
Дунёга таралган шоҳ байти – Тошкент!

2009 йил 30 июн

Беҳзод ФАЗЛИДДИН

TOSHKЕNT TARONASI

Topganday daryoga cho‘kkan gavharni
Tong asta quyoshni falakka osar.
Boshiga ko‘tarib butun shaharni
Uyg‘ota boshlaydi temir xo‘rozlar.

Muhabbat taftidan olgan bahralar,
Yangi kun – zabt etish uchun bir dovon.
Fayziyob yo‘llarda zebo chehralar,
Quyma she’r misoli ko‘chalar ravon.

Yuz yillar tilsimin saqlar bag‘rida
Har bargi ming hikmat donish chinorlar.
Kuch olib zaminning otash mehridan
Samoga bo‘ylaydi azim minorlar.

Xiyobonlar aro sayr etib gulgun,
Joningni yayratsang salqinlarida.
Favvora raqsiga hamohang, uyg‘un –
Halovat bordayin shovqinlarida.

Zinalar yo‘l boshlar, kirmoqchi bo‘lsang –
Yerosti saroyi yorug‘, muhtasham.
Baraka suvratin ko‘rmoqchi bo‘lsang,
Bir bor kirib o‘tgin bozoriga ham.

Uchib keldi ne-ne musofir qushlar,
Bag‘riga chorladi etmay begona.
Buncha shirin ekan toshkentcha tushlar,
Yulduzlar qoshingda tun-kun parvona!

Ey do‘stim, ne uchun shukronamiz kam,
Ko‘p ko‘rdik shu zamin saxovatini.
Ajabmas, sog‘insak ko‘kda turib ham
Toshkent oqshomlari tarovatini.

Mehrini poyandoz etib yo‘liga
Ona Shosh kimga non, kimga shon tutar.
Har sahar yozgin deb elning qo‘liga
Olamga yetgulik dasturxon tutar.

Tuprog‘i zarga teng qadim bo‘stonning
Gullarga ko‘milgan poytaxti – Toshkent!
O‘zbekiston degan dilbar dostonning
Dunyoga taralgan shoh bayti – Toshkent!

2009-yil 30-iyun

Behzod FAZLIDDIN

Ижтимоий тармоқларда:
https://www.facebook.com/behzod.fazliddin
https://www.facebook.com/behzodfazliddin.uz/
https://twitter.com/BehzodFazliddin
Телеграмдаги каналимиз: @Behzod_Fazliddin
YouTubeдаги cаҳифа-каналимиз: Behzod Fazliddin

Опубликовать в Facebook
Опубликовать в Google Plus
Опубликовать в LiveJournal
Опубликовать в Мой Мир
Опубликовать в Одноклассники
Опубликовать в Яндекс
Ўқишлар сони: 633

Добавить комментарий

Ваш e-mail не будет опубликован. Обязательные поля помечены *