Umrim bezar bir mehri g‘oyib…

ХАВОТИР

Ечилмасдан қийнар жумбоғи,
Ўйлаб-ўйлаб ўзни ўртарсан.
Оғир бўлмасми деб сўроғи,
Бахтли бўлишга ҳам қўрқарсан.

2008

ШИРИН ХАЁЛ

Бирдан қалбим кетар ёришиб,
Яна севгим, яшагим келар.
Ҳаёт билан сутдай қоришиб,
Йўлига жон тўшагим келар.

Ҳар лаҳзада мазмун бор, Ишқ бор,
Доғ йўқ чивин қанотича ҳам.
Юришларим бирам маънодор,
Гард юқмаган ҳар куним – байрам.

Шубҳаларга ишонч пардадир,
Бир ўй қанот берар шавқимга:
Балки, кимдир, қаерлардадир
Дуо қилар менинг ҳақимга.

Шундан бағрим бутун, эҳтимол,
Шунга йўлдан кетмасман тойиб.
Олисларда чевардай хушҳол
Умрим безар бир меҳри ғойиб…

2009

Беҳзод ФАЗЛИДДИН

XAVOTIR

Yechilmasdan qiynar jumbog‘i,
O‘ylab-o‘ylab o‘zni o‘rtarsan.
Og‘ir bo‘lmasmi deb so‘rog‘i,
Baxtli bo‘lishga ham qo‘rqarsan.

2008

SHIRIN XAYOL

Birdan qalbim ketar yorishib,
Yana sevgim, yashagim kelar.
Hayot bilan sutday qorishib,
Yo‘liga jon to‘shagim kelar.

Har lahzada mazmun bor, Ishq bor,
Dog‘ yo‘q chivin qanoticha ham.
Yurishlarim biram ma’nodor,
Gard yuqmagan har kunim – bayram.

Shubhalarga ishonch pardadir,
Bir o‘y qanot berar shavqimga:
Balki, kimdir, qaerlardadir
Duo qilar mening haqimga.

Shundan bag‘rim butun, ehtimol,
Shunga yo‘ldan ketmasman toyib.
Olislarda chevarday xushhol
Umrim bezar bir mehri g‘oyib…

2009

Behzod FAZLIDDIN

Добавить комментарий

Ваш e-mail не будет опубликован.