Бу зиндонда фақат зўрни севарлар!..

ЗАМОН

Кўзларни ўйнатиб тусланар дунё,
Жасадлар ичинда юраклар урён,
Одам-ку азалдан туфроқдан бунёд,
Аслидан орланиб, зарни севарлар.

Жавониб тўлмишдир жабру жафога,
Қайдан қирғин келган меҳру вафога,
Водариғ, кун йўқдир аҳли ҳаёга,
Фоҳишни алқарлар, ғарни севарлар.

Гуллар зор – ҳаётга кўзлари тўймай,
Япроқлар хазонми нурга юз бурмай,
Арғумоқлар увол кўпкари кўрмай,
Эйвоҳ, туфук сочган харни севарлар.

Қанот қоқиб борар беруҳ қўшиқлар,
Суймаслар хандондир, гирён ошиқлар,
Қайларда қон йиғлар қалби очиқлар,
Кўнгли кўрни ва ё карни севарлар.

Алҳазар, турланар – одамми ё жин,
Аларнинг илкида дин ҳам бир ўйин,
Қаддингни адил тут, Беҳзод Фазлиддин,
Бу зиндонда фақат зўрни севарлар!..

Беҳзод ФАЗЛИДДИН

ZAMON

Ko‘zlarni o‘ynatib tuslanar dunyo,
Jasadlar ichinda yuraklar uryon,
Odam-ku azaldan tufroqdan bunyod,
Aslidan orlanib, zarni sevarlar.

Javonib to‘lmishdir jabr-u jafoga,
Qaydan qirg‘in kelgan mehr-u vafoga,
Vodarig‘, kun yo‘qdir ahli hayoga,
Fohishni alqarlar, g‘arni sevarlar.

Gullar zor – hayotga ko‘zlari to‘ymay,
Yaproqlar xazonmi nurga yuz burmay,
Arg‘umoqlar uvol ko‘pkari ko‘rmay,
Eyvoh, tufuk sochgan xarni sevarlar.

Qanot qoqib borar beruh qo‘shiqlar,
Suymaslar xandondir, giryon oshiqlar,
Qaylarda qon yig‘lar qalbi ochiqlar,
Ko‘ngli k o‘rni va yo karni sevarlar.

Alhazar, turlanar – odammi yo jin,
Alarning ilkida din ham bir o‘yin,
Qaddingni adil tut, Behzod Fazliddin,
Bu zindonda faqat zo‘rni sevarlar!..

Behzod FAZLIDDIN

Добавить комментарий

Ваш e-mail не будет опубликован.