Юрганга яраша юрсанг тирикдай…


Занжирлар узилса, кишанлар синса,
Ортиқ юкинмасанг шу эски тосга.
Ўзлигин йўқотган руҳга файз инса,
Умрингни буркасанг боқий ихлосга.

Шояд, ўз номини унутса хаёл –
Ҳақиқатга дўнса бой тасаввурлар.
Дунёни муҳаббат айласа ишғол,
Замин чеҳрасидан ёғилса нурлар.

Қалб кўзин фикратга эш қилиб боқсанг,
Нигоҳингнинг ўзи улуғ шеър бўлса.
Энг кўҳна ҳикматлар мағзини чақсанг,
Эҳсонга айланса, дил не дер бўлса.

Яшасанг, шу кўйи яшасанг мудом,
Ҳаёт китобида зарҳал битикдай.
Ўлим-да мард бўлса, қилмаса ғирром,
Юрганга яраша юрсанг тирикдай…

2012


Ҳақдан келиб турмаса, қайда эди бу сўзлар,
Юрак санчиб урмаса, майда эди бу сўзлар.
Жунун жўшган чоғларда ўзни андак йиғмасам,
Дунёнинг тўрвасига фойда эди бу сўзлар.

2012

Беҳзод ФАЗЛИДДИН


Zanjirlar uzilsa, kishanlar sinsa,
Ortiq yukinmasang shu eski tosga.
O‘zligin yo‘qotgan ruhga fayz insa,
Umringni burkasang boqiy ixlosga.

Shoyad, o‘z nomini unutsa xayol –
Haqiqatga do‘nsa boy tasavvurlar.
Dunyoni muhabbat aylasa ishg‘ol,
Zamin chehrasidan yog‘ilsa nurlar.

Qalb ko‘zin fikratga esh qilib boqsang,
Nigohingning o‘zi ulug‘ she’r bo‘lsa.
Eng ko‘hna hikmatlar mag‘zini chaqsang,
Ehsonga aylansa, dil ne der bo‘lsa.

Yashasang, shu ko‘yi yashasang mudom,
Hayot kitobida zarhal bitikday.
O‘lim-da mard bo‘lsa, qilmasa g‘irrom,
Yurganga yarasha yursang tirikday…

2012


Haqdan kelib turmasa, qayda edi bu so‘zlar,
Yurak sanchib urmasa, mayda edi bu so‘zlar.
Junun jo‘shgan chog‘larda o‘zni andak yig‘masam,
Dunyoning to‘rvasiga foyda edi bu so‘zlar.

2012

Behzod FAZLIDDIN

Добавить комментарий

Ваш e-mail не будет опубликован.