Umid chirog‘imni o‘chirma, bolam!


Қизинг қиздай бўлса, ўғлинг ўғилдай,
Якто бўлмаса ҳам чиройда, кучда.
Бўйларига боқсанг кўнглинг бўғилмай,
Кўпдан қолган доғи бўлмаса ичда.

Асли, зурёдидан ахир ким тонар,
Авлод – келажакка битилган хатдир.
Тожу тахтинг бўлса отаю она,
Фарзанди солиҳ ҳам улуғ давлатдир.

Тахтиравон бўлди ёруғ хаёллар,
Ёдинг виқори-ла шоҳлардай юрдим.
Орзулар қасрида яшаган онлар,
Болам, камолингни тушимда кўрдим.

Мен юрган йўлларнинг тўғрисидан юр,
Ўртаса ўртасин ёруғ азоблар.
Мен кўрган кунлардан яхшисини кўр,
Сенга мерос бўлсин хайру савоблар.

Дунё юзин кўриб, ўрнимни олгин,
Қутлуғ қадамингдан тозарсин олам.
Не-не довуллардан омон ўткарган
Умид чироғимни ўчирма, болам!

2012

Беҳзод ФАЗЛИДДИН


Qizing qizday bo‘lsa, o‘g‘ling o‘g‘ilday,
Yakto bo‘lmasa ham chiroyda, kuchda.
Bo‘ylariga boqsang ko‘ngling bo‘g‘ilmay,
Ko‘pdan qolgan dog‘i bo‘lmasa ichda.

Asli, zuryodidan axir kim tonar,
Avlod – kelajakka bitilgan xatdir.
Toj-u taxting bo‘lsa ota-yu ona,
Farzandi solih ham ulug‘ davlatdir.

Taxtiravon bo‘ldi yorug‘ xayollar,
Yoding viqori-la shohlarday yurdim.
Orzular qasrida yashagan onlar,
Bolam, kamolingni tushimda ko‘rdim.

Men yurgan yo‘llarning to‘g‘risidan yur,
O‘rtasa o‘rtasin yorug‘ azoblar.
Men ko‘rgan kunlardan yaxshisini ko‘r,
Senga meros bo‘lsin xayr-u savoblar.

Dunyo yuzin ko‘rib, o‘rnimni olgin,
Qutlug‘ qadamingdan tozarsin olam.
Ne-ne dovullardan omon o‘tkargan
Umid chirog‘imni o‘chirma, bolam!

2012

Behzod FAZLIDDIN

Добавить комментарий

Ваш e-mail не будет опубликован.