Тоза бир сўз

Беҳзоднинг ижодини кўп йиллардан буён кузатиб келаман. Унинг ўқувчилик йиллари битган машқлари киритилган дастлабки икки китобчаси билан ҳам танишман. Учинчи китоби эса менда ёш шоирнинг келажагига умид, ишонч уйғотган. Мазкур “Онамнинг кўнглига кетамиз” тўпламида Беҳзоднинг, назаримда, ижодга масъулият билан ёндашаётгани, шеъриятга тақдир деб қарашга мойиллиги сезилиб туради. Унинг она, Ватан, табиат, ёшлик, севги-муҳаббат каби турли мавзулардаги шеърлари навқирон ижодкорнинг тинмай изланаётгани, жиддий меҳнат қилаётганидан дарак берарди.
“Сен қачон гуллайсан” – шоирнинг тўртинчи китобидир. Энди Беҳзод Фазлиддин ижодига адабиётнинг расмона талаблари билан ёндашишга ҳақлимиз. Китобга киритилган шеърларда ҳаётга очиқ кўз билан тийрак боқаётган ҳиссиётчан, кўнгли безовта, фикрлайдиган, ўз-ўзини, замондошларини, мураккаб дунёни бот-бот саволга тутиб турадиган лирик қаҳрамон қиёфаси анча аниқ намоён бўлади.
Беҳзод Фазлиддин шеър “ясаш”дан қочишга, ҳар бир сўзни ўз ўрнида ишлатишга интилади. У қалбидан кечаётган турфа туйғуларини, воқелик таассуротларини оҳорли ташбеҳлар, маънодор рамзлар орқали самимий ифодалайди. Умуман, унинг энг яхши шеърларида ҳаётнинг реал тасвирлари акс этмоқда.
Беҳзод танқидни кўтарадиган, тўғри гапни тан оладиган ёшлардан. Бинобарин, истардикки, у ҳозир кенг “урф”га кирган фикр назмга солинган намуналар ёзишдан узоқ юрса…
Шеъриятда тоза бир Сўз айтишни ният қилган шоирнинг қўлингиздаги янги китоби қалбингизни инсоний, рост туйғулар билан бойитса, демак, изланишлари бесамар кетмабди.

Маҳмуд САЪДИЙ

2008 йил. “Сен қачон гуллайсан” китобига сўзбоши.

TOZA BIR SOʻZ

Behzodning ijodini koʻp yillardan buyon kuzatib kelaman. Uning oʻquvchilik yillari bitgan mashqlari kiritilgan dastlabki ikki kitobchasi bilan ham tanishman. Uchinchi kitobi esa menda yosh shoirning kelajagiga umid, ishonch uygʻotgan. Mazkur “Onamning koʻngliga ketamiz” toʻplamida Behzodning, nazarimda, ijodga masʼuliyat bilan yondashayotgani, sheʼriyatga taqdir deb qarashga moyilligi sezilib turadi. Uning ona, Vatan, tabiat, yoshlik, sevgi-muhabbat kabi turli mavzulardagi sheʼrlari navqiron ijodkorning tinmay izlanayotgani, jiddiy mehnat qilayotganidan darak berardi.
“Sen qachon gullaysan” – shoirning toʻrtinchi kitobidir. Endi Behzod Fazliddin ijodiga adabiyotning rasmona talablari bilan yondashishga haqlimiz. Kitobga kiritilgan sheʼrlarda hayotga ochiq koʻz bilan tiyrak boqayotgan hissiyotchan, koʻngli bezovta, fikrlaydigan, oʻz-oʻzini, zamondoshlarini, murakkab dunyoni bot-bot savolga tutib turadigan lirik qahramon qiyofasi ancha aniq namoyon boʻladi.
Behzod Fazliddin sheʼr “yasash”dan qochishga, har bir soʻzni oʻz oʻrnida ishlatishga intiladi. U qalbidan kechayotgan turfa tuygʻularini, voqelik taassurotlarini ohorli tashbehlar, maʼnodor ramzlar orqali samimiy ifodalaydi. Umuman, uning eng yaxshi sheʼrlarida hayotning real tasvirlari aks etmoqda.
Behzod tanqidni koʻtaradigan, toʻgʻri gapni tan oladigan yoshlardan. Binobarin, istardikki, u hozir keng “urf”ga kirgan fikr nazmga solingan namunalar yozishdan uzoq yursa…
Sheʼriyatda toza bir Soʻz aytishni niyat qilgan shoirning qoʻlingizdagi yangi kitobi qalbingizni insoniy, rost tuygʻular bilan boyitsa, demak, izlanishlari besamar ketmabdi.

Mahmud SAʼDIY

2008-yil. “Sen qachon gullaysan” kitobiga soʻzboshi.

Добавить комментарий

Ваш e-mail не будет опубликован.